Unonan Samuel 21:1-15
21 Diad saginonor et akasabid Nob+ si David ed si Ahimelec a saserdote. Ginmiwgiw si Ahimelec sanen anengneng toy David, tan inkuan tod sikato: “Akin et bukbukor mo tan anggapoy kaibam?”+
2 Oniay inyebat nen David ed si Ahimelec a saserdote: “Walay papagawa ed siak na ari, balet inkuan to, ‘Agmo ipapaamtad siopaman so nipaakar ed kimey a pangibakian kod sika tan nipaakar ed saray imbilin kod sika.’ Akipakna ak ed saray totook a mannengneng kami ed sakey a pasen.
3 Natan, no walay niiter mon limaran tinapay odino antokaman a wala ditan, iter mo lad siak.”
4 Balet inkuan na saserdote ed si David: “Anggapo diay ordinaryon tinapay, noagta masanton tinapay+ so wala—balet nepeg a saray totoom et ag-inmasingger ed bibii.”*+
5 Inmebat si David ed saserdote: “Talagan agkami inmasingger ed saray bibii a singa gagawaen mi lan dati sano ompapaway a milaban.+ No masanto so laman na sarayan lalaki anggano ed ordinaryon kimey, nagkalalo la natan a walaan ira na nikaduman kimey!”
6 Kanian inter ed sikato na saserdote so masanton tinapay,+ ta anggapoy tinapay a wadman noagta say tinapay ya iyaapay ya inekal ed arapan nen Jehova pian salatan na balo diad agew ya ekalen itan.
7 Natan, sakey ed saray aripen nen Saul et wadman ed saman ya agew, a nansiansia ed arapan nen Jehova. Say ngaran to et Doeg,+ sakey ya Edomita+ a pangulo na saray managpastol nen Saul.
8 Insan inkuan nen David ed si Ahimelec: “Walad diay niiter mon gayang odino espada? Agko inawit so espadak odino saray armas ko, ta apuraan so kimey ya angibakian na ari.”
9 Diad saman et inkuan na saserdote: “Wadia imay espada nen Goliat+ a Filisteo a pinatey mo ed Lawak* na Elah,+ ya abalkot na abel diad beneg na efod.+ No labay mo, alam la, ta satan labat so wadia.” Inkuan nen David: “Anggapoy mipara ed satan. Iter mod siak.”
10 Diad saman ya agew et inmalagey si David tan intultuloy ton imbatikan+ si Saul, tan akasabi ed si Arin Akis na Gat.+
11 Oniay inkuan ed si Akis na saray aripen to: “Agta saya may David, ya ari na saman a dalin? Agta sikato may binitla rad kansion sanen sinmayaw ira, ya inkuan dan,‘Nilibo so pinatey nen Saul,Tan samplon libolibo so pinatey nen David’?”+
12 Ninonot a maong nen David irayan salita, tan sikatoy tinmakot a maong+ ed si Arin Akis na Gat.
13 Kanian sikatoy nankunkunwarin ambagel+ ed arapan da tan nantapis-tapisan ed limog da.* Sinulat-sulatan to iray kapot na puerta na syudad tan pappaulyan ton onagus ed balbas to so ilol to.
14 Diad kaunoran et inkuan nen Akis ed saray aripen to: “Sankanengneng yon ambagel iyan too! Akin et inawit yo nid siak?
15 Amayamay lad diay ambagel. Kaukolan ko ni kasi sakey ya ambagel? Akin et palooben yo nid abung ko iyan too?”
