Unonan Samuel 11:1-47
11 Asabi panaon, amin ya Israelita et nantitipon ed arapan nen David diad Hebron,+ tan inkuan da: “Sikami so pukel tan laman mo.*+
2 Diad apalabas iran panaon, sanen si Saul ni so ari, sika lay mangidadaulo ed saray pilalaban na Israel.*+ Tan inkuan ed sika nen Jehova a Dios mo: ‘Sikay manpastol ed Israel a totook, tan magmaliw kan lider na Israel a totook.’”+
3 Kanian amin a mamatatken na Israel et linmad ari diad Hebron, tan akisipanan si David ed sikara diad Hebron ed arapan nen Jehova. Insan nilanaan day David bilang ari ed Israel,+ unong ed imbaga nen Jehova diad panamegley nen Samuel.+
4 Ag-abayag, si David tan say interon Israel et linmad Jerusalem, salanti, diad Jebus,+ say dalin a panaayaman na saray Jebuseo.+
5 Kinantiawan na saray manaayam ed Jebus si David, ya inkuan da: “Agkan balot makaloob dia!”+ Balet sinakop nen David so apadiran a syudad na Sion,+ a tatawagen la natan a Syudad nen David.+
6 Kanian inkuan nen David: “Siopaman ya unonan onataki ed saray Jebuseo et magmaliw a pangulo* tan prinsipe.” Et si Joab+ ya anak nen Zeruia so unonan inmataki, tan sikatoy nagmaliw a pangulo.
7 Insan nanayam si David ed saman ya apadiran a syudad. Kanian tinawag da itan a Syudad nen David.
8 Sikatoy nampaalagey diad kaliberliber na syudad, manlapud Pukdol* ya anggad saray pasen ed kaliberliber na satan, tan si Joab so angapiger ed arum nin kabiangan na syudad.
9 Kanian nantultuloy a binmiskeg si David,+ tan walad sikato si Jehova na saray armada.
10 Et niraya so pangulo na saray mabibiskeg a sundalo nen David ya angiter ed sikato na baleg a suporta ed inkaari to, a kaibay amin ya Israelita, pian sikatoy magmaliw ya ari unong ed salita nen Jehova nipaakar ed Israel.+
11 Niay listaan na saray mabibiskeg a sundalo nen David: si Jasobeam+ ya anak na sakey a Hacmonita, say pangulo na talora.+ Diad aminsan labat ya impilaban to et masulok a 300 so apatey to ed panamegley na gayang to.+
12 Say ontumbok et si Eleazar+ ya anak nen Dodo ya Ahohita.+ Sikatoy sakey ed saray taloran mabibiskeg a sundalo.
13 Sikato may kaiba nen David diad Pas-damim,+ a nantitiponan na saray Filisteo pian miguerra. Et walay sakey ya uma a napnoy sebada, tan saray totoo ditan et binmatik lapud saray Filisteo.
14 Balet sikatoy ag-inmalis ed pegley na uma tan inyagel to itan tan pinapatey to ray Filisteo, kanian inter nen Jehova so baleg a pananalo.*+
15 Talora ed saray 30 papangulo so linmasur ed kabatoan pian onlad si David diad ungib na Adulam,+ legan a mankakampo so armada na Filisteo diad Lawak* na Refaim.+
16 Walad panag-amotan si David ed saman, tan diad Betlehem et wala ray akapueston sundalo na saray Filisteo.
17 Diad saman et imbalikas nen David so pampirawat to: “Makainum ak komoy danum ed bobon a walad abay na puerta na Betlehem!”+
18 Kanian pinilit na sarayan talo so makaloob ed kampo na saray Filisteo tan angala ray danum ed bobon a walad abay na puerta na Betlehem tan inawit dad si David; balet ag-itan ininum nen David noagta inyibung to parad si Jehova.
19 Inkuan to: “Agkon balot iya nagawaan unong ed panmoria na Dios ko! Inumen ko kasi so dala na sarayan lalaki ya angipeligroy bilay* da?+ Ta sanen inala da ’ya et nipeligroy bilay* da.” Kanian agto itan ininum. Onia ray ginawa na taloran mabibiskeg a sundalo.
