Unonan Samuel 13:1-14
13 Kinmonsulta si David ed saray papangulo na nilibo tan nilasus, tan ed kada lider.+
2 Insan inkuan tod interon kongregasyon na Israel: “No labay yo tan no abobonan nen Jehova a Dios tayo, paibaga tayo ed saray agagi tayon atilak ed amin a rehyon na Israel, ontan met ed saray saserdote tan Levita a walad saray syudad da+ a walaan na saray panagpastolan, ya onla ra dia tan mitipon ed sikatayo.
3 Tan ipawil tayo dia so Kaban+ na Dios tayo.” Ta agda itan inasikaso diad saray agew nen Saul.+
4 Inmabobon so interon kongregasyon ed satan, ta ipapasen na amin a totoo a duga itan.
5 Kanian tinipon nen David so amin ya Israelita, manlapud ilog* na Ehipto ya anggad Lebo-Hamat,*+ pian alaen ed Kiriat-jearim so Kaban na tuan Dios.+
6 Si David tan say interon Israel et tinmatdang ed Baala,+ diad Kiriat-jearim, a walad Juda, pian alaen diman so Kaban na tuan Dios, si Jehova, ya akayurong ed trono diad tagey* na saray kerubin,+ a ditan ontatawag iray totoo ed ngaran to.
7 Balet inlugan day Kaban na tuan Dios ed balon kariton+ tan inyalis da manlapud abung nen Abinadab, tan si Uzah tan Ahio so mangipapaguyor ed kariton.+
8 Tan diad arapan na tuan Dios et amaspasyan nanselebra si David tan say interon Israel, a walay pankakansion, tan pantotogtog na saray arpa, arum nin nandeles ya instrumento, tamburin,+ piangpiang,+ tan trumpeta.+
9 Balet kasabi rad panag-ilikan nen Kidon, inyunat nen Uzah so lima to tan binembenan toy Kaban, ta naplag lawari itan lapud saray baka.
10 Diad saman et dinmalang so sanok nen Jehova ed si Uzah, tan kinabil To lapud inyunat toy lima to tan binembenan toy Kaban,+ kanian inatey diman diad arapan na Dios.+
11 Balet akapasnok* si David lapud biglan insanok nen Jehova ed si Uzah; tan satan a pasen et tinawag a Perez-uzah* anggad sayan agew.
12 Kanian tinmakot si David ed tuan Dios ed saman ya agew tan inkuan to: “Panon kon niyakar ed ayaman ko so Kaban na tuan Dios?”+
13 Et ag-inawit nen David so Kaban diad ayaman to, diad Syudad nen David, noagta impaiyakar to itan ed abung nen Obed-edom a Gitita.
14 Say Kaban na tuan Dios et walad sankaabungan nen Obed-edom tan nansiansiad abung to a taloy bulan, tan benendisyonan nen Jehova so sankaabungan nen Obed-edom tan say amin a walad sikato.+
Paimanod leksab
^ Odino “manlapud Sihor.”
^ Odino “lolooban na Hamat.”
^ Odino posiblin, “pegley.”
^ Odino “naingongotan.”
^ Kabaliksan toy “Dinmalang so Sanok ed si Uzah.”
