Komaduan Arari 15:1-38
15 Diad koma-27 taon na uley nen Arin Jeroboam* na Israel, si Azarias*+ ya anak nen Arin Amazias+ na Juda et nagmaliw ya ari.+
2 Sikatoy mantaon na 16 sanen nagmaliw ya ari, tan 52 taon a nanuley ed Jerusalem. Say ngaran na ina to et Jecolia a taga Jerusalem.
3 Sikatoy nantultuloy a nanggaway duga ed pakanengneng nen Jehova, a singa ginawa nen Amazias ya ama to.+
4 Balet saray atagey a pasen et agnaandi,+ tan saray totoo et siansia nin manbabagat tan manpapaasewek na bagat diad saray atagey a pasen.+
5 Si Jehova et angidapo na sakit ed ari, kanian sikatoy akating+ ya anggad agew na impatey to; tan sikatoy nanayam ed arum ya abung,+ legan a si Jotam+ ya anak to so mangaasikaso ed abung* tan manguukom ed saray totoo diad dalin da.+
6 Tan saray arum nin agawa ed si Azarias,+ say amin a kimey to, et akasulat ed libro na saray agawa diad panaon na arari na Juda.
7 Tan si Azarias et nampainawa la a kaiba na saray inmuunan atateng to,+ tan sikatoy imponpon da diad Syudad nen David a kaiba na saray inmuunan atateng to; tan si Jotam ya anak to so nagmaliw ya ari a kasalat to.
8 Diad koma-38 taon na uley nen Arin Azarias+ na Juda, si Zacarias+ ya anak nen Jeroboam et nagmaliw ya ari ed Israel legan a walad Samaria, tan anem bulan a nanuley.
9 Ginawa to so mauges ed pakanengneng nen Jehova, a singa ginawa na saray inmuunan atateng to. Agto pinaliisan iray kasalanan nen Jeroboam ya anak nen Nebat ya inlagyat ton gawaen na Israel.+
10 Et akikomplot sumpad sikato si Salum ya anak nen Jabes, ya amatey ed sikato+ diad Ibleam.+ Kayari ton pinatey, sikatoy nagmaliw ya ari a kasalat to.
11 Tan saray arum nin agawa ed si Zacarias et akasulat ed libro na saray agawa diad panaon na arari na Israel.
12 Satan so kasumpalan na samay imbaga nen Jehova ed si Jehu: “Say apatiran henerasyon na ananak mon lalaki+ et onyurong diad trono na Israel.”+ Et ontan so agawa.
13 Si Salum ya anak nen Jabes et nagmaliw ya ari diad koma-39 a taon na uley nen Arin Uzias na Juda,+ tan sakey bulan a nanuley legan a walad Samaria.
14 Et tinmatdang manlapud Tirza+ si Menahem ya anak nen Gadi tan linmad Samaria tan pinatey toy Salum+ ya anak nen Jabes. Kayari ton pinatey, sikatoy nagmaliw ya ari a kasalat to.
15 Tan saray arum nin agawa ed si Salum tan say impikomplot to et akasulat ed libro na saray agawa diad panaon na arari na Israel.
16 Diad saman, si Menahem et sinmabi manlapud Tirza tan inmataki ed Tifsa tan pinapatey toy amin a wadtan tan saray walad teritorya na satan, lapud agda nilukasan iray puerta. Inataki to itan tan binubutyakan to ray malukon ditan.
17 Diad koma-39 a taon na uley nen Arin Azarias na Juda, si Menahem ya anak nen Gadi et nagmaliw ya ari ed Israel, tan samploy taon a nanuley legan a walad Samaria.
18 Sikatoy nantultuloy a nanggaway mauges ed pakanengneng nen Jehova. Diad amin ya agew to et agto pinaliisan so amin a kasalanan nen Jeroboam ya anak nen Nebat ya inlagyat ton gawaen na Israel.+
19 Si Arin Pul+ na Asirya et linma ed dalin na Israel, tan sikatoy inikdan nen Menahem na 1,000 talenton* pilak pian tulongan ton pabiskegen so uley to ed panarian.+
20 Kanian pinawala nen Menahem itan a pilak manlapud Israel, ya impanbayar to ray prominente tan mayayaman a lalaki.+ Inter tod ari na Asirya so inala ton 50 siklo* a pilak ed kada sakey. Kanian amawil lay ari na Asirya tan agnansiansia ed dalin da.
