Unonan Samuel 10:1-14
-
Say impatey nen Saul tan saray ananak to (1-14)
10 Natan et akilaban iray Filisteo ed Israel. Tan batik iray lalaki na Israel pian takasan iray Filisteo, tan amayamay so inatey diad Palandey Gilboa.+
2 Nabotan na saray Filisteo si Saul tan saray ananak to; tan pinatey na saray Filisteo iray ananak nen Saul a si Jonatan, Abinadab, tan Malki-sua.+
3 Nagmaliw a grabe so pilalaban ed si Saul, tan sanen sikatoy anengneng na saray managpana, sinugatan da.+
4 Kanian inkuan nen Saul ed manag-awit na armas to: “Uyos moy espadam tan iduyok mod siak, pian agla onasingger irayan ag-asegat a lalaki tan duksaen*+ da ak.” Balet ag-itan labay a gawaen na manag-awit na armas to, ta natatakot a maong. Kanian inala nen Saul so espada tan tinakbaan to itan.+
5 Sanen anengneng na samay manag-awit na armas ya inatey lay Saul, tinakbaan to met so dilin espada to tan inatey.
6 Kanian si Saul tan say taloran anak ton lalaki et inatey, tan say amin a kabiangan na sankaabungan to et nambabansag ya inatey.+
7 Sanen saray totoo na Israel a walad lawak* et anengneng dan batik lay amin a sundalo tan inatey lay Saul tan saray ananak to, tinaynan da ray syudad da tan batik ira; insan sinmabi ray Filisteo tan nanayam ira ditan.
8 Diad tinmumbok ya agew, sanen linma ray Filisteo pian alaen day kaykayarian na saray inaatey, anengneng day Saul tan saray ananak to ya inatey diad Palandey Gilboa.+
9 Kanian sikatoy nilakseban da tan pinutot day ulo to tan inala ray armas to, tan impaibaga rad interon dalin na saray Filisteo ya ikayat da iyan balita diad saray idolo ra+ tan saray totoo.
10 Insan inyan day armas to ed abung* na dios da tan insabit day ulo to diad abung nen Dagon.+
11 Sanen nadngelan na saray amin a walad Jabes+ ed Gilead so amin a ginawa na saray Filisteo ed si Saul,+
12 linma so amin a sundalo tan inala ray bangkay nen Saul tan saray bangkay na ananak to. Inyakar da iratan ed Jabes tan inkotkot da ray pukel da ed silong na baleg a kiew diad Jabes,+ tan pitoy agew iran nanayunal.
13 Kanian si Saul et inatey lapud agnanmatoor ed si Jehova ta agto inunor so salita nen Jehova,+ tan lapud tinmupleg ed sakey ya espiritista+
14 imbes ya ontupleg ed si Jehova. Kanian sikatoy pinatey To tan say inkaari et inter Tod si David ya anak nen Jesse.+
