Unonan Samuel 26:1-25
26 Asabi panaon et linmad si Saul ed Gibea+ iray lalaki ed Zif,+ tan inkuan da: “Onaamot si David diad pukdol na Hakila, diad petek na Jesimon.”*+
2 Kanian linmay Saul ed kalawakan na Zif a kaiba toy 3,000 apilin lalaki ed Israel pian anapen day David diad kalawakan na Zif.+
3 Nankampoy Saul diad gilig na dalan ed pukdol na Hakila, diad petek na Jesimon. Diad saman et manaayam si David diad kalawakan, tan naamtaan to a sikatoy tinumbok nen Saul diman.
4 Kanian angibaki si David na saray espiya pian seguroen da no talagan wadman si Saul.
5 Diad saginonor et linmay David ed pankakampoan nen Saul, tan anengneng nen David so pasen ya akarukolan nen Saul tan si Abner+ ya anak nen Ner, say pangulo na armada to; diad loob na kampo so naugipan nen Saul tan akapaliber ed sikato iray sundalo to.
6 Insan inkuan nen David ed si Ahimelec a Heteo+ tan si Abisai,+ ya anak nen Zeruia,+ ya agi nen Joab: “Siopay milad siak ya onlad kampo nen Saul?” Inmebat si Abisai: “Mila ak ed sika.”
7 Kanian linmoob si David tan si Abisai diad kawalaan na saray sundalo ed saman a labi, tan aromog day Saul a naugip ed loob na kampo ya akapanek ed dalin so gayang a walad uloan to; si Abner tan saray sundalo et naugip ed kaliberliber to.
8 Inkuan natan nen Abisai ed si David: “Inyawat natan na Dios ed limam so kalaban mo.+ Tan ipangasim, iyabuloy mo natan a sikatoy ipanek kod dalin diad maminsan labat a pangiduyok ed sayan gayang, tan agko la kaukolan a piduaen.”
9 Balet inkuan nen David ed si Abisai: “Agmo sasakitan, ta siopay makapangitagey na lima tod nilanaan nen Jehova+ tan agmankasalanan?”+
10 Inkuan ni nen David: “Unong a mabilay si Jehova, si Jehova a mismo so mamatey ed sikato,+ odino onsabi so agew na ipatey to,+ odino sikatoy ompatey ed guerra.+
11 Diad arapan nen Jehova et agkon balot itagey so limak pian onsumpad nilanaan nen Jehova!+ Kanian natan, ipangasim ya alaen so gayang a walad uloan to tan say pananginay danum, insan ta la onla.”
12 Kanian inala nen David so gayang tan say pananginay danum a walad uloan nen Saul, insan la ra linma. Anggapoy akanengneng+ odino akalikas odino abangon ed sikara, ta naugip iran amin, lapud sikaray maitlep a pinaugip nen Jehova.
13 Diad saman et linmad biek a pagpag si David tan inmalagey ed toktok na palandey diad bandad arawi, ya andukey so distansia ed baetan da.
14 Kinmelyaw si David ed saray sundalo tan ed si Abner+ ya anak nen Ner, ya inkuan to: “Narerengel mo ak, Abner?” Inmebat si Abner: “Siopa kan maingal ya ontatawag ed ari?”
15 Inkuan nen David ed si Abner: “Agta sakey kan laki? Tan siopay miparad sika ed Israel? Akin balet et agmo binantayan so katawan mon ari? Ta sakey ed saray sundalo so linma ditan pian pateyen to so katawan mon ari.+
16 Aliwan maabig so ginawam. Unong a mabilay si Jehova, nepeg kan ompatey, ta agmo binantayan so katawan mo, say nilanaan nen Jehova.+ Nengneng kad kaliberliber mo natan! Kawalaan na gayang na ari tan say pananginan toy danum+ a walad uloan to?”
17 Insan abosesan nen Saul si David tan inkuan to: “Sika ’tay mansasalita, ana’kon David?”+ Inmebat si David: “On, siak, katawan kon ari.”
18 Inkuan to: “Akin et uusilan na katawan ko so lingkor to?+ Antoy ginawak, tan antoy kasalanan ko?+
19 Ipangasim, katawan kon ari, dengel mo iray salita na lingkor mo: No si Jehova so amakiwas ed sika ya onsumpad siak, awaten* to komon so apay kon kakanen. Balet no totoo so amakiwas ed sika,+ naayew irad arapan nen Jehova, ta pinataynan da ak natan pian agak la magmaliw a kabiangan ed tawir nen Jehova,+ ya ibabaga ran, ‘La ka, manlingkor kad arum a dirios!’
20 Tan natan, agmo komon abuloyan ya ontedter so dalak diad dalin ya arawi ed arapan nen Jehova, ta pinmaway so ari na Israel pian anapen so sakey labat a temel,+ a singa to uusilan so sakey ya atap a manok ed saray kapalandeyan.”
21 Oniay inyebat nen Saul: “Nankasalanan ak.+ Pawil ka la, ana’kon David, ta agta ka la sakitan, lapud impasen mon mabli so bilay ko*+ ed sayan agew. On, kinmiwas ak a makulangkulang tan baleg so agawaan kon lingo.”
22 Inmebat si David: “Nia so gayang na ari. Paonlam dia so sakey ed saray totoom pian alaen to.
23 Si Jehova so manumang ed balang sakey parad dilin inkatunong+ tan dilin inkamatoor to, ta natan et inyawat ka nen Jehova ed siak, balet agko labay so onsumpad nilanaan nen Jehova.+
24 No panon a pinablik so bilay mo* ed sayan agew, pablien met komon nen Jehova so bilay ko,* tan iliktar to ak komon ed amin a gonigon.”+
25 Oniay inyebat nen Saul ed si David: “Nabendisyonan ka komon, ana’kon David. Seguradon manggawa kay angkakabaleg iran bengatla, tan seguradon ontalona ka.”+ Insan linma lay David, tan pinmawil met lay Saul.+
Paimanod leksab
^ Odino posiblin, “desierto; kalawakan.”
^ Literal, “angoben.”
^ Odino “kamarerwak.”
^ Odino “kamarerwam.”
^ Odino “kamarerwak.”
