Unonan Samuel 12:1-40
-
Saray sinmuportad inkaari nen David (1-40)
12 Niraya so lalakin linmad si David diad Ziklag+ legan a sikatoy agbulos a makaalis-alis lapud si Saul+ ya anak nen Kis, tan kaiba ira ed saray mabibiskeg a sundalo a sinmuportad sikato diad pilalaban.+
2 Walay armas dan pana, tan sarag dan usaren so kawanan tan kawigin lima ra+ diad panagpalsot+ odino panagpana. Agagi ira nen Saul, a nanlapud tribu nen Benjamin.+
3 Say pangulo et si Ahiezer, tan kaibay Joas, a saraya et ananak nen Semaa a Gibeatita;+ si Jeziel tan Pelet ya ananak nen Azmavet,+ si Beraca, si Jehu ya Anatotita,
4 si Ismaias a Gibeonita,+ a mabiskeg a sundalo tan kaibad talomplo+ tan mangidadaulod talomplo; kaiba met si Jeremias, Jahaziel, Johanan, Jozabad a Gederatita,
5 Eluzai, Jerimot, Bealias, Semarias, Sefatias a Harifita,
6 Elkana, Isias, Azarel, Joezer, tan Jasobeam, saray Korahita;+
7 tan si Joela tan Zebadias ya ananak nen Jeroham a taga Gedor.
8 Arum ed saray Gadita et dinmapag ed si David tan linma rad sikato diad panag-amotan dimad kalawakan;+ saraya et mabibiskeg a sundalo, nipasal ed guerra, naynay ya akaparaan a walaay angkakabaleg a panagsamper tan gayang, say lupa ra et singa lupa na leon tan mapmaples ira a singa ulsan gazela diad kapalandeyan.
9 Si Ezer so pangulo, si Obadias so komadua, si Eliab so komatlo,
10 si Mismana so komapat, si Jeremias so komalima,
11 si Atai so komanem, si Eliel so komapito,
12 si Johanan so komawalo, si Elzabad so komasiam,
13 si Jeremias so komasamplo, tan si Macbanai so koma-labinsakey.
14 Saraya et Gadita,+ a papangulo na armada. Say sankakapuyan da et sarasarag toy 100, tan say sankabiskegan da et sarasarag toy 1,000.+
15 Saraya may lalakin binmaliw ed Jordan diad primeron bulan sanen linmeppua itan, tan pinataynan day amin a manaayam ed saray abeban pasen, a paarap ed bukig tan ed sagur.
16 Arum a lalaki na Benjamin tan Juda et linmad si David diad panag-amotan to.+
17 Et inabet ira nen David tan inkuan tod sikara: “No parad kareenan so inyakar yod siak pian tulongan yo ak, mikasakey ak ed sikayo. Balet no say rason et pian iyawat yo ak ed saray kalaban ko anta anggapoy ginawak a mauges, nanengneng komon itan na Dios na inmuunan atateng tayo tan sikatoy mangukom.”+
18 Diad saman, say espiritu na Dios et niwala* ed si Amasai,+ a pangulo na talomplo, tan inkuan to:
“Kayarian mo kami, O David, tan wala kamid dapag mo, O anak nen Jesse.+
Kareenan, on, niwala komon so kareenan ed sika tan ed samay ontutulong ed sika,Ta tutulongan ka na Dios mo.”+
Kanian inawat ira nen David tan tinuro to ra a kaiba ed saray papangulo na armada to.
19 Arum ed tribu nen Manases et tinmaynan tan dinmapag ed si David sanen sikatoy akila ed saray Filisteo pian milaban ed si Saul; balet agto atulongan iray Filisteo, ta kayarin nantotongtong iray manuley na saray Filisteo,+ sikatoy pinataynan da, a kuan da: “Seguradon ontaynan tan milad katawan ton Saul, tan bilay tayoy kasalat.”+
20 Sanen linmad Ziklag,+ niraya so dinmapag ed sikato a nanlapud tribu nen Manases: si Adnah, Jozabad, Jediael, Miguel, Jozabad, Elihu, tan Ziletai, saray papangulo na nilibo ed tribu nen Manases.+
21 Tinulongan day David a milaban ed grupo na saray tulisan, ta amin da et mabibiskeg tan makpel a lalaki,+ tan nagmaliw iran pangulo na armada.
