Unonan Samuel 21:1-30
21 Et kinmiwas si Satanas* sumpad Israel tan sinagyat toy David a bilangen so Israel.+
2 Kanian inkuan nen David ed si Joab+ tan ed saray papangulo na baley: “La ka, bilang moy Israel manlapud Beer-sheba anggad Dan;+ insan balitaan mo ak pian naamtaan koy bilang da.”
3 Balet inkuan nen Joab: “Komon ta maminlasus a parakelen nen Jehova so totoo to! O katawan kon ari, agta amin da et lingkor la na katawan ko? Akin et labay iyan gawaen na katawan ko? Akin et sikatoy pansengegan na pankasalanan na Israel?”
4 Balet naunor lanlamang so salita na ari nen say si Joab. Kanian linmay Joab tan niliber toy interon Israel, insan pinmawil ed Jerusalem.+
5 Et inter nen Joab ed si David so bilang na totoon nirehistro. Diad interon Israel et 1,100,000 so bilang na lalakin aka-espada, tan diad Juda et 470,000 so lalakin aka-espada.+
6 Balet lapud binusol nen Joab so ganggan na ari,+ agto inrehistro so Levi tan Benjamin.+
7 Mauges iya ed pakanengneng na tuan Dios, kanian dinusa toy Israel.
8 Diad saman et inkuan nen David ed tuan Dios: “Balbaleg so kasalanan ko+ lapud sayan ginawak. Kanian perdonam komon so lingo na lingkor mo,+ ta kinmiwas ak a makulangkulang.”+
9 Et akitongtong si Jehova ed si Gad,+ samay mangipapasabi na pasingawey ed si David, a kuan to:
10 “La ka tan ibagam ed si David, ‘Oniay inkuan nen Jehova: “Ikdan ta kay taloran pampilian. Mamili kay sakey a gawaen kod sika.”’”
11 Kanian linmay Gad ed si David tan inkuan tod sikato: “Oniay inkuan nen Jehova, ‘Manpili ka,
12 taloy taon ya eras,+ odino taloy bulan kan taloen na saray kalaban mo tan naabotan kay espada na saray kabusol mo,+ odino taloy agew a nidapoy espada nen Jehova—salot diad dalin+—a say anghel nen Jehova so maneral+ diad amin a teritorya na Israel.’ Natan, nonot mo no antoy iyebat kod samay angibaki ed siak.”
13 Kanian inkuan nen David ed si Gad: “Mair-irap iya parad siak. Mas maong nin napelag ak ed lima nen Jehova, ta abalbaleg so panangasi to,+ nen say napelag ak ed lima na too.”+
14 Diad saman et angidapo si Jehova na salot+ ed Israel, kanian 70,000 totoo so inaatey diad Israel.+
15 Ontan met, angibaki so tuan Dios na anghel a maneral ed Jerusalem; balet sanen igapo to lan deralen, anengneng itan nen Jehova tan nagbabawian* toy desyang,+ tan oniay inkuan tod samay anghel a mangidadapoy kadederal: “Duga la!+ Itundam la!” Diad saman, say anghel nen Jehova et akaalagey ed abay na panag-ilikan nen Ornan+ a Jebuseo.+
16 Sanen tinmangay si David, anengneng to may anghel nen Jehova a manalalagey diad baetan na dalin tan tawen, a sankaegnaan toy espada+ tan akaayag ed Jerusalem. Et tampol ya insubsob nen David tan saray mamatatken so lupa ra ed dalin,+ a diad saman et akasulong ira na sakon abel.+
17 Inkuan nen David ed tuan Dios: “Agta siak so angibaga a bilangen iray totoo? Siak so nankasalanan, tan siak so nanggaway mauges;+ balet antoy ginawa na sarayan karnero? O Jehova a Dios ko, ipangasim, siak la tan say sankaabungan nen amak so dusam; balet agmo idadapo iyan salot ed saray totoom.”+
18 Diad saman, ingganggan na anghel nen Jehova si Gad+ ya ibaga tod si David ya onlan manggawa na altar parad si Jehova diad panag-ilikan nen Ornan a Jebuseo.+
19 Kanian linmay David unong ed imbaga nen Gad, ya impasabi to diad ngaran nen Jehova.
20 Kaleganan na satan, anengneng nen Ornan imay anghel, tan say apatiran anak ton lalaki a kaiba to et inmamot. Diad saman et maniilik na trigo si Ornan.
21 Kasabi nen David, sikatoy anengneng nen Ornan tan pinmaway a tampol ed panag-ilikan to tan dinmakmomo ed dalin diad arapan nen David.
22 Et inkuan nen David ed si Ornan: “Ilakom* ed siak so pasen na panag-ilikan mo, pian makapanggawa ak ditan na altar parad si Jehova. Saliwen ko itan ed peteg a bili to, pian ontunda lay salot ed saray totoo.”+
23 Balet inkuan nen Ornan ed si David: “Alam la, tan gawaen komon na katawan kon ari no antoy iisipen ton maabig.* Iter ko met la irayay baka parad apay a popoolan tan say kagawaan a panag-ilik+ pian itungo tan say trigo parad apay a kakanen. Iter ko irayan amin.”
24 Balet inkuan nen Arin David ed si Ornan: “Andi, saliwen ko itan ed peteg a bili to, ta agko alaen so kayarian mo pian iter ed si Jehova tan agak mangiyapay na saray bagat a popoolan ya anggapoy binayaran ko.”+
25 Kanian angiter si David ed si Ornan na 600 a siklon* belat na balitok parad satan a pasen.
26 Tan nanggawa ditan si David na altar+ parad si Jehova tan angiyapay na saray bagat a popoolan tan bagat a pandurungoan, tan sikatoy tinmawag ed si Jehova, a diad saman et inmebat ed sikato diad impangibaki to na apoy+ manlapud tawen diad tapew na altar parad apay a popoolan.
27 Insan ingganggan nen Jehova imay anghel+ ya ipawil to lay espada ed kaluban to.
28 Diad saman, sanen anengneng nen David a sikatoy inebatan nen Jehova diad panag-ilikan nen Ornan a Jebuseo, sikatoy nantultuloy a nambagat ditan.
29 Balet, samay tabernakulo nen Jehova ya impaalagey nen Moises diad kalawakan tan say altar parad apay a popoolan et walad atagey a pasen diad Gibeon.+
30 Ingen ta agla akaonla ditan si David pian ontupleg ed Dios, ta sikatoy tinmakot lapud espada na anghel nen Jehova.
Paimanod leksab
^ Odino posiblin, “so sakey a sumusumpa.”
^ Odino “nanermenan.”
^ Literal, “Iter mo.”
^ Literal, “no antoy maong ed saray mata to.”
^ Say sakey a siklo et 11.4 gramo. Nengnengen so Apendise B14.
