Unona ed Saray Taga Corinto 3:1-23
3 Kanian, agagi, agak nansalita ed sikayo a singa ed saray maespiritual a totoo,+ noagta singa ed saray makalaman a totoo, a singa ed saray ugaw ni+ nipaakar ed Kristo.
2 Pinainum ta kayo na gatas, tan agta kayo pinakan na anawet a naakan, ta aliwa kayo nin mabiskeg. Diad tua, aliwa kayo nin mabiskeg natan,+
3 ta makalaman kayo ni.+ Lapud wala ray maniimonan tan mankokolkol ed sikayo, agta makalaman kayo+ tan manbibilay kayon singa saray totoo ed mundo?
4 Ta sano ibabaga na sakey: “Dia ak ed si Pablo,” balet ibabaga na sananey, “Siak, diad si Apolos,”+ agta onkikiwas kayon singa arum a totoo?
5 Siopa sirin si Apolos? On, siopa si Pablo? Ministro ira,+ a diad panamegley da et nagmaliw kayon mananisia, unong ed inter na Katawan ed kada sakey.
6 Siak so nantanem,+ si Apolos so nansalog,+ balet say Dios so mamapabaleg,
7 kanian aliwan samay mantatanem odino mansasalog so nepeg a pagalangan, noagta say Dios a mamapabaleg ed satan.+
8 Natan, samay mantatanem tan samay mansasalog et saksakey ira,* balet kada sakey et mangawat na tumang to unong ed kinimeyan to.+
9 Ta kakimeyan itayo na Dios. Sikayo so uma a daralusan na Dios, say abung ya impaalagey to.+
10 Unong ed agnaparaan a kaabigan na Dios a niiter ed siak, angiletneg ak na pundasyon+ a singa sakey a marundunong a managpaalagey,* ingen walay sananey a manpapaalagey ditan. Balet mantultuloy komon ya imanoen na kada sakey no panon so pampapaalagey to ditan.
11 Ta anggapoy siopaman a makapangiletneg na arum nin pundasyon nilikud ed samay akaletneg la, salanti, si Jesu-Kristo.+
12 Natan no walay manpaalagey diad pundasyon a mangusar na saray balitok, pilak, mablin bato, kiew, amagan dika, odino dayami,
13 say kimey na kada sakey et napatnagan no anton talaga itan,* ta say agew so mangipatnag ed satan, lapud niparungtal itan diad panamegley na apoy,+ tan nasubok ed apoy no anton klase na kimey so impaalagey na kada sakey.
14 No mansiansia so kimey ya impaalagey ditan na sakey, sikatoy mangawat na tumang;
15 no napoolan so kimey na sakey, sikatoy naandian, balet sikaton mismo et niliktar; balet no ontan, sikatoy singa dinmalan ed apoy.
16 Agyo ta amta a sikayon mismo so templo na Dios+ tan manaayam ed sikayo so espiritu na Dios?+
17 Siopaman a manederal ed templo na Dios, sikatoy deralen na Dios; ta say templo na Dios et masanto, tan satan a templo et sikayo.+
18 Agkomon palikdoen na sakey a too so sarili to: Siopaman ed sikayo a maniisip a sikatoy marunong ed sayan sistema na mundo* et magmaliw komon a makulangkulang, pian sikatoy magmaliw a marunong.
19 Ta say karunongan na sayan mundo et inkamakulangkulang ed Dios, ta nisulat: “Eerelen to ray marunong diad dilin kasiliban da.”+
20 Niarum ni: “Amta nen Jehova* ya andi-kakanaan iray panagkatunongan na marunong a totoo.”+
21 Kanian anggapo komon so manpasirayew nipaakar ed totoo; ta amin a bengatla et kayarian yo,
22 balanglan si Pablo odino si Apolos odino si Cefas*+ odino say mundo odino bilay odino patey odino saray bengatlan wadia natan odino saray bengatlan onsabi, amin a bengatla et kayarian yo;
23 tan kayarian kayo nen Kristo;+ tan si Kristo et kayarian na Dios.
Paimanod leksab
^ Odino “et saksakey so gagala ra.”
^ Odino “marunong a manangidaulo ed saray kimey.”
^ Literal, “et napatnagan.”
^ Nengnengen so Apendise A5.
^ Tinawag met a Pedro.
