Unonan Samuel 19:1-19
19 Ag-abayag et inatey si Nahas ya ari na saray Ammonita, tan say anak to so nagmaliw ya ari a kasalat to.+
2 Diad saman et inkuan nen David: “Ipatnag koy matoor a panangaro+ ed si Hanun ya anak nen Nahas lapud impatnag nen ama to so matoor a panangaro ed siak.” Kanian angibaki si David na saray mensahero pian sikatoy ligliwaen da lapud impatey na ama to. Balet kasabi na saray lingkor nen David ed dalin na saray Ammonita+ pian ligliwaen si Hanun,
3 oniay imbaga na saray prinsipe na saray Ammonita ed si Hanun: “Padesir mo, labay nen David a pagalangan si amam kanian angibaki na saray manligliwa ed sika? Agkasi linmad sika iray lingkor to pian manusisa ra tan deralen da ka tan man-espiya ira ed dalin?”
4 Kanian inala nen Hanun iray lingkor nen David tan inahitan to ra+ tan pinutot to ya anggad tapi iray kawes da, insan to ra pinataynan.
5 Sanen nibalitad si David so agawad saray lalaki, wala ray imbaki ton tampol a mangabet ed sikara, lapud apabaingan iran maong; tan inkuan na ari ed sikara: “Manayam kayod Jerico+ anggad ontubo iray balbas yo, insan kayo ompawil.”
6 Diad saginonor et alikas na saray Ammonita a kabkabusol la ra nen David, kanian angipawit si Hanun tan saray Ammonita na 1,000 talenton* pilak pian mangupa ra na saray karwahe tan lalakin de-kabayoan manlapud Mesopotamia,* Aram-maaca, tan Zoba.+
7 Kanian angupa ray 32,000 karwahe a kaibay ari na Maaca tan saray totoo to. Insan linma ran nankampo diad arap na Medeba.+ Saray Ammonita et nantitipon manlapud saray syudad da tan pinmaway ira pian miguerra.
8 Sanen nadngelan itan nen David, imbaki toy Joab+ tan say interon armada, pati saray sankabiskegan a sundalo to.+
9 Tan saray Ammonita et pinmaway tan nandarasig ira diad lolooban na syudad pian miguerra, tan saray ararin akila et akaposisyon ed uma.
10 Sanen anengneng nen Joab a wala ray akaposisyon ya armada diad arapan tan benegan to pian milaban ed sikato, sikatoy amili na pigara ed saray sankamaongan a sundalo na Israel tan impandarasig to ra pian milaban ed saray Siryano.+
11 Saray akeraan a lalaki et inyan tod pakauley* nen Abisai+ ya agi to, pian pandarasigen to ran milaban ed saray Ammonita.
12 Insan inkuan to: “No nanengneng mon natatalo ak la na saray Siryano,+ tulongan mo ak; balet no natatalo ka la na saray Ammonita, tulongan ta ka.
13 Kaukolan ta’y manpabiskeg tan manpakpel+ parad saray kabaleyan ta tan parad saray syudad na Dios tayo, tan gawaen nen Jehova no antoy maong ed pakanengneng to.”
14 Insan linmusob si Joab tan saray sundalo to pian milaban ed saray Siryano, tan sikaray apabatik to.+
15 Sanen anengneng na saray Ammonita a binmatik la ray Siryano, imbatikan da met lay Abisai ya agi to tan linmoob irad syudad. Kayari na satan et pinmawil si Joab ed Jerusalem.
16 Sanen anengneng na saray Siryano ya atalo la ra na Israel, angibaki ra na saray mensahero pian ipatawag iray Siryano a walad rehyon na Ilog,*+ tan indaulo ira nen Sofac a pangulo na armada nen Hadadezer.+
17 Sanen nibalita itan ed si David, tinipon ton tampol so interon Israel tan binmaliw irad Jordan insan linma rad sikara tan nandarasig ira parad guerra. Impandarasig ira nen David pian miguerra ed saray Siryano, tan akilaban irad sikato.+
18 Balet apabatik na Israel iray Siryano; tan pinatey nen David so 7,000 Siryanon akakarwahe tan 40,000 sundalon manaakar, tan pinatey to met si Sofac a pangulo na armada.
19 Sanen anengneng na saray lingkor nen Hadadezer ya atalo la ra na Israel,+ akikareenan iran tampol ed si David tan nagmaliw iran uuleyan to;+ tan agla labay na Sirya a tulongan iray Ammonita.
Paimanod leksab
^ Say sakey a talento et 34.2 kilo. Nengnengen so Apendise B14.
^ Literal, “Aram-naharaim.”
^ Literal, “lima.”
^ Salanti, say Eufrates.
