Unonan Samuel 10:1-27
10 Insan angalay Samuel na larak a walad melag a panagkargaan tan inkalbo to itan ed ulo nen Saul+ insan inangoban to tan inkuan to: “Sika so nilanaan nen Jehova bilang lider+ na saray totoo to.+
2 Sano taynan mo ak ed sayan agew, makaromog kay duaran lalaki diad abay na lubok nen Raquel+ diad dalin a nasasakopan na Benjamin diad Zelza, tan ibaga rad sika, ‘Aromog da la iramay asno ya aanapen mo, balet natan et aliwa lan saray asno so nononoten nen amam+ noagta sikayo lay panaaburidoan to. Inkuan to: “Antoy gawaen ko ta agni anempet imay ana’ko?”’
3 Manlapud man et diretso ka anggad makasabi kad baleg a kiew ed Tabor, tan walay naabet mo diman a taloran lalaki ya onlad tuan Dios diad Bethel,+ ya awit na sakey so taloran kilaw a kanding tan samay sakey et taloran malimpek a tinapay, tan samay sakey et baleg a buyog a nankargay alak.
4 Kumustaen da ka insan ikdan da kay duaran tinapay, tan awat mo iratan.
5 Kayari to et la kad pukdol na tuan Dios, a walad man so akapuesto iran sundalo na saray Filisteo. Sano makasabi kad syudad, naabet moy sakey a grupo na saray propeta a nanlapud atagey a pasen, tan legan a manpropropesiya ra et wala ray mantogtog na nandeles ya instrumento, tamburin, plauta, tan arpa diad unaan da.
6 Pabiskegen ka na espiritu nen Jehova,+ tan manpropesiya ka a singa sikara tan manguman so inkatoom.+
7 Sano nagawa irayan tanda, gawam so antokaman a nayarian mon gawaen, ta say tuan Dios et walad sika.
8 Insan unona ka lan onla ed Gilgal,+ tan ontumbok ak ed sika diman pian mangiyapay na saray bagat a popoolan tan saray bagat a pandurungoan. Pitoy agew kan manalagar anggad isabik. Insan ipaamtak ed sika so gawaen mo.”
9 Sanen tinaynan la nen Saul si Samuel, inuman na Dios so inkatoo to, tan tinmuan amin iramay tanda ed saman ya agew.
10 Kanian manlapu diman et linma rad pukdol, tan walay grupo na saray propeta ya angabet ed sikato. Tampol a sikatoy pinabiskeg na espiritu na Dios,+ tan sikatoy nampropesiya+ ed limog da.
11 Sanen anengneng na amin ya akankabat ed sikato so pampropropesiya to a kaiba na saray propeta, inkuan dad balang sakey: “Antoy agawad anak nen Kis? Kasin sakey met a propeta si Saul?”
12 Insan oniay inkuan na sakey a toon taga diman: “Balet siopay ama ra?” Kanian oniay nagmaliw a panangibaga:* “Kasin sakey met a propeta si Saul?”+
13 Kasumpal ton nampropesiya, sikatoy linmad atagey a pasen.
14 Diad saginonor et inkuan na pangamaen nen Saul ed sikato tan ed lingkor to: “Iner so nila yo?” Oniay inyebat to: “Inanap mi iramay asno,+ balet agmi ra nalmo kanian linma kamid si Samuel.”
15 Intepet na pangamaen nen Saul: “Ipangasi yon ibagad siak, antoy inkuan nen Samuel ed sikayo?”
16 Oniay inyebat nen Saul ed pangamaen to: “Imbaga tod sikami ya aromog da la ray asno.” Balet ag-imbaga nen Saul ed sikato so nipaakar ed panari to a sinalita nen Samuel.
17 Insan tinipon nen Samuel iray totoo ed arapan nen Jehova diad Mizpa+
18 tan inkuan tod saray Israelita: “Oniay inkuan nen Jehova a Dios na Israel: ‘Siak so angipaway ed Israel manlapud Ehipto tan inliktar ta kayod lima na Ehipto+ tan ed lima na amin a panarian a mamapairap ed sikayo.
19 Balet impulisay yo natan so Dios yo+ a Manangiliktar yo ed amin a kairapan tan gonigon yo, tan imbaga yon: “Andi, manuro ka na sakey ya ari a manguley ed sikami.” Kanian manalagey kayo natan ed arapan nen Jehova unong ed saray tribu yo tan unong ed saray nilibo* yo.’”
20 Kanian pinaasingger nen Samuel so amin a tribu na Israel,+ tan apili so tribu nen Benjamin.+
21 Insan pinaasingger to so kada pamilya ed tribu nen Benjamin, tan apili so pamilya na saray Matrita. Insan apili si Saul ya anak nen Kis.+ Balet sikatoy agda naromog sanen aanapen da.
22 Kanian nantepet irad si Jehova:+ “Wadia imay laki?” Inmebat si Jehova: “Wadman, sikatoy inmamot ed kawalaan na saray bagahe.”
23 Kanian batik ira tan sikatoy inala ra diman. Sanen sikatoy inmalagey ed pegley na saray totoo, sikatoy mas atagey ni nen say amin a totoo.+
24 Inkuan nen Samuel ed amin a totoo: “Nanenengneng yo ta so pinili nen Jehova,+ ya anggapoy miparad sikato ed amin a totoo?” Tan oniay inkelyaw na amin a totoo: “Manbilay komon na andukey so ari!”
25 Imbaga nen Samuel ed saray totoo iray kanepegan na sakey ya ari+ tan insulat to itan ed sakey a libro tan inyan tod arapan nen Jehova. Insan pinasipot la nen Samuel so amin a totoo, kada sakey diad abung to.
26 Anempet met lay Saul ed Gibea, tan sikatoy inulop na saray sundalo a pinakiwas nen Jehova so kapusoan da.
27 Balet oniay inkuan na saray andi-kakanaan a lalaki: “Panoy pangiliktar ed sikatayo na sayan too?”+ Kanian sikatoy minudmora ra, tan ag-ira angiyakar na regalo ed sikato.+ Balet anggapoy imbaga to nipaakar ed satan.*
Paimanod leksab
^ Odino “proverbio.”
^ Odino “saray boleg.”
^ Literal, “Tan sikatoy singa sakey ya agmakasalita.”