22 Inagew-agew ya onsasabi iray totoo pian tulongan day David,+ anggad nagmaliw iran baleg a kampo a singa kampo na Dios.+
23 Nia so bilang na saray mangidadaulo ed saramay akaparaan ed guerra a linmad si David diad Hebron+ pian niiter ed sikato so inkaari nen Saul unong ya ingganggan nen Jehova.+
24 Saray lalaki ed Juda a de-awit na angkakabaleg a panagsamper tan gayang et 6,800, a saraya et akaparaan ed guerra.
25 Diad saray Simeonita, saray mabibiskeg tan makpel a lalaki ed armada et 7,100.
26 Diad saray Levita et 4,600.
27 Si Jehoiada+ so mangidadaulo ed saray anak a lalaki nen Aaron,+ tan 3,700 so kaiba to,
28 pati si Zadok+ a mabiskeg tan makpel a kalangweran a laki, a kaibay 22 papangulo a nanlapud pamilya na ama to.
29 Diad saray Benjaminita, ya agagi nen Saul,+ et walay 3,000, a dakel ed sikara so datin manbabantay ed sankaabungan nen Saul.
30 Diad saray Efraimita et walay 20,800 a mabibiskeg tan makpel a lalaki a bantog diad saray pamilya na kaamaan da.
31 Diad kapaldua na tribu nen Manases et walay 18,000 ya aturo unong ed ngaran da ya onla pian gawaen dan ari si David.
32 Diad tribu nen Isacar, a makakatalos ed saray panaon tan amta ra no antoy nepeg a gawaen na Israel, et walay 200 ed saray papangulo ra, tan amin ya agagi ra et walad pakauley da.
33 Diad tribu nen Zebulon et walay 50,000 a nayarin mansundalo, akaparaan parad guerra tan de-awit na amin a klase na armas, tan amin et akikasakey ed si David a walaay sigpot a katooran.*
34 Diad tribu nen Neftali et walay 1,000 papangulo, tan say kaiba ra et 37,000 a de-awit na angkakabaleg a panagsamper tan gayang.
35 Diad saray Danita, saray akaparaan parad guerra et 28,600.
36 Tan diad tribu nen Aser, saray nayarin mansundalo ya akaparaan parad guerra et 40,000.
37 Manlapud nibaliw na Jordan,+ diad saray Rubenita, Gadita, tan kapaldua na tribu nen Manases et walay 120,000 sundalo a walaay amin a klase na armas parad guerra.
38 Amin iraya et sundalo a nantitipon parad guerra; linma rad Hebron a determinado iran maong a gawaen ya ari si David ed interon Israel, tan say amin ya akeraan ed Israel et nankakasakey* pian gawaen ya ari si David.+
39 Tan taloy agew iran nansiansia diman a kaiba nen David, ya angan tan inminum ira, ta imparaanan ira na saray agagi ra.
40 Ontan met, saramay asingger ed sikara, tan anggan saramay nanlapu nid dalin na Isacar, Zebulon, tan Neftali, et angawit na saray kakanen ya inlulugan dad saray asno, kamelyo, mula,* tan baka—dakdakel a naakan a gawad arina, bibingkan igos tan pasas, alak, larak, tan saray baka tan karnero, ta walay panliliket ed Israel.
Paimanod leksab
^ Literal, “nisulong.”
^ Odino “amin iramay akikasakey ed si David et aliwan doble puso ra.”
^ Literal, “et walaan na saksakey a puso.”
^ Say Hebreon salita et manutukoy ed nanlaok a poli na asno tan kabayo.
