Komaduan Arari 16:1-20
16 Diad koma-17 taon na uley nen Peka ya anak nen Remalias, si Ahaz+ ya anak nen Arin Jotam na Juda et nagmaliw ya ari.
2 Si Ahaz et mantaon na 20 sanen nagmaliw ya ari, tan 16 taon a nanuley ed Jerusalem. Agto ginawa so duga ed pakanengneng nen Jehova a Dios to a singa ed ginawa nen David ya inmunan ateng to.+
3 Imbes, sikatoy nanakar ed dalan a nanakaran na saray arari na Israel,+ tan imparalan to ni ingen ed apoy so dilin anak to,+ ya inalig to ray makapadimlan kagagawa na saray nasyon+ a pinataynan nen Jehova diad arapan na saray Israelita.
4 Sikatoy manbabagat met tan manpapaasewek na bagat diad saray atagey a pasen,+ diad saray pukdol, tan diad silong na kada masalompapak a kiew.+
5 Diad saman, si Arin Rezin na Sirya tan si Peka ya anak nen Remalias ya ari na Israel et linma pian miguerra ed Jerusalem.+ Kinubkob da itan pian atakien si Ahaz, balet agda asakop so syudad.
6 Diad saman et impawil nen Arin Rezin na Sirya so Elat+ ed Edom, insan pinaekal tod Elat iray Judio.* Tan saray Edomita et linmad Elat, tan nanayam ira ditan ya anggad sayan agew.
7 Kanian si Ahaz et angibaki na saray mensahero ed si Arin Tiglat-pileser+ na Asirya tan impaibaga to: “Lingkor mo ak tan anak mo ak. Komon ta onla ka dia tan iliktar mo ak ed ari na Sirya tan ed ari na Israel, saramay onaataki ed siak.”
8 Insan inaala nen Ahaz iray pilak tan balitok ed abung nen Jehova tan ed saray pasen a pangiinay kayamanan ed abung* na ari, insan impawit to bilang pasuksok ed ari na Asirya.+
9 Et ginawa na ari na Asirya so kerew to, a linmad Damasco tan sinakop to itan tan saray totoo ditan et imbantak tod Kir,+ tan pinatey toy Rezin.+
10 Diad saman et linmay Arin Ahaz ed Damasco pian minengneng ed kinen Arin Tiglat-pileser na Asirya. Sanen anengneng nen Arin Ahaz so altar ed Damasco, impawit tod si Urias a saserdote so plano na altar, a wadman so amin a detalye tan no panon itan a ginawa.+
11 Ginawa nen Urias+ a saserdote so altar+ unong ed instruksion a walad samay impawit nen Arin Ahaz manlapud Damasco. Sinumpal itan nen Urias a saserdote antis a makapawil si Arin Ahaz manlapud Damasco.
12 Kapawil na ari manlapud Damasco tan anengneng toy altar, inmasingger ed altar tan angiyapay ditan.+
13 Tan diad satan ya altar et sikatoy nantultuloy a nampaasewek na apay to a popoolan tan apay to a kakanen; ikakalbo to met ditan so apay to ya iinumen tan iwawalsik toy dala na saray bagat to a pandurungoan.
14 Insan samay gansan altar+ a walad arapan nen Jehova et inekal nen Ahaz manlapud kawalaan na satan diad arap na abung, diman ed pegley na dilin altar to tan diad abung nen Jehova, tan inyan tod bandad amianen na dilin altar to.
15 Tan oniay ingganggan nen Arin Ahaz ed si Urias+ a saserdote: “Diad baleg ya altar et manpaasewek ka na apay a popoolan diad kabuasan,+ apay a kakanen diad labi,+ tan apay a popoolan tan apay a kakanen na ari, pati saray apay a popoolan, saray apay a kakanen, tan saray apay ya iinumen na amin a totoo. Iwalsik mo met ditan so amin a dala na saray apay a popoolan tan amin a dala na saray arum nin bagat. Et samay gansan altar, akauley ak la no antoy gawaen ed satan.”
16 Tan ginawa nen Urias a saserdote so amin ya ingganggan nen Arin Ahaz.+
17 Ontan met, binabagbag nen Arin Ahaz iray kariton,+ ya ineekal to ray rektanggulon dingding tan saray palanggana ra,+ tan say Dayat et inekal tod saray gansan baka+ ya akatoonan na satan insan inggaton tod datal a bato.+
18 Tan say naatepan a pasen ya uusaren no Sabaton ya impaalagey da diad abung tan say puertan lolooban na ari ed abung nen Jehova et inekal to; ginawa to itan lapud ari na Asirya.
19 Tan saray arum nin agawa ed si Ahaz, say kimey to, et akasulat ed libro na saray agawa diad panaon na arari na Juda.+
20 Tan si Ahaz et nampainawa la a kaiba na saray inmuunan atateng to tan sikatoy imponpon a kaiba ra diad Syudad nen David; tan si Hezekias*+ ya anak to so nagmaliw ya ari a kasalat to.
Paimanod leksab
^ Odino “iray totoo na Juda.”
^ Odino “palasyo.”
^ Kabaliksan toy “Si Jehova so Mamapabiskeg.”
