Unonan Samuel 3:1-28
3 Si Solomon et akikasakey ed Faraon ya ari na Ehipto diad panamegley na panangasawa. Inasawa* toy anak na Faraon+ tan inyakar tod Syudad nen David+ anggad nipaalagey toy abung to,+ tan say abung nen Jehova,+ tan say padir na Jerusalem.+
2 Balet saray totoo et siansia nin manbabagat diad saray atagey a pasen,+ ta anggad saman a panaon et agni nipaalagey so abung parad ngaran nen Jehova.+
3 Inad-aro nen Solomon si Jehova, a tutumboken to ray totontonen ya inter nen David ya ama to, balet ta siansia nin manbabagat tan manpapaasewek na saray apay diad saray atagey a pasen.+
4 Si Arin Solomon et linman nambagat diad Gibeon, ta satan so sankabantogan ya atagey a pasen.+ Sikatoy angiyapay na 1,000 bagat a popoolan diad satan ya altar.+
5 Diad Gibeon et nampanengneng si Jehova ed kinen Solomon diad sakey a kugip ed labi, tan inkuan na Dios: “Ibagam no antoy labay mon iter kod sika.”+
6 Et inkuan nen Solomon: “Impatnag mo so abalbaleg a matoor a panangaro ed lingkor mon si David ya amak legan a sikatoy manaakar diad arapan mo a walaay katooran, inkatunong, tan kaptekan na puso. Intultuloy mon impatnag ed sikato iyan abalbaleg a matoor a panangaro ya anggad sayan agew diad impangiter mod sikato na sakey ya anak a laki ya onyurong ed trono to.+
7 Tan natan, O Jehova a Dios ko, ginawam ya ari so lingkor mo a kasalat nen David ya amak, anggaman ugaw ak ni* tan anggapo ni eksperiensyak.*+
8 Say lingkor mo et walad limog na pinilim a totoom,+ ya agnabilang lapud karakel.
9 Kanian ikdan mo komon so lingkor mo na maunor a puso a mangukom ed totoom,+ pian natebek toy maong tan mauges,+ ta siopay makasarag a mangukom ed sarayan agaylay karakel* a totoom?”
10 Et aliketan si Jehova lapud saya so kinerew nen Solomon.+
11 Kanian inkuan na Dios ed sikato: “Lapud saya so kinerew mo tan agka kinmerew na andukey a bilay* odino kayamanan odino say ipatey* na saray kakabusol mo, noagta kinmerew kay pakatalos a mandengel na saray hudisyal a kaso,+
12 iter kod sika so kerew mo.+ Ikdan ta ka na marunong tan makatalos a puso,+ diad ontan et agkan balot naparaan na siopaman ya akaunad sika, tan anggapon balot so magmaliw a singa sika.+
13 Ontan met, anggan samay agmo kinerew et iter kod sika,+ say kayamanan tan gloria,+ diad ontan et anggapoy arum ya ari a makapipara ed sika legay bilay mo.*+
14 Tan no manakar ka ed saray dalan ko, ya unoren mo ray inter kon totontonen tan saray ganggan ko a singa ginawa nen David ya amam,+ ikdan ta ka met na andukey a bilay.”*+
15 Kabangon nen Solomon, amoria ton kugip manaya iman. Et sikatoy linmad Jerusalem tan inmalagey ed arap na kaban na sipanan nen Jehova tan angiyapay na saray bagat a popoolan tan saray apay a pandurungoan+ tan nampaponsia parad amin a lingkor to.
16 Diad saman et walay duaran bibii* a linmad ari tan inmalagey irad arapan to.
17 Inkuan na samay unonan bii: “Katawan ko, siak tan sayan bii et saksakey ya abung so panaayaman mi, tan sikatoy wadman sanen nananak ak.
18 Diad komatlon agew kayari impananak ko, sikatoy nananak met. Sankaiba kami, sikamin dua labat; anggapoy arum a kaiba mid abung.
19 Diad saman a labi et inatey so anak na sayan bii lapud atapilan to.
20 Kanian sikatoy binmangon diad pegley-labi tan inala toy anak ko ed abay ko legan a naugip ak tan imparukol tod taklay to,* tan say inatey ya anak to et imparukol tod taklay ko.
21 Kabangon kod kabuasan pian pasusoen so ana’ko, anengneng ko ya inatey la. Kanian sikatoy binidbir kon maong, et anengneng kon aliwan sikato may ana’ko.”
22 Balet inkuan na samay sakey nin bii: “Andi, anak ko yay mabilay, anak mo may inatey!” Balet inkuan na samay unonan bii: “Andi, anak mo may inatey, tan anak ko yay mabilay.” Oniay impanebatan da diad arapan na ari.
23 Diad kaunoran et imbaga na ari: “Say kuan to yay sakey, ‘Anak ko yay mabilay, tan anak mo may inatey!’ tan kuan to met yay sakey, ‘Andi, anak mo may inatey tan anak ko yay mabilay!’”
24 Et inkuan na ari: “Iyalaan yo ak na espada.” Et inyalaan da na espada so ari.
25 Insan inkuan na ari: “Pankadua yo yay mabilay ya ugaw, tan iter yoy kapaldua ed sayan bii tan say kapaldua et diad sayay sakey.”
26 Et tampol ya akikasi ed ari imay biin akan-anak ed mabilay ya ugaw, ta kaskasian toy anak to. Inkuan to: “Katawan ko, panangasim! Iter yo lad sikato yay mabilay ya ugaw! Agyo papateyen!” Balet inkuan na samay sakey ya bii: “Anggapod sikata so mangalad sikato! Sige, pankadua yo!”
27 Diad ontan et inkuan na ari: “Iter yo tay mabilay ya ugaw ed sayay unonan bii! Agyo papateyen, ta saya so ina to.”
28 Et nadngelan na interon Israel so impangukom na ari, tan nandinayew* ira ed sikato,+ ta anengneng dan walad sikato so karunongan na Dios a mangiter na hustisya.+
Paimanod leksab
^ Odino “Inala.”
^ Odino “melag ak nin ugaw.”
^ Literal, “tan agko amta so ompaway tan onloob.”
^ Odino posiblin, “benger.” Literal, “ambelat.”
^ Literal, “dakel ya agew.”
^ Odino “kamarerwa.”
^ Literal, “amin ya agew mo.”
^ Literal, “parukeyen ko ray agew mo.”
^ Odino “imoral a bibii.”
^ Literal, “pagew to.”
^ Literal, “tinmakot.”
