Unonan Samuel 18:1-17
18 Ag-abayag, tinalo nen David iray Filisteo+ tan sinakop to ra tan inala tod sikara so Gat+ tan saray angkekelag* a baley na satan.
2 Insan tinalo toy Moab,+ tan nagmaliw a lingkor nen David iray Moabita tan angiter ira na buis* ed sikato.+
3 Tinalo nen David si Arin Hadadezer+ na Zoba+ diad asingger ed Hamat+ sanen sikatoy linma pian iletneg so pakauley to diad Ilog Eufrates.+
4 Asamsam nen David ed sikato so 1,000 karwahe, 7,000 lalakin de-kabayoan, tan 20,000 sundalon manaakar.+ Insan nilupoy nen David so amin a kabayo na karwahe likud labat ed 100 ed saratan.+
5 Sanen sinmabi iray Siryano a nanlapud Damasco pian ontulong ed si Arin Hadadezer na Zoba, pinapatey nen David so 22,000 ed saray Siryano.+
6 Insan angipuesto si David na saray bantay a sundalo diad teritorya na saray Siryano ed Damasco, tan saray Siryano et nagmaliw a lingkor nen David tan angiter ira na buis ed sikato. Impanalo* nen Jehova si David inerman so nila to.+
7 Ontan met, inala nen David ed saray lingkor nen Hadadezer iray malimpek a panagsamper a gawad balitok tan inawit tod Jerusalem.
8 Tan angalay David na dakdakel a gansa ed Tibhat tan Cun, saray syudad nen Hadadezer. Saratan so inusar nen Solomon diad impanggawa toy gansan Dayat,+ saray lusek, tan saray kagawaan a gansa.+
9 Sanen nadngelan nen Arin Tou na Hamat a tinalo nen David so interon armada nen Arin Hadadezer+ na Zoba,+
10 imbaki ton tampol so anak ton si Hadoram ed si Arin David pian kumustaen tan ibalikas so pililiket to lapud nilabanan tan tinalo toy Hadadezer (ta si Hadadezer et naynay a milalaban ed si Tou), tan sikatoy angawit na nanduruman klase na kagawaan a balitok, pilak, tan gansa.
11 Pinasanto iraya nen Arin David parad si Jehova,+ a singa saramay pilak tan balitok ya inala tod saray nasyon: diad Edom tan Moab, diad saray Ammonita,+ Filisteo,+ tan Amalekita.+
12 Si Abisai+ ya anak nen Zeruia+ et pinatey to so 18,000 Edomita diad Lawak na Asin.+
13 Sikatoy angipuesto ed Edom na saray bantay a sundalo , tan nagmaliw a lingkor nen David so amin ya Edomita.+ Impanalo* nen Jehova si David inerman a nila to.+
14 Nantultuloy a nanuley si David ed interon Israel,+ tan sikatoy mangipapaakseb na hustisya tan inkatunong parad amin a totoo to.+
15 Si Joab ya anak nen Zeruia so pangulo na armada,+ si Jehosafat+ ya anak nen Ahilud so managrekord na saray nagagawa,
16 saray saserdote et si Zadok ya anak nen Ahitub tan si Ahimelec ya anak nen Abiatar, tan say sekretaryo et si Savsa.
17 Si Benaias ya anak nen Jehoiada so pangulo na saray Kereteo+ tan Peleteo.+ Tan saray ananak nen David so walad manunaan a posisyon ya onkokomadua ed ari.
Paimanod leksab
^ Odino “walad kaliberliber.”
^ Odino “saray regalo.”
^ Odino “Inliktar.”
^ Odino “Inliktar.”
