Unonan Samuel 26:1-32
26 Niraya so grupo na saray bantay na puerta:+ diad saray Korahita, si Meselemias+ ya anak nen Kore a nanlapud saray ananak nen Asaf.
2 Tan si Meselemias et walaan na saray anak a lalaki: si Zacarias, say panguloan, si Jediael, say komadua, si Zebadias, say komatlo, si Jatniel, say komapat,
3 si Elam, say komalima, si Jehohanan, say komanem, tan si Elieho-enai, say komapito.
4 Tan si Obed-edom et walaan na saray anak a lalaki: si Semaias, say panguloan, si Jehozabad, say komadua, si Joa, say komatlo, si Sacar, say komapat, si Netanel, say komalima,
5 si Amiel, say komanem, si Isacar, say komapito, tan si Peuletai, say komawalo; ta sikatoy benendisyonan na Dios.
6 Tan say anak ton si Semaias et walaan na saray anak a lalaki a nagmaliw a lider ed pamilya na kaamaan da, ta mabibiskeg tan makayari iran lalaki.
7 Niraya so anak a lalaki nen Semaias: si Otni, Refael, Obed, tan Elzabad; tan saray agagi ton si Elihu tan Semaquias et makayari met a lalaki.
8 Amin iraya et nanlapud saray ananak nen Obed-edom; sikara, saray ananak da, tan saray agagi ra et makayarin lalaki tan kualipikado ed panaglingkor, 62 ira manlapud si Obed-edom.
9 Tan si Meselemias+ et walaan na saray ananak tan agagi, 18 makayarin lalaki.
10 Tan si Hosa a nanlapud saray ananak nen Merari et walaan na saray anak a lalaki. Si Simri so ulo, ta anggano aliwan panguloan et sikatoy tinuro nen ama to bilang ulo,
11 si Hilkias so komadua, si Tebalias so komatlo, tan si Zacarias so komapat. Amin ya ananak tan agagin lalaki nen Hosa et 13.
12 Diad sarayan grupo na saray bantay na puerta, saray kimey na papangulo et mipara ed saray agagi ra, say panlingkor diad abung nen Jehova.
13 Kanian nampapalaranan+ ira, melag man odino baleg so pamilya na kaamaan da, parad nanduruman puerta.
14 Et say apili ed pampapalaranan parad bukig et si Selemias. Nampapalaranan ira parad si Zacarias ya anak to, a sakey a makabat a mananimbawa, tan say pinmugtad sikato et diad amianen.
15 Say pinmugtad si Obed-edom et diad abalaten, tan say nipabtang ed saray ananak to+ et saray pasen a panagsimpenan.
16 Say pinmugtad Supim tan si Hosa+ et diad sagur, ya asingger ed Puertan Saleket diad abay na dalan a patatdang, a saray grupo na guardia et sankakaabay;
17 diad bukig et walay anemiran Levita; diad amianen et apatira kada agew tan diad abalaten et apatira kada agew; tan diad saray pasen a panagsimpenan+ et sanderwa;
18 diad portiko* a bandad sagur, apatira so walad dalan+ tan duara so walad mismon portiko.
19 Saraya so grupo na saray bantay na puerta a nanlapud saray ananak na saray Korahita tan saray Merarita.
20 Diad saray Levita, si Ahias so mangaasikaso ed saray pasen a pangiinay kayamanan ed abung na tuan Dios tan saray pasen a pangiinan na saray bengatlan pinasanto.*+
21 Saray ananak nen Ladan: saray ananak na saray Gersonita ed panamegley nen Ladan, saray lider na saray pamilya a nanlapud si Ladan a Gersonita, et si Jehieli+
22 tan saray ananak nen Jehieli a si Zetam tan si Joel ya agi to. Sikaray mangaasikaso ed saray pasen a pangiinay kayamanan ed abung nen Jehova.+
23 Diad saray Amramita, Izharita, Hebronita, tan Uzielita,+
24 si Sebuel ya anak nen Gersom ya anak nen Moises so mangidadaulo ed panangasikaso na saray pasen a panagsimpenan.
25 Diad saray agagi to, a kailalakan nen Eliezer,+ si Rehabias+ ya anak to, si Jesaias ya anak to, si Joram ya anak to, si Zicri ya anak to, tan si Selomot ya anak to.
26 Sayan Selomot tan saray agagi to so mangaasikaso ed amin a pasen a pangiinan na saray bengatlan pinasanto+ nen Arin David,+ saray lider na saray pamilya na kaamaan,+ saray papangulo na nilibo tan nilasus, tan saray papangulo na armada.
27 Saray arum ya asamsam+ da manlapud saray guerra+ et pinasanto ra parad pangasikaso ed abung nen Jehova;
28 ontan met iray amin a pinasanto nen Samuel, samay makakatalos na pasingawey,+ si Saul ya anak nen Kis, si Abner+ ya anak nen Ner, tan si Joab+ ya anak nen Zeruia.+ Antokaman a pinasanto na siopaman et inyan ed panangasikaso nen Selomit tan saray agagi to.
29 Diad saray Izharita,+ si Kenanias tan saray ananak to so tinuro ed betang a pangasikaso na saray kimey ed paway bilang opisyal tan ukom+ ed Israel.
30 Diad saray Hebronita,+ si Hasabias tan saray agagi to, a 1,700 a makayarin lalaki, so manangasikaso ed Israel diad rehyon a walad sagur na Jordan parad amin a kimey a panaglingkor ed si Jehova tan panaglingkor ed ari.
31 Diad saray Hebronita, si Jerias+ so ulo na saray Hebronita unong ed linya na kapolian na pamilya na kaamaan da. Diad koma-40 taon na uley nen David bilang ari,+ inanap iray mabibiskeg tan makayarin lalaki ed limog da tan aromog iraya ed Jazer+ diad Gilead.
32 Tan saray agagi to et 2,700 a makayarin lalaki, saray lider na saray pamilya na kaamaan. Kanian sikaray tinuro nen Arin David a mangidaulo ed saray Rubenita, Gadita, tan say kapaldua na tribu nen Manases, parad amin a bengatlan nipaakar ed tuan Dios tan ed ari.
