Komaduan Arari 12:1-21
12 Diad komapiton taon na uley nen Jehu,+ si Jehoas+ et nagmaliw ya ari, tan 40 taon a nanuley ed Jerusalem. Say ngaran na ina to et Zibia a taga Beer-sheba.+
2 Si Jehoas et nantultuloy a nanggaway duga ed pakanengneng nen Jehova diad amin ya agew a sikatoy ibabangat nen Jehoiada a saserdote.
3 Balet saray atagey a pasen+ et agnaandi, tan saray totoo et siansia nin manbabagat tan manpapaasewek na bagat diad saray atagey a pasen.
4 Et oniay inkuan nen Jehoas ed saray saserdote: “Ala yoy amin a kuartan aawiten ed abung nen Jehova parad masanton apay,+ salanti, saray kuartan inggeter ed kada sakey ya ibayar to,+ saray kuartan iiter bilang mipetekan a kantidad parad sakey a too,* tan amin a kuartan manlalapud balang sakey ya apakiwas so puso ton awiten ed abung nen Jehova.+
5 Personal ya alaen itan na saray saserdote ed saray mandodonasyon ed sikara* tan usaren da itan pian apigeren so antokaman a deral* ed abung.”+
6 Diad koma-23 taon na uley nen Arin Jehoas, agnin siansia inapiger na saray saserdote iray deral ed abung.+
7 Kanian tinawag nen Arin Jehoas si Jehoiada+ a saserdote tan saray arum nin saserdote tan inkuan tod sikara: “Akin et agyo aapigeren iray deral ed abung? Agki la sirin mangaalay kuarta ed saray mandodonasyon ed sikayo likud labat no usaren itan ed pangapiger ed abung.”+
8 Et inmabuloy iray saserdote ya agla ra mangalay kuarta ed saray totoo tan agda la responsabilidad so pangapiger ed abung.
9 Diad ontan et angalay Jehoiada a saserdote na sakey a kaban+ tan binutawan tod sakob tan inyan tod abay na altar diad nikawanan no onloob so sakey ed abung nen Jehova. Ditan ipepelag na saray saserdoten bantay na puerta so amin a kuartan aawiten ed abung nen Jehova.+
10 Kapagno nanengneng dan dakdakel lay kuarta ed kaban, say sekretaryo na ari tan say atagey a saserdote et onla tan kolektaen* tan bilangen day kuartan aawiten ed abung nen Jehova.+
11 Iiter day kuartan abilang da ed saramay aturon mangasikaso ed kimey diad abung nen Jehova. Insan ibabayar da iya ed saray karpentero tan saray managpaalagey a mankikimey diad abung nen Jehova,+
12 pati ed saray mason tan saray managtabas na bato. Mangasaliw met ira na saray troso tan saray tinabas a bato parad pangapiger ed saray deral ed abung nen Jehova tan uusaren day kuarta parad amin nin gastos ed pangapiger na abung.
13 Balet, anggapo ed samay kuartan aawiten ed abung nen Jehova so inusar ed panggawa na saray palangganan pilak, panag-erep, yaong, trumpeta,+ odino antokaman nin klase na kagawaan a balitok odino pilak diad abung nen Jehova.+
14 Say pangiiteran da labat ed satan et saramay manangasikaso na kimey, a saya et uusaren da ed pangapiger na abung nen Jehova.
15 Agda la uusisaen iramay lalakin pangiiteran day kuarta ya ibabayar ed saray komikimey, ta napanmatalkan ira.+
16 Balet saray kuartan iiter bilang apay parad impakasumlang+ tan saray kuartan iiter bilang apay parad kasalanan et ag-aawiten ed abung nen Jehova; para itan ed saray saserdote.+
17 Diad saman, si Hazael+ ya ari na Sirya et linman akilaban ed Gat+ tan sinakop to itan, insan denesidi ton atakien so* Jerusalem.+
18 Et inala nen Arin Jehoas na Juda so amin a masanton apay a pinasanto na saray inmuunan atateng to a di Jehosafat, Jehoram, tan Ahazias, ya arari na Juda, pati saray masanton apay to tan amin a balitok diad pasen a pangiinay kayamanan ed abung nen Jehova tan ed abung* na ari, tan impawit tod si Hazael ya ari na Sirya.+ Kanian agla iya tinmuloy ed Jerusalem.
19 Tan saray arum nin agawa ed si Jehoas, say amin a kimey to, et akasulat ed libro na saray agawa diad panaon na arari na Juda.
20 Balet, saray lingkor nen Jehoas et nankokomplot+ tan sikatoy pinatey da diad panag-amotan a Pukdol,*+ diad dalan a palasur ed Sila.
21 Saray lingkor ton si Jozacar ya anak nen Simeat tan si Jehozabad ya anak nen Somer so angabil tan amatey ed sikato.+ Sikatoy imponpon da a kaiba na saray inmuunan atateng to diad Syudad nen David, tan si Amazias ya anak to so nagmaliw ya ari a kasalat to.+
Paimanod leksab
^ Odino “kamarerwa.”
^ Odino “saray kabat da.”
^ Odino “letak.”
^ Odino “ikarga rad saray supot.” Literal, “bedberen.”
^ Literal, “inyarap nen Hazael so lupa to pian ontatdang sumpad.”
^ Odino “palasyo.”
^ Odino “diad Bet-milo.”
