Unonan Samuel 6:1-38
6 Diad koma-480 taon kayari impaway na saray Israelita* ed dalin na Ehipto,+ diad komapat a taon na uley nen Solomon bilang ari ed Israel, diad bulan na Ziv*+ (say komaduan bulan), ginapoan ton ipaalagey so abung nen Jehova.*+
2 Say abung ya impaalagey nen Arin Solomon parad si Jehova et 60 kasiko* so karukey to, 20 kasiko so kalapar to, tan 30 kasiko so katagey to.+
3 Say balkonahe+ a walad arapan na templo* et 20 kasiko so karukey* to, a miparad kalapar na abung. No sukaten itan manlapud arap na abung et onabot ed samploran kasiko.
4 Say abung et inggawaan to na saray bintana, a pamelag iray hamba ra.+
5 Tan wala ray impaalagey to ed gilig, ya insuldong tod dingding na abung; akapaliber itan diad saray dingding na abung, diad saray dingding na templo* tan sankadaleman a kuarto,+ tan nanggawa na saray kuarto ed gilig.+
6 Say sankaabebaan a grado na saray kuarto ed gilig et limaran kasiko so kalapar to, say pegley a grado et anemiran kasiko so kalapar to, tan say komatlon grado et pitoran kasiko so kalapar to, ta saray dingding ed paliber na abung et kinutaban to kanian anggapoy akasurob ed saray dingding na satan.+
7 Say abung et impaalagey, a say inusar et saray tinebag a baton atabas la,+ kanian anggapoy nadngel a tanol na saray martilyo odino wasay odino arum nin kagawaan a balatyang legan ya ipapaalagey itan.
8 Say lolooban na sankaabebaan a grado na kuarto ed gilig et walad bandad abalaten* na abung,+ tan walay takayan a paonlad pegley a grado, tan manlapud pegley a grado a paonlad komatlon grado.
9 Et intultuloy ton impaalagey so abung tan asumpal to itan+ tan inikdan to na saray biga tan saray tablan sedro so atep na abung.+
10 Sikatoy nanggawa na saray kuarto ed gilig diad paliber na abung,+ a kada kuarto et limaran kasiko so katagey to, tan insuldong iratan ed abung diad panamegley na saray troso na sedro.
11 Kaleganan na saya, oniay mensahe nen Jehova ed si Solomon:
12 “No tumboken mo ray inter kon totontonen tan gawaen mo so unong ed saray panangukom ko tan sumpalen mon amin iray ganggan ko,+ tooren ko met ed sika so sipan ko ya imbagak ed kinen David ya amam, samay nipaakar ed sayan abung ya ipapaalagey mo,+
13 tan manayam ak ed limog na saray Israelita,+ tan agko paulyanan so Israel a totook.”+
14 Et intultuloy nen Solomon ya impaalagey so abung pian nasumpal to itan.
15 Ginawa to ray dingding ed loob na abung, ya angusar na saray tablan sedro. Say loob na abung et inusaran to na kiew, manlapud datal ya anggad saray pagsen na gubida, tan say datal na abung et pinalkapan to na saray tablan enebro.+
16 Tan ginawa to so beneg a parte na abung a walaay sukat a 20 kasiko tan inusaran to na saray tablan sedro manlapud datal ya anggad saray pagsen, tan diad loob na satan* et ginawa to so sankadaleman a kuarto,+ say Sankasantosan.+
17 Tan say templo*+—say parte na abung a walad bandad arapan—et 40 kasiko.
18 Say tablan sedro diad loob na abung et inukitan na saray tabyayong*+ a dekorasyon tan saray akabuskag a rosas.+ Puro kiew a sedro so inusar; anggapo so nanengneng a bato.
19 Tan imparaan to so sankadaleman a kuarto+ diad loob na abung a panginan toy kaban na sipanan nen Jehova.+
20 Say sankadaleman a kuarto et 20 kasiko so karukey to, 20 kasiko so kalapar to, tan 20 kasiko so katagey to;+ tan tinapewan to itan na puron balitok; say altar+ et inusaran to na kiew a sedro.
21 Say loob na abung et tinapewan nen Solomon na puron balitok,+ tan angiyan na kadenan balitok diad arap na sankadaleman a kuarto+ a tinapewan na balitok.
22 Say interon abung et tinapewan toy balitok ya anggad amin et abalkot na balitok; tinapewan to met na balitok so interon altar+ a walad abay na sankadaleman a kuarto.
23 Diad sankadaleman a kuarto et ginawa to so duaran kerubin+ ya inusaran toy kiew a saleng,* a kada sakey et samploran kasiko so katagey to.+
24 Say sakey a payak na kerubin et limaran kasiko, tan say sakey nin payak to et limaran kasiko. Manlapud nguro na sakey a payak to ya anggad nguro na sakey nin payak to et samploran kasiko.
25 Saray payak na komaduan kerubin et samploran kasiko met. Parehoy sukat tan itsura na duaran kerubin.
26 Samploran kasiko so katagey na samay sakey a kerubin, ontan met imay sakey.
27 Tan inyan to ray kerubin+ ed loob na sankadaleman a kuarto.* Akabuskag iray payak da kanian say payak na samay sakey a kerubin et inmabot ed dingding na abung tan say payak na samay sakey et inmabot ed biek a dingding, tan saray payak da et akabuskag diad pegley na abung, kanian nanabetan iray payak da.
28 Tan binalkot to na balitok iray kerubin.
29 Tan amin a dingding na abung diad paliber na saray dalem tan paway a kuarto* et inukitan to na saray kerubin,+ saray kiew a palma,+ tan saray akabuskag a rosas.+
30 Say datal na abung, diad dalem tan paway iran kuarto, et tinapewan to na balitok.
31 Tan say lolooban na sankadaleman a kuarto et inggawaan to na saray puerta ya inusaran toy kiew a saleng, saray lusek ed gilig, tan saray lusek na puerta, bilang kakaliman parte.*
32 Say duaran puerta et gawad kiew a saleng, tan inukitan to iratan na saray kerubin, saray kiew a palma, tan saray akabuskag a rosas, tan tinapewan to iratan na balitok; tan impitpit to ray balitok ed saray kerubin tan saray kiew a palma.
33 Diad lolooban na templo* et ontan so impanggawa tod saray lusek na puertan saleng, a saya et kakapat a parte.*
34 Tan sikatoy nanggawa na duaran puerta ya inusaran toy kiew ya enebro. Samay sakey a puerta et walaan na duaran kapot a napeyes, tan ontan met imay sakey nin puerta.+
35 Sikatoy angiyukit na saray kerubin, saray kiew a palma, tan saray akabuskag a rosas, tan tinapewan to iratan na balitok.
36 Ginawa to ray padir ed loob a sular,+ ya impantatapewan toy taloran dasig na tinabas a bato tan inikdan to met na sakey dasig na saray kiew a sedro.+
37 Diad komapat a taon, diad bulan na Ziv,* niletneg so pundasyon na abung nen Jehova;+
38 tan diad koma-11 a taon, diad bulan na Bul* (say komawalon bulan), asumpal so abung unong ed amin a detalye tan plano.+ Kanian pitoy taon ton impaalagey itan.
Paimanod leksab
^ Nengnengen so Apendise B8.
^ Nengnengen so Apendise B15.
^ Literal, “lalakin ananak nen Israel.”
^ Say sakey a kasiko et 44.5 sentimetro (17.5 pulgada). Nengnengen so Apendise B14.
^ Literal, “templo na abung.”
^ Odino “kalapar.”
^ Say natutukoy dia et say Masanton Pasen.
^ Odino “nikawanan.”
^ Salanti, diad loob na abung.
^ Salanti, say Masanton Pasen, a walad arap na Sankasantosan a Pasen.
^ Odino “aksiw.”
^ Literal, “kiew a larak,” nayarin say saleng ya Aleppo.
^ Salanti, say Sankasantosan a Pasen.
^ Literal, “loob tan paway.”
^ Nayarin manutukoy ed inkagaway hamba na puerta odino ed sukat na saray puerta.
^ Say natutukoy dia et say Masanton Pasen.
^ Nayarin manutukoy ed inkagaway hamba na puerta odino ed sukat na saray puerta.
^ Nengnengen so Apendise B15.
^ Nengnengen so Apendise B15.
