Unonan Samuel 22:1-53
22 Diad loob na taloy taon et anggapoy agawan guerra ed baetan na Sirya tan Israel.
2 Diad komatlon taon, si Arin Jehosafat+ na Juda et linmad ari na Israel.+
3 Et inkuan na ari na Israel ed saray lingkor to: “Amta yo ta a sikatayoy akanggawad Ramot-gilead?+ Balet manaalangan tayon bawien itan ed ari na Sirya.”
4 Tan inkuan tod si Jehosafat: “Labay moy milad siak a milaban diad Ramot-gilead?” Et oniay ebat nen Jehosafat ed ari na Israel: “Siak tan sika et saksakey. Ontan met iray totook tan totoom, pati saray kabayok tan kabayom.”+
5 Balet inkuan ni nen Jehosafat ed ari na Israel: “Amtaen mo pa ni+ no antoy ibaga nen Jehova.”+
6 Kanian tinipon na ari na Israel iray propeta a manga 400 a lalaki, tan inkuan tod sikara: “Onla ak a milaban ed Ramot-gilead, odino andi?” Et inkuan da: “La ka, tan iyawat itan nen Jehova ed lima na ari.”
7 Et inkuan nen Jehosafat: “Agta wala diay propeta nen Jehova? Ontupleg tayo met diad panamegley to.”+
8 Diad saman, say ari na Israel et inkuan tod si Jehosafat: “Wala ni sakey a laki a diad panamegley to et nayari tayon ontupleg ed si Jehova;+ balet kabkabusol ko+ ta agbalot mangipropropesiya na maabig iran bengatla nipaakar ed siak noagta puro mauges.+ Say ngaran to et Micaias ya anak nen Imla.” Balet inkuan nen Jehosafat: “Agnepeg a mansalita na ontan so ari.”
9 Kanian impatawag na ari na Israel so sakey ya opisyal ed palasyo tan inkuan to: “Awit mo diay Micaias ya anak nen Imla. Apuram.”+
10 Diad saman, say ari na Israel tan si Jehosafat ya ari na Juda et parehon akayurong ed trono ra, ya akasulong iray kawes na ari, tan wala rad panag-ilikan ya asingger ed puerta na Samaria, tan amin a propeta et manpropropesiya diad arapan da.+
11 Tan si Zedekias ya anak nen Kenaana et nanggawa na saray saklor a balatyang tan inkuan to: “Oniay imbaga nen Jehova, ‘Diad panamegley na saraya et bunoen* mo ray Siryano anggad naupot ira.’”
12 Ontan met so ipropropesiya na saray arum nin propeta, a kuan da: “La ka ed Ramot-gilead tan manalo ka; iyawat itan nen Jehova ed lima na ari.”
13 Et samay mensahero a linman manawag ed si Micaias et inkuan tod sikato: “Say imbaga na saray propeta et pareparehon pabor ed ari. Komon ta mipara met ed sikara so ibagam tan mansalita ka na maabig.”+
14 Balet inkuan nen Micaias: “Unong a mabilay si Jehova, antokaman so ibagad siak nen Jehova et ontan so ibagak.”
15 Insan sikatoy linmad ari, tan oniay intepet na ari: “Micaias, onla kamin milaban ed Ramot-gilead, odino andi?” Et sikatoy inmebat a tampol: “La ka tan manalo ka; iyawat itan nen Jehova ed lima na ari.”
16 Diad ontan et inkuan na ari ed sikato: “Maminpiga ta kan nepeg a pansambaen a say katuaan labat so ibagam ed siak diad ngaran nen Jehova?”
17 Kanian inkuan to: “Nanenengneng koy amin ya Israelita a nitaytayak ed kapalandeyan,+ a singa ra karneron andian na managpastol. Inkuan nen Jehova: ‘Andian iraya na katawan. Balang sakey et pasempeten a maligen ed abung to.’”
