Unonan Samuel 7:1-17
7 Kanian sinmabi iray lalaki ed Kiriat-jearim tan inala ra so Kaban nen Jehova tan inyakar dad abung nen Abinadab+ a walad pukdol, tan pinasanto ra si Eleazar ya anak to pian manbantay ed Kaban nen Jehova.
2 Andukey a panaon so linmabas, 20 taon ya amin, manlapud samay agew a sinmabid Kiriat-jearim so Kaban, tan say interon sankaabungan na Israel et kinmonsulta* ed si Jehova.+
3 Insan inkuan nen Samuel ed interon sankaabungan na Israel: “No ompawil kayod si Jehova diad interon puso yo,+ ekal yo sirin ed limog yo iray sananey a dirios+ tan saray imahen nen Astoret,+ tan iyapasakey yoy puso yod si Jehova tan sikato labat so panlingkoran yo,+ pian iliktar to kayod lima na saray Filisteo.”+
4 Diad saman et inekal na saray Israelita iray Baal tan saray imahen nen Astoret tan si Jehova labat so nanlingkoran da.+
5 Insan inkuan nen Samuel: “Tipon yod Mizpa+ so interon Israel, tan ipikasi ta kayod si Jehova.”+
6 Kanian nantitipon irad Mizpa, tan nanasol ira na danum tan inkalbo da itan ed arapan nen Jehova tan nanayunal irad saman ya agew.+ Imbaga ra diman: “Nankasalanan kamid si Jehova.”+ Tan ginmapon nanlingkor si Samuel bilang ukom+ ed saray Israelita diad Mizpa.
7 Sanen nadngelan na saray Filisteo a nantitipon ed Mizpa iray Israelita, tinmatdang iray manuley na saray Filisteo+ pian onsumpad Israel. Sanen nadngelan itan na saray Israelita, tinmakot ira lapud saray Filisteo.
8 Kanian inkuan na saray Israelita ed si Samuel: “Agka ontutundan ontawag ed si Jehova a Dios tayo, pian tulongan+ tan iliktar to itayo ed lima na saray Filisteo.”
9 Insan angalay Samuel na sakey a kordero tan inyapay to itan bilang interon apay a popoolan+ parad si Jehova; tan akikasi si Samuel ed si Jehova a tulongan to so Israel, tan sikatoy inebatan nen Jehova.+
10 Legan ya iyaapay nen Samuel so apay a popoolan, inmabante iray Filisteo pian miguerrad Israel. Diad saman ya agew et amawalay Jehova na maksil a karol+ sumpad saray Filisteo, tan winetwet To ra,+ kanian atalo rad Israel.+
11 Diad saman et pinmaway ed Mizpa iray lalaki ed Israel tan inusilan da ray Filisteo tan pinapatey da ra ya anggad abalaten na Bet-car.
12 Insan angalay Samuel na sakey a bato+ tan inyan tod baetan na Mizpa tan Jesana tan inngaran to itan ya Ebenezer,* ta inkuan to: “Anggad natan et tutulongan itayo nen Jehova.”+
13 Kanian atalo iray Filisteo, tan agla ra linmad teritorya na Israel;+ tan nantultuloy a sinumpa nen Jehova iray Filisteo diad amin ya agew nen Samuel.+
14 Ontan met, abawi na Israel iray syudad ya inala na saray Filisteo ed Israel, manlapud Ekron ya anggad Gat, tan abawi na Israel so teritorya ra ed lima na saray Filisteo.
Niwala met so kareenan ed baetan na Israel tan saray Amoreo.+
15 Nantultuloy ya angukom ed Israel si Samuel legay bilay to.+
16 Sikatoy tinaon a manbiabiahe tan liliberen toy Bethel,+ Gilgal,+ tan Mizpa,+ tan sikatoy manguukom ed Israel diad saratan ya amin a pasen.
17 Balet sikatoy ompapawil ed Rama,+ ta diman so kawalaay abung to, tan diman to met uukomen so Israel. Sikatoy nanggawa diman na sakey ya altar parad si Jehova.+
