Unonan Samuel 15:1-29
15 Et intultuloy nen David so mangipaalagey na saray abung to diad Syudad nen David, tan angiparaan na pasen parad Kaban na tuan Dios tan nampaalagey na tolda parad satan.+
2 Diad saman et inkuan nen David: “Anggapoy manepeg a mangawit ed Kaban na tuan Dios noag saray Levita, ta sikara so pinili nen Jehova a mangawit ed Kaban nen Jehova tan manlingkor ed sikato lawas.”+
3 Insan tinipon nen David so interon Israel diad Jerusalem pian itatdang so Kaban nen Jehova diad pasen ya imparaan to parad satan.+
4 Tinipon nen David iray kailalakan nen Aaron+ tan saray Levita:+
5 diad saray Kohatita, si Uriel a pangulo tan 120 ed saray agagi to;
6 diad saray Merarita, si Asaias+ a pangulo tan 220 ed saray agagi to;
7 diad saray Gersomita, si Joel+ a pangulo tan 130 ed saray agagi to;
8 diad saray kailalakan nen Elizafan,+ si Semaias a pangulo tan 200 ed saray agagi to;
9 diad saray kailalakan nen Hebron, si Eliel a pangulo tan 80 ed saray agagi to;
10 diad saray kailalakan nen Uziel,+ si Aminadab a pangulo tan 112 ed saray agagi to.
11 Ontan met, tinawag nen David iray saserdote a si Zadok+ tan si Abiatar,+ tan saray Levita a sikara di Uriel, Asaias, Joel, Semaias, Eliel, tan Aminadab,
12 tan inkuan tod sikara: “Sikayo ray lider na saray pamilya na saray Levita. Pasantos yoy inkasikayo, sikayo tan saray agagi yo, tan itatdang yo so Kaban nen Jehova a Dios na Israel diad pasen ya imparaan ko parad satan.
13 Lapud agyo inawit so kaban nen inmuna,+ dinmalang so sanok nen Jehova a Dios ed sikatayo,+ ta agtayo tinumbok so dugan paraan.”+
14 Kanian saray saserdote tan saray Levita et pinasantos day inkasikara pian itatdang so Kaban nen Jehova a Dios na Israel.
15 Diad saman et sinakbat na saray Levita so Kaban na tuan Dios diad saray panagsakbatan+ na satan, unong ed salita nen Jehova ya ingganggan nen Moises.
16 Insan imbaga nen David ed papangulo na saray Levita a turoen da ray agagi ran komakansion a mangansion a malikeliket, a binansagan na saray instrumento: saray nandeles ya instrumento, arpa,+ tan piangpiang.+
17 Kanian saray Levita et tinuro ray Heman+ ya anak nen Joel, tan diad saray agagi to et si Asaf+ ya anak nen Berekias, tan diad saray agagi ran Merarita et si Etan+ ya anak nen Kusaias.
18 Kaiba da ray agagi ra manlapud komaduan grupo+ a sikara di Zacarias, Ben, Jaaziel, Semiramot, Jehiel, Uni, Eliab, Benaias, Maasias, Matitias, Elifelehu, tan Miknias tan saray bantay na puerta a si Obed-edom tan Jeiel.
19 Saray komakansion a si Heman,+ Asaf,+ tan Etan so mamaknol ed saray gansan piangpiang;+
20 tan si Zacarias, Aziel, Semiramot, Jehiel, Uni, Eliab, Maasias, tan Benaias so nantogtog na saray nandeles ya instrumento ya intono ed Alamoth;*+
21 tan si Matitias,+ Elifelehu, Miknias, Obed-edom, Jeiel, tan Azazias so nantogtog na saray arpa ya intono ed Sheminith,*+ pian sikaray onakton direktor.
22 Si Kenanias+ a pangulo na saray Levita so angidaulo ed panangiyalis, ta sikatoy eksperto,
23 tan si Berekias tan Elkana so bantay na puerta parad Kaban.
24 Saray saserdote a si Sebanias, Josafat, Netanel, Amasai, Zacarias, Benaias, tan Eliezer so maksil a nampaknol na saray trumpeta diad arap na Kaban na tuan Dios,+ tan si Obed-edom tan Jehias so bantay met na puerta parad Kaban.
25 Et si David tan saray mamatatken na Israel tan saray pangulo na nilibo et nanakar pian walay panliliket ya itatdang so kaban na sipanan nen Jehova+ manlapud abung nen Obed-edom.+
26 Lapud tinulongan na tuan Dios iray Levita ya angawit ed kaban na sipanan nen Jehova, angibagat ira na pitoran kilaw a kalakian a baka tan pitoran kalakian a karnero.+
27 Si David et akasulong na andiay-taklay a latop a gawad maabig a klase na tela, ontan met iray amin a Levita a mangaawit ed Kaban, saray komakansion, tan si Kenanias a pangulo na panangiyalis tan saray komakansion; si David et akasulong met na linen ya efod.+
28 Legan ya itatatdang na amin ya Israelita so kaban na sipanan nen Jehova, sikaray maneyag ed liket,+ a papaknolen da ray tambuyog, trumpeta,+ tan piangpiang, tan papatogtogen dan maksil iray nandeles ya instrumento tan arpa.+
29 Balet sanen akasabi lay kaban na sipanan nen Jehova diad Syudad nen David,+ tinmandag ed bintana si Mical+ ya anak nen Saul tan anengneng toy Arin David a manlukso-lukso tan manseselebra; et sikatoy minudmora to ed puso to.+
