Unonan Samuel 4:1-34
4 Si Arin Solomon so nanuley ya ari ed interon Israel.+
2 Niraya so atagey ya opisyal to:* si Azarias ya anak nen Zadok+ so saserdote;
3 si Elihoref tan Ahias ya ananak nen Sisa so sekretaryo;+ si Jehosafat ya anak nen Ahilud so managrekord na saray nagagawa;+
4 si Benaias+ ya anak nen Jehoiada so pangulo na armada; si Zadok tan Abiatar+ so saserdote;
5 si Azarias ya anak nen Natan+ so mangidadaulo ed saray opisyal; si Zabud ya anak nen Natan et saserdote tan kaaro na ari;+
6 si Ahisar so mangidadaulo ed sankaabungan; tan si Adoniram+ ya anak nen Abda so mangidadaulo ed saramay tinawag a mankimey parad ari.+
7 Si Solomon et walaan na 12 opisyal diad interon Israel a mangitatarya na kakanen parad ari tan parad sankaabungan to. Balang sakey et walaan na responsabilidad a mangitaryay naakan diad loob na sakey bulan ed kada taon.+
8 Niraya so kangaranan da: say anak nen Hur, diad mapalandey a rehyon na Efraim;
9 say anak nen Deker, diad Makaz, Saalbim,+ Bet-semes, tan Elon-bet-hanan;
10 say anak nen Hesed, diad Arubot (sakop toy Soco tan say interon dalin na Hefer);
11 say anak nen Abinadab, diad kapukdolan na Dor (asawa toy Tafat ya anak nen Solomon);
12 si Baana ya anak nen Ahilud, diad Taanac, Megido,+ tan diad interon Bet-sean,+ ya abay na Zaretan diad leksab na Jezreel, manlapud Bet-sean anggad Abel-mehola tan anggad rehyon na Jokmeam;+
13 say anak nen Geber, diad Ramot-gilead+ (sakop to ray baryo nen Jair+ ya anak nen Manases a walad Gilead;+ ontan met so rehyon na Argob+ a walad Basan:+ 60 angkakabaleg a syudad ya apadiran tan walaan na saray balewet a gansa);
14 si Ahinadab ya anak nen Ido, diad Mahanaim;+
15 si Ahimaaz, diad Neftali (asawa toy Basemat ya anak met nen Solomon);
16 Si Baana ya anak nen Husai, diad Aser tan Bealot;
17 si Jehosafat ya anak nen Parua, diad Isacar;
18 si Simei+ ya anak nen Ela, diad Benjamin;+
19 si Geber ya anak nen Uri, diad dalin na Gilead,+ samay dalin nen Sihon+ ya ari na saray Amoreo tan say dalin nen Og+ ya ari na Basan. Wala met so sakey ya opisyal a mangidadaulod amin na sarayan opisyal ed dalin da.
20 Saray totood Juda tan Israel et singa karakel na saray buer ed gilig na dayat;+ sikaray mamangan, oniinum, tan manliliket.+
21 Si Solomon et nanuley ed amin a panarian manlapud Ilog*+ ya anggad dalin na saray Filisteo tan anggad ketegan na Ehipto. Angiter ira na buis tan nanlingkor irad si Solomon diad amin ya agew na bilay to.+
22 Say itataryan kakanen ed palasyo nen Solomon ya inagew-agew et 30 sukat a cor* na pinon arina tan 60 sukat a cor na arina,
23 10 pinataban baka, 20 pinastolan a baka, tan 100 a karnero, likud nid saray nanduruman klase na ulsa tan saray pinataban manok.
24 Ta sikatoy manuuley ed sayan biek na Ilog,*+ manlapud Tifsa ya anggad Gaza,+ pati ed amin ya arari ed sayan biek na Ilog; tan panliliketan toy kareenan diad amin a rehyon a walad paliber to.+
25 Saray totood Juda tan Israel et nanayam ed kaligenan, a balang sakey et walad silong na ubas to tan diad silong na kiew ton igos, manlapud Dan ya anggad Beer-sheba, diad amin ya agew nen Solomon.
26 Tan si Solomon et awalaan na 4,000* kuwadra na saray kabayon parad saray karwahe to tan 12,000 kabayo.*+
27 Sarayan opisyal so mansusuplay na naakan ed si Arin Solomon tan ed amin ya ondudungod lamisaan to. Kada sakey et walaan na responsabilidad a mansuplay diad turno ton bulan tan seseguroen ton anggapoy kulang.+
28 Mangaawit met ira na sebada tan dayami inerman a nakaukolan itan parad saray kabayo tan parad saray grupo na kabayo, unong a nipabtang ed kada sakey ed sikara.
29 Tan inikdan na Dios si Solomon na agnasukat a karunongan tan pakatebek tan puson walaay malaknab a pakatalos a singa saray buer diad gilig na dayat.+
30 Say karunongan nen Solomon et apalumbasan toy karunongan na amin a taga Bukig tan amin a karunongan ed Ehipto.+
31 Sikatoy mas marunong nen say siopaman a too, mas marunong nen si Ethan+ ya Ezrahita tan si Heman,+ Calcol,+ tan Darda ya ananak nen Mahol; sikatoy akabkabat ed amin a nasyon a walad kaliberliber.+
32 Sikatoy nanggawa* na 3,000 proverbio+ tan 1,005 kansion.+
33 Sarag ton ideskribe iray kakiewan, manlapud saray sedro ed Lebanon anggad saray tanaman a hisopo+ a walad padir; sarag to met ya ideskribe iray ayayep,+ saray manok,*+ saray onkukurong a bengatla,*+ tan saray sira.
34 Saray totoo ed amin a nasyon et linmad si Solomon pian ondengel ed karunongan to, anggan saray arari ed interon dalin ya akabalitad karunongan to.+
Paimanod leksab
^ Odino “so prinsipe to.”
^ Salanti, say Eufrates.
^ Say sakey a cor et 220 litro. Nengnengen so Apendise B14.
^ Salanti, say bandad sagur na Eufrates.
^ Oniay bilang a naromog ed pigaran manuskrito tan ed miparan salaysay. Diad arum a manuskrito et 40,000.
^ Odino “lalakin de-kabayoan.”
^ Odino “nansalita.”
^ Odino “saray ontitikyab a pinalsa.”
^ Nayarin kaiba iray reptilya tan insekto.
