Unonan Samuel 5:1-18
5 Sanen nadngelan nen Hiram ya ari na Tiro+ a nilanaan lay Solomon bilang ari a kasalat nen ama to, imbaki tod si Solomon iray lingkor to, ta nensaman ni et kaaro la nen David si Hiram.*+
2 Et oniay impaibaga nen Solomon ed si Hiram:+
3 “Amtam a si David ya amak et agnaabuloyan a mangipaalagey na abung parad ngaran nen Jehova a Dios to lapud wala ray migiguerra ed sikato manlapud amin a pasen anggad sikatoy impanalo nen Jehova ed saray kakabusol to.+
4 Balet natan et impanpainawa ak nen Jehova a Dios ko manlapud amin ya akapaliber a kalaban.+ Anggapoy onsusumpad siak tan anggapoy mauges a nagagawa.+
5 Kanian planok so mangipaalagey na abung parad ngaran nen Jehova a Dios ko, unong ya insipan nen Jehova ed si David ya amak, a kuan to: ‘Say anak mo a payurongen kod tronom a kasalat mo so mangipaalagey na abung parad ngaran ko.’+
6 Natan, iganggan mo komon iray totoom ya ibatangan da ak na saray sedro ed Lebanon.+ Saray lingkor ko et mankimey a kaiba iray lingkor mo, tan upaan ko ray lingkor mo unong ed ibagam a kantidad, ta amtam ya anggapod sikami so marunong a manbatang na kiew a singa saray Sidonio.”+
7 Sanen nadngelan nen Hiram iray imbaga nen Solomon, aliketan a maong tan inkuan to: “Narayew komon si Jehova ed sayan agew, ta inikdan toy David na marunong ya anak a manuley ed sayan dakdakel a totoo!”+
8 Kanian oniay impaibaga nen Hiram ed si Solomon: “Akasabid siak so mensahem. Gawaen koy amin a labay mo, a mangiter ak na saray troso na sedro tan enebro.+
9 Manlapud Lebanon et ilasur iratan ed dayat na saray lingkor ko, tan gawaen ko iratan a lamo ya ipadalan kod dayat pian niyakar kod pasen ya ibagam. Insan ko pabagbag diman, tan sika lay mangawit ed saratan. Say kasalat to et mangiter kay naakan a kerewen ko parad sankaabungan ko.”+
10 Kanian sinuplayan nen Hiram si Solomon na amin a pinirawat ton troso na sedro tan enebro.
11 Tan inikdan nen Solomon si Hiram na 20,000 sukat a cor* na trigo ya abasto na sankaabungan to tan 20 sukat a cor na maabig a klase na larak ya olibo. Saratan so iiter nen Solomon ed si Hiram a tinaon.+
12 Tan inikdan nen Jehova si Solomon na karunongan unong ya insipan To.+ Tan walay kareenan ed baetan nen Hiram tan si Solomon, tan nanggawa ra na sakey a paknaan.*
13 Si Arin Solomon et anawag na saray lalakin mankimey parad sikato diad interon Israel; tan 30,000 lalaki so atawag.+
14 Mansusublayan to ran ibabaki ed Lebanon, a 10,000 kada bulan. Sakey bulan irad Lebanon tan duay bulan irad abung da; tan si Adoniram+ so mangidadaulo ed sarayan tinawag a mankimey parad ari.
15 Si Solomon et walaan na 70,000 trabahador* tan 80,000 managtabas na bato+ diad kapalandeyan,+
16 tan walaan met na 3,300 ya opisyal a manlilingkor+ bilang kapatas na saray totoon komikimey.
17 Diad ganggan na ari et nantebag ira na saray angkakabaleg a baton mabmabli,+ pian iletneg so pundasyon+ na abung diad panamegley na saray tinabas a bato.+
18 Kanian say nantabas na saray bato et saray managpaalagey nen Solomon, saray managpaalagey nen Hiram, tan saray Gebalita,+ tan imparaan da ray troso tan saray bato pian nipaalagey so abung.
Paimanod leksab
^ Odino “aaroen nen Hiram si David.”
^ Say sakey a cor et 220 litro. Nengnengen so Apendise B14.
^ Odino “sipanan.”
^ Odino “managsakbat.”
