Unonan Samuel 21:1-29
21 Kayari na saraya, walay agawa nipaakar ed ubasan nen Nabot a Jezreelita diman ed Jezreel,+ diad abay na palasyo nen Ahab ya ari na Samaria.
2 Inkuan nen Ahab ed si Nabot: “Iter mod siak so ubasan mo pian walay pantaneman koy pisipising, ta asingger itan ed abung ko. Salatan ko itan na mas marakep ya ubasan. Odino no labay mo, saliwen kod sika.”
3 Balet inkuan nen Nabot ed si Ahab: “Agkon balot sarag ya iter ed sika so tawir na saray inmuunan atateng ko, ta isesebel iya nen Jehova.”+
4 Kanian maer-ermen si Ahab tan dismayadon linmoob ed abung to lapud samay ebat ed sikato nen Nabot a Jezreelita sanen inkuan to: “Agko iter ed sika so tawir na saray inmuunan atateng ko.” Diad ontan et sikatoy dinmukol ed dukolan to, agto labay so onarap ed totoo, tan agto labay so mangan.
5 Et linmad sikato si Jezebel+ ya asawa to tan intepet to: “Akin et maer-ermen ka* tan agmo labay so mangan?”
6 Oniay ebat to: “Ta imbagak ed si Nabot a Jezreelita, ‘Ilakom ed siak so ubasan mo. Odino no labay mo, salatan ko la na sananey ya ubasan.’ Balet say kuan to, ‘Agko iter ed sika so ubasan ko.’”
7 Et inkuan nen Jezebel ya asawa to: “Agta sikay ari ed Israel? Alagey ka, mangan ka, tan manliket ka. Iter kod sika so ubasan nen Nabot a Jezreelita.”+
8 Kanian si Jezebel et nanggawa na saray sulat diad ngaran nen Ahab tan tinatakan to iratan diad panamegley na panagtatak na ari+ tan impawit tod saray mamatatken+ tan saray gagalangen a totoo diad syudad a panaayaman nen Nabot.
9 Oniay karga na saray sulat to: “Iyabawag yoy panag-ayunal, tan payurong yoy Nabot diad arapan na totoo.
10 Tan payurong yod arapan to so duaran andi-kakanaan a lalaki tan pantestigo yo ra sumpad sikato,+ ya ibaga ran, ‘Insambam so Dios tan say ari!’+ Insan ipaway yo tan tupak yo ya anggad ompatey.”+
11 Kanian saramay lalaki ed syudad, saray mamatatken tan saray gagalangen a totoo diad syudad a panaayaman to, et ginawa ra so walad saray sulat ya impawit nen Jezebel ed sikara.
12 Inyabawag day panag-ayunal tan pinayurong day Nabot diad arapan na totoo.
13 Insan walay duaran andi-kakanaan a lalaki a yinmurong ed arapan nen Nabot tan nantestigo ra sumpad sikato diad arapan na totoo, a kuan da: “Insamba nen Nabot so Dios tan say ari!”+ Kayari na satan et sikatoy inyakar dad paway na syudad tan tinutupak da ya anggad inatey.+
14 Diad saman et impaibaga rad si Jezebel: “Si Nabot et tinupak la ya anggad inatey.”+
15 Sanen nadngel nen Jezebel a si Nabot et tinupak ya anggad inatey, inkuan tod si Ahab: “Alagey ka, alam la may ubasan nen Nabot a Jezreelita+ ya agto labay ya ilakod sika, ta anggapo lay Nabot. Inatey la.”
16 Sanen nadngel nen Ahab ya inatey lay Nabot, sikatoy binmangon tan linmad ubasan nen Nabot a Jezreelita pian alaen itan.
17 Balet say mensahe nen Jehova et sinmabid si Elias+ a Tisbita, a kuan to:
18 “Alagey ka, lasur ka tan la kad si Ahab ya ari na Israel, a walad Samaria.+ Sikatoy wadman ed ubasan nen Nabot, ta linma diman pian alaen to itan.
19 Ibagam ed sikato, ‘Oniay inkuan nen Jehova: “Amatey ka la lanti na sakey a too,+ inalam ni so kayarian to?”’+ Tan ibagam nid sikato, ‘Oniay inkuan nen Jehova: “Diman ed pasen a nandildilan na saray aso ed dala nen Nabot et dildilan met na saray aso so dalam.”’”+
20 Et oniay imbaga nen Ahab ed si Elias: “E, aromog ak na kabusol ko!”+ Et oniay ebat to: “On, aromog ta ka. Ta inkuan na Dios: ‘Lapud determinado ka* a manggaway mauges ed pakanengneng nen Jehova,+
21 idapok so desyang ed sika, Ahab, tan paandien ta ka tan upoten ko so amin a lalaki* ed pamilyam,+ kaiba iray pakaskasi tan makapuy ed Israel.+
22 Tan gawaen koy sankaabungan mo a singa ed sankaabungan nen Jeroboam+ ya anak nen Nebat tan singa ed sankaabungan nen Baasa+ ya anak nen Ahias, ta pinasanok mo ak tan inlagyat mon mankasalanan so Israel.’
23 Tan nipaakar ed si Jezebel et inkuan nen Jehova: ‘Si Jezebel et kanen na saray aso diad sakey ya uma ed Jezreel.+
24 Siopaman ed sankaabungan mo, O Ahab, ya ompatey ed syudad et kanen na saray aso, tan siopaman ya ompatey ed uma et kanen na saray manok.+
25 Et anggapon balot so toon singa si Ahab,+ a talagan determinado* a manggaway mauges ed pakanengneng nen Jehova, lapud sinugsogan nen Jezebel ya asawa to.+
26 Sikatoy nanggawa na kagulgula diad impandayew tod saray makapadimlan idolo,* a singa ginawa na amin ya Amoreo a pinataynan nen Jehova diad arapan na saray Israelita.’”+
27 Sanen nadngel iraya nen Ahab, pinilat to ray kawes to tan nansulong na sakon abel; tan nan-ayunal tan nandukol ya akasulong na sakon abel tan maer-ermen a nanakar-akar.
28 Tan oniay mensahe nen Jehova a sinmabid si Elias a Tisbita:
29 “Anengneng mo no panon a nampaabebay Ahab nisengeg ed siak?+ Lapud nampaabeba diad arapan ko, agko idapoy desyang legan a mabilay. Idapok itan ed sankaabungan to diad saray agew na anak to.”+
Paimanod leksab
^ Literal, “so espiritum.”
^ Literal, “inlakom so sarilim.”
^ Literal, “siopaman a manisirit ed padir.” Sakey a Hebreon balikas a panmudmora ya ontutukoy ed saray lalaki.
^ Literal, “ya inlako toy sarili to.”
^ Say Hebreon termino na saya et nayarin mikonektaan ed salita parad “tai na ayep” tan uusaren a panmudmora.
