Unonan Samuel 9:1-28
9 Sanen asumpal nen Solomon ya impaalagey so abung nen Jehova, say abung* na ari,+ tan amin a pinirawat nen Solomon a gawaen,+
2 nampanengneng lamet si Jehova ed si Solomon a singa nen nampanengneng ed sikato diad Gibeon.+
3 Inkuan nen Jehova ed sikato: “Nadngel koy pikakasim tan say ikekerew moy panangasi ed siak. Pinasantok iyan abung ya impaalagey mo, a pansiansiaen ko dia a permanente so ngaran ko,+ tan lawas ya akateen dia iray matak tan say pusok.+
4 Tan no manakar ka ed arapan ko a singa ed impanakar nen David ya amam,+ a walaan na matoor a puso*+ tan kaptekan,+ diad pangunor mo ed amin ya ingganggan kod sika,+ tan no tumboken mo ray inter kon totontonen tan saray panangukom ko,+
5 iletneg ko so trono na panarian mo ed Israel ya anggad angga, unong ya insipan kod si David ya amam, a kuan ko, ‘Agbalot naandian so pamilyam na anak a laki ya onyurong ed trono na Israel.’+
6 Balet no sikayo tan saray ananak yo et benegan yo ak tan agyo unoren iray ganggan tan bilin ya inter kod sikayo, tan manlingkor kayo ed arum a dirios tan ondakmomo kayod sikara,+
7 paandien koy Israel ed dalin ya inter kod sikara,+ tan agko lan balot nengnengen so abung a pinasantok parad ngaran ko,+ tan say Israel et magmaliw a pantotongtongan* tan balbalawen na amin a totoo.+
8 Tan sayan abung et magmaliw a bunton na saray geray.+ Amin ya ondalan ditan et onnengneng tan mankelaw tan manngisiw, tan ibaga ra, ‘Akin et oniay ginawa nen Jehova ed sayan dalin tan ed sayan abung?’+
9 Insan ibaga ra, ‘Lapud tinaynan day Jehova a Dios da ya angipaway ed saray inmuunan atateng da diad dalin na Ehipto, tan dinmakmomo tan nanlingkor ira ed arum a dirios. Saya so rason ya indapod sikara nen Jehova irayan amin a desyang.’”+
10 Sanen manampot lay 20 taon ya impangipaalagey nen Solomon ed duaran abung, say abung nen Jehova tan say abung* na ari,+
11 sinuplayan nen Hiram+ ya ari na Tiro si Solomon na saray troso na sedro tan enebro tan dakdakel a balitok unong a pinirawat to,+ tan si Arin Solomon et inikdan toy Hiram na 20 syudad diad dalin na Galilea.
12 Kanian inmalis si Hiram ed Tiro pian nengnengen to ray syudad ya inter nen Solomon, balet agto iratan agustoan.*
13 Inkuan to: “Anto irayay syudad ya inter mod siak, agik?” Kanian tinawag iraya a Dalin na Cabul* ya anggad sayan agew.
14 Diad saman et angipawit si Hiram ed ari na 120 talento* a balitok.+
15 Wala ray impatawag nen Arin Solomon a mankimey parad sikato+ pian ipaalagey so abung nen Jehova,+ say abung* to, say Pukdol,*+ say padir na Jerusalem, Hazor,+ Megido,+ tan Gezer.+
16 (Say Faraon ya ari na Ehipto et tinmatdang tan sinakop toy Gezer tan pinoolan to itan, tan pinapatey to met iray Canaanita+ a manaayam ed syudad. Et inter to itan bilang regalon panamatanir* ed anak to+ ya asawa nen Solomon.)
17 Impaalagey* nen Solomon so Gezer, Abeban Bet-horon,+
18 Baalat,+ tan say Tamar diad kalawakan, a walad dalin to,
19 pati say amin a syudad nen Solomon a panagtiponay abasto, saray syudad na karwahe,+ saray syudad na lalakin de-kabayoan, tan antokaman a pinirawat nen Solomon ya ipaalagey diad Jerusalem, diad Lebanon, tan diad amin a dalin a nasasakopan to.
20 Tan nipaakar ed amin a totoon akeraan ed saray Amoreo, Heteo, Perizeo, Heveo, tan Jebuseo,+ ya agkabiangan na totoo na Israel,+
21 saray kailalakan da ya atilak—saramay ag-aderal na saray Israelita—et puersaan ya impankimey nen Solomon bilang ariripen anggad sayan agew.+
22 Balet anggapod saray Israelita so ginawa nen Solomon ya aripen,+ ta sikaray sundalo, lingkor, prinsipe, tan ayudante to, tan papangulo na saray managkarwahe tan de-kabayoan a sundalo to.
23 Walay 550 papangulo na saray opisyal a mangidadaulo ed kimey nen Solomon, saray kapatas na saray totoon mankikimey.+
24 Balet say anak na Faraon+ et inmalis ed Syudad nen David+ tan nanayam ed dilin abung to ya impaalagey nen Solomon parad sikato; insan impaalagey nen Solomon so Pukdol.*+
25 Si Solomon et mamitlod sakey taon+ a mangiyaapay na saray bagat a popoolan tan saray bagat a pandurungoan diad altar a ginawa to parad si Jehova,+ tan manpapaasewek met na bagat diad altar, a walad arapan na abung nen Jehova, kanian asumpal to so abung.+
26 Si Arin Solomon et nanggawa met na grupo na saray barko diad Ezion-geber,+ a walad abay na Elot, diad gilig na Ambalangan Dayat diad dalin na Edom.+
27 Imbaki nen Hiram iray lingkor to ya akalugan ed grupo na saray barko,+ saray marino a marunong ed dayat, pian ibaan iray lingkor nen Solomon.
28 Linma rad Ofir+ tan angala ra na 420 talenton balitok tan inawit dad si Arin Solomon.
Paimanod leksab
^ Odino “palasyo.”
^ Odino “integridad.”
^ Literal, “sakey a proverbio.”
^ Odino “palasyo.”
^ Literal, “aliwan duga iratan ed saray mata to.”
^ Odino posiblin, “say Dalin ya Andi-kakanaan.”
^ Say sakey a talento et 34.2 kilo. Nengnengen so Apendise B14.
^ Odino “Milo.” Hebreon salita a mankabaliksay “tambak.”
^ Odino “palasyo.”
^ Odino “regalo ed kasal; dasel.”
^ Odino “Pinabiskeg.”
^ Odino “Milo.” Hebreon salita a mankabaliksay “tambak.”
