Unonan Samuel 24:1-22
24 Kapawil nen Saul manlapud impangusil tod saray Filisteo, oniay imbaga rad sikato: “Si David et walad kalawakan na En-gedi.”+
2 Kanian angalay Saul na 3,000 ya apilin lalaki manlapud interon Israel tan linma ran nananap ed si David tan saray totoo to diad saray mabaton kelas a kawalaan na saray atap a kanding.
3 Akasabi si Saul ed pukokan na karnero a gawad bato diad abay na dalan, a kawalaan na sakey ya ungib, tan sikatoy linmoob pian manbawas,* legan a si David tan saray totoo to et akayurong ed looloob na ungib.+
4 Inkuan na saray totoo nen David ed sikato: “Saya imay agew ya imbaga nen Jehova ed sika, ‘Iyawat kod limam so kalaban mo,+ tan nayarian mon gawaen ed sikato so antokaman a labay mo.’” Kanian inmalagey si David tan kalkalna ton pinutot so saloy na andiay-taklay a latop nen Saul.
5 Balet kayari na saman et akonsiensiay* David+ lapud pinutot toy saloy na andiay-taklay a latop nen Saul.
6 Inkuan tod saray totoo to: “Diad arapan nen Jehova et agkon balot nagawaan itan ed katawan ko, say nilanaan nen Jehova, a sikatoy sakitan ko, ta sikatoy nilanaan nen Jehova.”+
7 Kanian naamper* nen David iray totoo to sanen imbaga to itan, tan agto ra inabuloyan a sakitan day Saul. Pinmaway lay Saul ed ungib tan linma la.
8 Insan inmalagey si David tan pinmaway ed ungib, tan tinawag toy Saul: “Katawan kon ari!”+ Sanen linmingaw si Saul, tinmalimukor si David tan dinmakmomo ed dalin.
9 Inkuan nen David ed si Saul: “Akin et dedengelen moy ibabaga na totoo a, ‘Labay kan sakitan nen David’?+
10 Anengneng mon mismo ed sayan agew no panon kan inyawat ed siak nen Jehova diad ungib. Balet sanen walay angibagan nepeg kan pateyen,+ kinasian ta ka tan inkuan ko, ‘Agko sakitan so katawan ko, ta sikatoy nilanaan nen Jehova.’+
11 Tan nia, O amak, on, nengneng mod limak so saloy na andiay-taklay a latop mo; ta agta ka pinatey sanen pinutot koy saloy na andiay-taklay a latop mo. Anengneng mo tan naamtaan mo la natan ya agko getmay mamasakit odino manrebelde ed sika, tan agak nankasalanan ed sika,+ anggaman labay mo ak a pateyen.*+
12 Komon ta si Jehova so mangukom ed baetan ta’n dua,+ tan ombales komon si Jehova ed sika parad siak,+ balet agta ka sakitan.+
13 Singa inkuan na sakey a kadaanan a proverbio, ‘Manlapud mauges et ompaway so inkauges,’ balet agta ka sakitan.
14 Siopay makasengeg no akin a pinmaway so ari na Israel? Siopay uusilan mo? Agta sakey ya inatey ya aso? Sakey a temel?+
15 Komon ta si Jehova so onakton ukom, tan sikatoy mangukom ed baetan ta’n dua, tan usisaen to tan idepensa toy kasok+ tan ukomen to ak tan iliktar to ak ed limam.”
16 Kayarin imbagad sikato nen David irayan salita, oniay inkuan nen Saul: “Sika ’tay mansasalita, ana’kon David?”+ Tan inmakis na maksil si Saul.
17 Inkuan tod si David: “Mas matunong ka nen say siak, ta maabig so impantratom ed siak balet mauges so imbales kod sika.+
18 On, imbagam ed siak natan so kamaongan a ginawam diad agmo impamatey ed siak sanen inyawat ak nen Jehova ed limam.+
19 Ta wala tay toon nabanaan toy kabusol to tan agto sakitan? Maabig so itumang nen Jehova ed sika+ lapud ginawam ed siak natan.
20 Tan natan, amtak a seguradon manuley ka bilang ari+ tan mansiansia ed limam so panarian na Israel.
21 Mansamba kad siak natan ed arapan nen Jehova+ ya agmo papaandien iray kailalakan ko* tan agmo eekalen so ngaran ko ed sankaabungan nen amak.”+
22 Kanian nansambay David ed si Saul, tan kayari na satan et sinmempet lay Saul.+ Balet si David tan saray totoo to et linma ed salimbengan.+
Paimanod leksab
^ Literal, “pian sakoban toy sali to.”
^ Odino “agonigon so puso nen.”
^ Odino posiblin, “apantatayak.”
^ Odino “anggaman aanapen moy kamarerwak.”
^ Literal, “so binik.”