18 Et inkuan na ari na Israel ed si Jehosafat: “Kuan ko lad sika, ‘Sikatoy agmangipropesiya na maabig iran bengatla nipaakar ed siak noagta puro mauges.’”+
19 Et inkuan nen Micaias: “Dengel mo sirin so mensahe a papaibaga nen Jehova: Anengneng koy Jehova ya akayurong ed trono to+ tan say amin ya armada ed tawen ya akaalagey ed abay to, diad nikawanan to tan diad nikawigi to.+
20 Et inkuan nen Jehova, ‘Siopay mamalikdod kinen Ahab pian sikatoy onla tan ompatey diad Ramot-gilead?’ Et walay bengatlan ibabaga na sakey, balet wala met so sananey ya ibabaga na arum.
21 Insan walay sakey ya espiritu*+ ya inmalagey ed arapan nen Jehova tan inkuan to, ‘Palikdoen ko.’ Et intepet nen Jehova ed sikato, ‘Panon mon gawaen itan?’
22 Et inmebat, ‘Onla ak tan magmaliw ak a manamalikdon espiritu diad sangi na amin a propeta to.’+ Kanian inkuan to, ‘Palikdoen mo, tan ontalona ka. La ka tan gawam itan.’
23 Tan natan et angiyan si Jehova na manamalikdon espiritu diad sangi na sarayan amin a propetam,+ balet inyabawag nen Jehova a walay mauges a nagawad sika.”+
24 Et dinago nen Zedekias ya anak nen Kenaana si Micaias tan tinampal to tan inkuan to: “Kasin nilampasan ak na espiritu nen Jehova pian mitongtong ed sika?”+
25 Inmebat si Micaias: “Naamtaan mo lanlamang itan diad agew ya onamot kad sankadaleman a kuarto.”
26 Insan inkuan na ari na Israel: “Alam si Micaias tan awit mod si Amon a pangulo na syudad tan ed si Joas ya anak na ari.
27 Tan ibagam ed sikara, ‘Oniay inkuan na ari: “Iyakar yod prisoan iyan too+ tan daiset labat a tinapay tan danum so irasyon yod sikato anggad makapawil ak a maligen.”’”
28 Balet imbaga nen Micaias: “No makapawil kan maligen, si Jehova et ag-akitongtong ed siak.”+ Inkuan to ni: “Tandaan yo, amin yon totoo.”
29 Kanian tinmatdang ed Ramot-gilead so ari na Israel tan si Jehosafat ya ari na Juda.+
30 Et inkuan na ari na Israel ed si Jehosafat: “Agak manpabidbir sano onla ak a milaban, balet mansulong kay kawes na ari.” Kanian agnampabidbir so ari na Israel+ sanen linman milaban.
31 Et oniay ingganggan na ari na Sirya ed 32 komandante na karwahe to:+ “Anggapoy arum a nepeg yon pilabanan noag say ari na Israel labat.”
32 Kanengneng na saray komandante na karwahe ed si Jehosafat, ninonot da: “Seguradon saya may ari na Israel.” Kanian binmaliwas ira pian sikatoy atakien da; et kinmerew na tulong si Jehosafat.
33 Sanen anengneng na saray komandante na karwahe ya aliwan sikato may ari na Israel, amuliktar iran tampol tan agda la inusilan.
34 Balet walay sakey a lakin inkena toy pana to ed anggan siopa,* tan nakna toy ari na Israel diad nansaipan na sulong ton samben ed pagew. Kanian inkuan na ari ed managkarwahe to: “Baliwas ka tan iyarawim ak diad panlalabanan,* ta grabe sugat ko.”+
35 Sanagew a pinasyay panlalaban ed saman, tan kaukolan ya ipasaral so ari diad karwahe pian makaalagey ya akaarap ed saray Siryano. Say dala na sugat to et inmagus diad loob na karwahen pan-guerra, tan kasabi labi et sikatoy inatey.+
36 Sanen onseselek lay agew, oniay inkelyaw ed interon kampo: “Balang sakey, pawil lad syudad to! Balang sakey, pawil lad dalin to!”+
37 Diad ontan et inatey so ari, tan inawit dad Samaria; imponpon day ari ditan.
38 Sanen inurasan day karwahen pan-guerra diad tiponay danum ed Samaria, say dala to et dinildilan na saray aso tan nanames ditan iray paabang a bibii,* unong ya imbaga nen Jehova.+
39 Tan saray arum nin agawa ed si Ahab, say amin a kimey to, say abung* a gawad garing*+ ya impaalagey to, tan say amin a syudad ya inletneg to, et akasulat ed libro na saray agawa diad panaon na arari na Israel.
40 Si Ahab et nampainawa la a kaiba na saray inmuunan atateng to;+ tan si Ahazias+ ya anak to so nagmaliw ya ari a kasalat to.
41 Et si Jehosafat+ ya anak nen Asa so nagmaliw ya ari ed Juda diad komapat a taon na uley nen Arin Ahab na Israel.
42 Si Jehosafat et mantaon na 35 sanen nagmaliw ya ari, tan 25 taon a nanuley ed Jerusalem. Say ngaran na ina to et Azuba ya anak nen Silhi.
43 Sikatoy nantultuloy a nanakar ed amin a dalan a nanakaran nen Asa+ ya ama to. Ag-inmarawi ditan tan ginawa toy duga ed pakanengneng nen Jehova.+ Balet saray atagey a pasen et agnaandi, tan saray totoo et siansia nin manbabagat tan manpapaasewek na bagat diad saray atagey a pasen.+
44 Pinansiansia nen Jehosafat so pikakareenan to ed ari na Israel.+
45 Tan saray arum nin agawa ed si Jehosafat, say impangipatnag toy inkabiskeg to tan no panon so impilaban to, et akasulat ed libro na saray agawa diad panaon na arari na Juda.
46 Pinaandi to met ed dalin iray akeran paabang a lalaki ed templo+ diad panaon nen Asa ya ama to.+
47 Diad saman et anggapoy ari ed Edom;+ sakey ya opisyal so onaakton ari.+
48 Nanggawa met si Jehosafat na saray barko na Tarsis* pian onlad Ofir a mangalay balitok,+ balet ag-akabiahe iray barko ta agaygay iratan diad Ezion-geber.+
49 Diad saman, si Ahazias ya anak nen Ahab et inkuan tod si Jehosafat: “Abuloyan mon mila iray lingkor ko ed saray lingkor mo a manbiahed barko,” balet ag-inmabobon si Jehosafat.
50 Si Jehosafat et nampainawa la a kaiba na saray inmuunan atateng to+ tan sikatoy imponpon a kaiba ra diad Syudad nen David ya inmunan ateng to; tan si Jehoram ya anak to+ so nagmaliw ya ari a kasalat to.
51 Et si Ahazias+ ya anak nen Ahab so nagmaliw ya ari ed Israel legan a walad Samaria diad koma-17 taon na uley nen Arin Jehosafat na Juda, tan duay taon a nanuley ed Israel.
52 Tan nantultuloy a nanggaway mauges ed pakanengneng nen Jehova tan tinumbok toy dalan nen ama to+ tan ina to+ tan say dalan nen Jeroboam ya anak nen Nebat, samay angilagyat ed Israel a mankasalanan.+
53 Sikatoy nantultuloy a nanlingkor tan dinmakmomo ed si Baal+ tan sinakitan toy liknaan nen Jehova a Dios na Israel,+ a singa ginawa nen ama to.
Paimanod leksab
^ Odino “itulak.”
^ Odino “anghel.”
^ Literal, “kampo.”
^ Odino “ya anggapoy kaam-amta to.”
^ Odino posiblin, “a panaamesan na saray paabang a bibii, say dala to et dinildilan na saray aso.”
^ Odino “palasyo.”
^ Diad Ingles et ivory. Sakey a klase na mablin materyales a manlalapud saray amputin pasingil na saray elepante tan arum ni ran ayayep.