20 Si Abisai+ ya agi nen Joab+ et nagmaliw a pangulo na sananey nin talora; diad panamegley na gayang to et masulok a 300 so apatey to, tan sikatoy akabkabat met a singa samay talora.+
21 Diad sananey nin talora, sikatoy mas bantog nen samay duara, tan sikatoy pangulo ra; ingen ta agto akapipara ed rangko na samay inmunan talora.
22 Si Benaias+ ya anak nen Jehoiada et sakey a makpel a laki, a dakdakel so agawaan to diad Kabzeel.+ Pinatey toy duaran anak a lalaki nen Ariel a taga Moab, tan linmasur ed bobon diad agew ya onuuran na niebe tan pinatey toy sakey a leon.+
23 Pinatey to met so sakey ya Ehipsio a nikadkadumay kabaleg to—limaran kasiko* so katagey to.+ Anggano samay Ehipsio et akabemben na gayang a singano panagpotipotan na saray managlagay abel,+ sikatoy nilabanan to ed panamegley na baston tan sinamsam toy gayang ed lima na Ehipsio tan satan a mismo so impamatey tod sikato.+
24 Onia ray ginawa nen Benaias ya anak nen Jehoiada, tan sikatoy akabkabat a singa samay taloran mabibiskeg a sundalo.
25 Anggano sikatoy mas bantog ed saray talomplo, agto akapipara ed rangko na samay talora.+ Balet sikatoy tinuro nen David bilang manunaan ed saray guardia to.
26 Saray mabibiskeg a sundalo na saray puersa militar et sikara di Asael+ ya agi nen Joab, si Elhanan ya anak nen Dodo a taga Betlehem,+
27 si Samot a Harorita, si Helez a Pelonita,
28 si Ira+ ya anak nen Ikes a Tekoita, si Abi-ezer+ ya Anatotita,
29 si Sibecai+ a Husatita, si Ilai ya Ahohita,
30 si Maharai+ a Netofatita, si Heled+ ya anak nen Baanah a Netofatita,
31 si Itai ya anak nen Ribai a taga Gibea tan sakey a Benjaminita,+ si Benaias a Piratonita,
32 si Hurai a nanlapud saray kulos* na Gaas,+ si Abiel ya Arbatita,
33 si Azmavet a Baharumita, si Eliaba a Saalbonita,
34 saray ananak nen Hasem a Gizonita, si Jonatan ya anak nen Sage a Hararita,
35 si Ahiam ya anak nen Sacar a Hararita, si Elifal ya anak nen Ur,
36 si Hefer a Mekeratita, si Ahias a Pelonita,
37 si Hezro a Carmelita, si Naarai ya anak nen Ezbai,
38 si Joel ya agi nen Natan, si Mibhar ya anak nen Hagri,
39 si Zelek ya Ammonita, si Naharai a Berotita, say manag-awit na armas nen Joab ya anak nen Zeruia;
40 si Ira ya Itrita, si Gareb ya Itrita,
41 si Urias+ a Heteo, si Zabad ya anak nen Alai,
42 si Adina ya anak nen Siza a Rubenita, a pangulo na saray Rubenita, tan 30 a kaiba to;
43 si Hanan ya anak nen Maaca, si Josafat a Mitnita,
44 si Uzia ya Asteratita, si Sama tan Jeiel ya ananak nen Hotam ya Aroerita;
45 si Jediael ya anak nen Simri, tan say agi ton si Joha a Tizita;
46 si Eliel a Mahavita, si Jeribai tan Josavias ya ananak nen Elnaam, tan si Itma a Moabita;
47 si Eliel, Obed, tan Jaasiel a Mezobaita.
Paimanod leksab
^ Odino “so kakanayon mo.”
^ Literal, “mangipapaway tan mangiloloob ed Israel.”
^ Literal, “ya ulo.”
^ Odino “Milo.” Hebreon salita a mankabaliksay “tambak.”
^ Odino “kililiktar.”
^ Odino “Abeban Patar.”
^ Odino “kamarerwa.”
^ Odino “kamarerwa.”
^ Manga 2.23 metro (7.3 piye) so katagey to. Nengnengen so Apendise B14.