21 Tan saray arum nin agawa ed si Menahem,+ say amin a kimey to, et akasulat ed libro na saray agawa diad panaon na arari na Israel.
22 Tan si Menahem et nampainawa la a kaiba na saray inmuunan atateng to; tan si Pekahias ya anak to so nagmaliw ya ari a kasalat to.
23 Diad koma-50 taon na uley nen Arin Azarias na Juda, si Pekahias ya anak nen Menahem et nagmaliw ya ari ed Israel legan a walad Samaria, tan duay taon a nanuley.
24 Sikatoy nantultuloy a nanggaway mauges ed pakanengneng nen Jehova. Agto pinaliisan iray kasalanan nen Jeroboam ya anak nen Nebat ya inlagyat ton gawaen na Israel.+
25 Tan say ayudante ton si Peka+ ya anak nen Remalias et akikomplot sumpad sikato tan kinabil to diad Samaria, diman ed malet a tori na abung* na ari a kaibay Argob tan Arye. Walay kaiba ton 50 lalaki a taga Gilead; tan kayari ton pinatey, sikatoy nagmaliw ya ari a kasalat to.
26 Tan saray arum nin agawa ed si Pekahias, say amin a kimey to, et akasulat ed libro na saray agawa diad panaon na arari na Israel.
27 Diad koma-52 taon na uley nen Arin Azarias na Juda, si Peka+ ya anak nen Remalias et nagmaliw ya ari ed Israel legan a walad Samaria, tan 20 taon a nanuley.
28 Sikatoy nantultuloy a nanggaway mauges ed pakanengneng nen Jehova, tan agto pinaliisan iray kasalanan nen Jeroboam ya anak nen Nebat ya inlagyat ton gawaen na Israel.+
29 Diad panaon nen Arin Peka na Israel, si Arin Tiglat-pileser+ na Asirya et inmataki tan sinakop toy Ijon, Abel-bet-maaca,+ Janoa, Kedes,+ Hazor, Gilead,+ tan Galilea, amin a dalin na Neftali,+ tan saray manaayam ditan et inaawit tod Asirya.+
30 Si Hosea+ ya anak nen Elah et akikomplot sumpad si Peka ya anak nen Remalias, tan sikatoy kinabil to tan pinatey to; tan sikatoy nagmaliw ya ari a kasalat to diad koma-20 taon na uley nen Jotam+ ya anak nen Uzias.
31 Tan saray arum nin agawa ed si Peka, say amin a kimey to, et akasulat ed libro na saray agawa diad panaon na arari na Israel.
32 Diad komaduan taon na uley nen Peka ya anak nen Remalias ya ari na Israel, si Jotam+ ya anak nen Arin Uzias+ na Juda et nagmaliw ya ari.
33 Sikatoy mantaon na 25 sanen nagmaliw ya ari, tan 16 taon a nanuley ed Jerusalem. Say ngaran na ina to et Jerusa ya anak nen Zadok.+
34 Sikatoy nantultuloy a nanggaway duga ed pakanengneng nen Jehova, a singa ginawa nen Uzias ya ama to.+
35 Balet saray atagey a pasen et agnaandi, tan saray totoo et siansia nin manbabagat tan manpapaasewek na bagat diad saray atagey a pasen.+ Sikato so angipaalagey na bandad tagey a puerta na abung nen Jehova.+
36 Tan saray arum nin agawa ed si Jotam, say kimey to, et akasulat ed libro na saray agawa diad panaon na arari na Juda.
37 Diad saman a panaon, si Jehova et ginapoan ton imbaki si Rezin ya ari na Sirya tan si Peka+ ya anak nen Remalias pian atakien so Juda.+
38 Tan si Jotam et nampainawa la a kaiba na saray inmuunan atateng to tan sikatoy imponpon a kaiba ra diad Syudad nen David ya inmunan ateng to. Tan si Ahaz ya anak to so nagmaliw ya ari a kasalat to.
Paimanod leksab
^ Salanti, si Jeroboam II.
^ Kabaliksan toy “Tinmulong si Jehova.” Tinawag ya Uzias diad 2Ar 15:13; 2Aw 26:1-23; Isa 6:1; tan Zac 14:5.
^ Odino “palasyo.”
^ Say sakey a talento et 34.2 kilo. Nengnengen so Apendise B14.
^ Say sakey a siklo et 11.4 gramo. Nengnengen so Apendise B14.
^ Odino “palasyo.”
