Komaduan Arari 1:1-18
-
Impropesiya nen Elias so ipatey nen Ahazias (1-18)
1 Kayari impatey nen Ahab, say Moab+ et nanrebelde ed Israel.
2 Diad saman, si Ahazias et naplag manlapud sinakoban ya abot diad tagey a kuarto to ed Samaria tan arisgo. Kanian impatawag to ray mensahero to tan inkuan tod sikara: “La kayo, tupleg kayod si Baal-zebub a dios na Ekron+ no kasin onabig ak ni.”+
3 Balet oniay inkuan na anghel nen Jehova ed si Elias*+ a Tisbita: “Alagey ka, abet mo ray mensahero na ari na Samaria tan ibagam ed sikara, ‘Kasin anggapoy Dios ed Israel kanian onla kayon ontupleg ed si Baal-zebub a dios na Ekron?+
4 Et oniay inkuan nen Jehova: “Agka la makaalis ed dukolan mo, ta ompatey ka la.”’” Diad ontan et linmay Elias.
5 Sanen pinmawil iramay mensahero ed si Ahazias, inkuan tod sikara: “Akin et pinmawil kayo?”
6 Inmebat ira: “Walay lakin inmabet ed sikami, tan inkuan to, ‘La kayo, pawil kayod ari ya angibakid sikayo tan ibaga yod sikato, “Oniay inkuan nen Jehova: ‘Kasin anggapoy Dios ed Israel kanian angibaki ka na ontupleg ed si Baal-zebub a dios na Ekron? Lapud satan et agka la makaalis ed dukolan mo, ta ompatey ka la.’”’”+
7 Et tinepet tod sikara: “Antoy itsura to may lakin angabet ed sikayo tan angibagad satan?”
8 Oniay ebat da: “Akasulong na kawes a gawad bago+ tan akabalkes na katat so awak to.”+ Inkuan ton tampol: “Si Elias a Tisbita man.”
9 Et angibaki so ari ed kinen Elias na sakey a pangulo na 50 a kaibay 50 sundalo to. Sanen sikatoy tinmatdang pian onlad si Elias, anengneng ton manyudyurong ed toktok na palandey. Et inkuan tod si Elias: “Too na tuan Dios,+ imbaga na ari, ‘Lasur ka.’”
10 Balet oniay ebat nen Elias ed samay pangulo na 50: “No sakey ak a too na Dios, ompelag komon manlapud tawen so apoy+ a mangupot ed sika tan say 50 sundalom.” Et pinmelag so apoy manlapud tawen ya angupot ed sikato tan say 50 sundalo to.
11 Kanian angibaki lamet so ari ed kinen Elias na sananey a pangulo na 50 a kaibay 50 sundalo to. Et sikatoy linma tan inkuan tod si Elias: “Too na tuan Dios, oniay imbaga na ari, ‘Lasur ka, apuram.’”
12 Balet oniay ebat nen Elias ed sikara: “No sakey ak a too na tuan Dios, ompelag komon manlapud tawen so apoy a mangupot ed sika tan say 50 sundalom.” Tan manlapud tawen et pinmelag so apoy a nanlapud Dios ya angupot ed sikato tan say 50 sundalo to.
13 Insan angibaki lamet so ari na komatlon pangulo na 50 tan say 50 sundalo to. Balet samay komatlon pangulo na 50 et tinmatdang tan tinmalimukor diad arapan nen Elias tan akikasid sikato tan inkuan to: “O too na tuan Dios, panangasim, kawananen mo komon so bilay ko tan say bilay* na sarayan 50 lingkor mo.
14 Pinmelag lay apoy manlapud tawen ya angupot ed samay duaran pangulo na 50 tan saray grupo ra a tunggal 50, balet natan et kawananen mo komon so bilay ko.”*
15 Diad ontan et imbaga na anghel nen Jehova ed kinen Elias: “Mila kad sikato. Agka natatakot ed sikato.” Kanian sikatoy akila tan linma rad ari.
16 Et imbaga nen Elias ed ari, “Oniay inkuan nen Jehova: ‘Angibaki ka na saray mensahero ya ontupleg ed si Baal-zebub a dios na Ekron.+ Kasin say rason et anggapoy Dios ed Israel?+ Akin et agmo inamta no antoy ibaga to? Lapud satan et agka la makaalis ed dukolan mo, ta ompatey ka la.’”
17 Kanian sikatoy inatey, unong ed mensahe nen Jehova ya imbaga nen Elias; tan lapud anggapoy anak ton laki, si Jehoram*+ so nagmaliw ya ari a kasalat to, diad komaduan taon na uley nen Jehoram+ ya anak nen Jehosafat ya ari na Juda.
18 Tan saray arum nin agawa ed si Ahazias,+ say kimey to, et akasulat ed libro na saray agawa diad panaon na arari na Israel.
Paimanod leksab
^ Kabaliksan toy “Si Jehova so Dios Ko.”
^ Odino “so kamarerwak tan say kamarerwa.”
^ Odino “kamarerwak.”
^ Salanti, agi nen Ahazias.
