Unonan Samuel 31:1-13
-
Impatey nen Saul tan say taloran anak to (1-13)
31 Natan et akilaban iray Filisteo ed Israel.+ Tan batik iray lalaki na Israel pian takasan iray Filisteo, tan amayamay so inatey diad Palandey Gilboa.+
2 Nabotan na saray Filisteo si Saul tan saray ananak to, tan pinatey na saray Filisteo iray ananak nen Saul a si Jonatan,+ Abinadab, tan Malki-sua.+
3 Nagmaliw a grabe so pilalaban ed si Saul, tan sanen sikatoy anengneng na saray managpana, sikatoy graben sinugatan da.+
4 Kanian inkuan nen Saul ed manag-awit na armas to: “Uyos moy espadam tan iduyok mod siak, pian agla onasingger irayan ag-asegat a lalaki+ a manuyok tan manduksa* ed siak.” Balet ag-itan labay a gawaen na manag-awit na armas to, ta natatakot a maong. Kanian inala nen Saul so espada tan tinakbaan to itan.+
5 Sanen anengneng na samay manag-awit na armas ya inatey lay Saul,+ tinakbaan to met so dilin espada to kanian inatey a kaiba to.
6 Kanian diad saman ya agew et inatey si Saul, say taloran ananak to, say manag-awit na armas to, tan amin a totoo to.+
7 Sanen saray totoo na Israel a walad rehyon na lawak* tan rehyon na Jordan et anengneng dan batik la ray lalaki na Israel tan inatey lay Saul tan saray ananak to, tinaynan da ray syudad tan batik ira;+ insan sinmabi iray Filisteo tan nanayam ira ditan.
8 Diad tinmumbok ya agew, sanen linma ray Filisteo pian alaen day kaykayarian na saray inaatey, anengneng day Saul tan say taloran ananak to ya inatey diad Palandey Gilboa.+
9 Kanian pinutot day ulo to tan inala ray armas to tan impaibaga rad interon dalin na saray Filisteo ya ikayat da iyan balita+ diad saray abung* na saray idolo ra+ tan ed saray totoo.
10 Insan inyan day armas to ed abung na saray imahen nen Astoret tan insabit day bangkay to diad padir na Bet-san.+
11 Sanen nadngelan na saray manaayam ed Jabes-gilead+ so ginawa na saray Filisteo ed si Saul,
12 linma so amin a sundalo tan sanlabi ran nambiahe tan inala ray bangkay nen Saul tan say taloran ananak to ya akasabit ed padir na Bet-san. Pinmawil ira ed Jabes tan pinoolan da iratan diman.
13 Insan inala da ray pukel da+ tan inkotkot da ed silong na kiew a tamarisko diad Jabes,+ tan pitoy agew iran nanayunal.
