Unonan Samuel 23:1-32
23 Sanen si David et masiken la tan magano lan manampot so bilay to,* ginawa ton ari ed Israel si Solomon ya anak to.+
2 Insan tinipon toy amin a prinsipe na Israel, saray saserdote,+ tan saray Levita.+
3 Et binilang iray Levita a mantaon na 30 a patagey;+ sansakey a binilang iray lalaki tan say bilang da et 38,000.
4 Diad saraya et 24,000 so manangasikaso ed kimey diad abung nen Jehova, tan 6,000 so opisyal tan ukom,+
5 tan 4,000 so bantay na puerta,+ tan 4,000 so mangidadayew+ ed si Jehova diad panamegley na saray instrumento a tinukoy nen David a “ginawak parad panangirayew.”
6 Insan inorganisa* ira nen David ed saray grupo+ unong ed saray anak a lalaki nen Levi: si Gerson, Kohat, tan Merari.+
7 Diad saray Gersonita, si Ladan tan Simei.
8 Saray anak a lalaki nen Ladan et si Jehiel a pangulo, si Zetam, tan Joel,+ talora.
9 Saray anak a lalaki nen Simei et si Selomot, Haziel, tan Haran, talora. Saraya so lider na saray pamilya na kaamaan a nanlapud si Ladan.
10 Tan saray anak a lalaki nen Simei et si Jahat, Zina, Jeus, tan Berias. Sarayan apat so ananak nen Simei.
11 Si Jahat so ulo tan si Zizah so komadua. Balet lapud si Jeus tan Berias et dagdaiset so anak dan lalaki, impasen iran kabiangan na saksakey a pamilya na kaamaan a walaay sakey a responsabilidad.
12 Saray anak a lalaki nen Kohat et si Amram, Izhar,+ Hebron, tan Uziel,+ apatira.
13 Saray anak a lalaki nen Amram et si Aaron+ tan Moises.+ Balet si Aaron et permanentin imbiig+ pian gawaen ton sagrado so Sankasantosan, on, sikato tan saray anak ton lalaki, pian mangiyapay ira na saray bagat diad arapan nen Jehova, manlingkor irad sikato, tan lawas a mangibalikas na saray panamendisyon diad ngaran to.+
14 Nipaakar ed si Moises a too na tuan Dios, saray anak ton lalaki et imbilang a kaiba ed tribu na saray Levita.
15 Saray anak a lalaki nen Moises et si Gersom+ tan Eliezer.+
16 Diad saray anak a lalaki nen Gersom, si Sebuel+ so ulo.
17 Diad saray kailalakan* nen Eliezer, si Rehabias+ so ulo; anggapo lay arum ya anak a laki nen Eliezer, balet dakdakel so anak a lalaki nen Rehabias.
18 Diad saray anak a lalaki nen Izhar,+ si Selomit+ so pangulo.
19 Saray anak a lalaki nen Hebron et si Jeria, say ulo, si Amarias, say komadua, si Jahaziel, say komatlo, tan si Jekameam,+ say komapat.
20 Saray anak a lalaki nen Uziel+ et si Miqueas, say ulo, tan si Isias, say komadua.
21 Saray anak a lalaki nen Merari et si Mali tan Musi.+ Saray anak a lalaki nen Mali et si Eleazar tan Kis.
22 Si Eleazar et inatey ya anggapoy anak ton lalaki noagta bibii labat. Kanian inasawa ira na saray anak a lalaki nen Kis a kakanayon da.*
23 Saray anak a lalaki nen Musi et si Mali, Eder, tan Jeremot, talora.
24 Saraya so anak a lalaki nen Levi unong ed saray pamilya na kaamaan da, saray lider na saray pamilya na kaamaan, unong ed saramay nirehistro a binilang tan inlista unong ed ngaran da tan saramay anumpal na kimey parad panaglingkor ed abung nen Jehova, a mantaon na 20 a patagey.
25 Ta inkuan nen David: “Si Jehova a Dios na Israel et inikdan to na painawa so totoo to,+ tan sikatoy manayam ed Jerusalem ya anggad angga.+
26 Ontan met, agla kaukolan ya awiten na saray Levita so tabernakulo odino antokaman a kagawaan ya uusaren ed panaglingkor ditan.”+
27 Ta unong ed kaunoran iran bilin nen David, binilang iray Levita a mantaon na 20 a patagey.
28 Say betang da et ontulong ed saray ananak nen Aaron+ diad panaglingkor ed abung nen Jehova, a sikaray mangasikaso ed saray sular,+ kuarton pananganan, panaglinis ed amin a masanton bengatla, tan antokaman a kimey a nakaukolan diad panaglingkor ed abung na tuan Dios.
29 Ontutulong ira diad panagparaan na nantatapewan a tinapay,*+ pinon arina parad apay a kakanen, maiimpis ya andi-lebaduran tinapay,+ tirampiak iran tinapay, nilaokan a masa,+ tan diad amin a simbang tan sukat.
30 Kaukolan iran onalagey kada kabuasan+ pian pisalamatan tan idayew si Jehova, tan ontan met so gawaen da kada labi.+
31 Ontutulong ira kapagno iyaapay ed si Jehova iray bagat a popoolan legan na Sabaton,+ balon bulan,+ tan panaon na piesta,+ unong ed bilang a kakaukolanen na ganggan nipaakar ed saratan, a regular dan gagawaen iratan diad arapan nen Jehova.
32 Gagawaen da met iray responsabilidad da ed tolda a pantitiponan, diad masanton pasen, tan diad saray agagi ra ya ananak nen Aaron parad panaglingkor diad abung nen Jehova.
Paimanod leksab
^ Literal, “matatken tan nakda na saray agew.”
^ Odino “inapag-apag.”
^ Literal, “ananak a lalaki.”
^ Literal, “ya agagi ran lalaki.”
^ Salanti, say tinapay ya iyaapay.
