Komaduan Arari 17:1-41
17 Diad koma-12 taon na uley nen Arin Ahaz na Juda, si Hosea+ ya anak nen Elah et nagmaliw ya ari ed Israel legan a walad Samaria; sikatoy nanuley na siameran taon.
2 Sikatoy nantultuloy a nanggaway mauges ed pakanengneng nen Jehova, balet aliwan singa kauges na saray arari na Israel ya akaunad sikato.
3 Si Arin Salmaneser na Asirya et inmatakid si Hosea+ tan nagmaliw a lingkor to tan ginmapon manbayar na buis ed sikato.+
4 Balet naamtaan na ari na Asirya a mikokomplot si Hosea, ta sikatoy angibaki na saray mensahero ed kinen Arin So na Ehipto+ tan agnambayar na buis ed ari na Asirya a singa nen imbebeneg a taon. Kanian sikatoy inkulong tan binalor na ari na Asirya diad prisoan.
5 Et nilusob na ari na Asirya so interon dalin da, tan akasabid Samaria tan kinubkob to itan diad loob na taloy taon.
6 Diad komasiam a taon na uley nen Hosea, asakop na ari na Asirya so Samaria.+ Insan imbantak to ray totoo na Israel+ diad Asirya tan impanayam to ra ed Hala tan ed Habor a walad abay na ilog Gozan+ tan diad saray syudad na saray Medo.+
7 Agawa itan lapud nankasalanan iray totoo na Israel ed si Jehova a Dios da, ya angipaway ed sikara diad dalin na Ehipto manlapud uley na Faraon ya ari na Ehipto.+ Nandayew* ira ed arum a dirios,+
8 tinumbok da ray kustombre na saray nasyon a pinataynan nen Jehova diad arapan na saray Israelita, tan tinumbok da ray kustombre ya inletneg na saray arari na Israel.
9 Tinumbok na saray Israelita iray bengatlan aliwan duga ed pakanengneng nen Jehova a Dios da. Nantultuloy iran angipaalagey na saray atagey a pasen ed amin a syudad da,+ manlapud panagbantayan ya anggad apadiran a syudad.*
10 Nantultuloy iran angiletneg na saray sagradon lusek da tan saray sagradon poste*+ ra diad kada atagey a pukdol tan diad silong na kada masalompapak a kiew;+
11 tan diad amin ya atagey a pasen et manpapaasewek ira na bagat a singa ginawa na saray nasyon a pinataynan nen Jehova diad arapan da tan imbantak tod arum a pasen.+ Nantultuloy iran nanggawa na saray mauges a bengatla pian sakitan so liknaan nen Jehova.
12 Nantultuloy iran nanlingkor ed saray makapadimlan idolo,*+ a nipaakar ed satan et imbaga nen Jehova ed sikara: “Agyo itan gagawaen!”+
13 Lanang a papasakbayan nen Jehova so Israel tan Juda diad panamegley na amin a propeta to tan amin a makakanengneng na pasingawey,+ a kuan to: “Taynan yo ray mauges a kagagawa yo!+ Unor yo ray bilin ko tan saray totontonen ko unong ed amin a ganggan ya inter kod saray inmuunan atateng yo tan impasabik ed sikayo diad panamegley na saray lingkor ko a propeta.”
14 Balet ag-ira dinmengel, tan nansiansia ran benger a singa* saray inmuunan atateng da ya ag-angipatnag na pananisia ed si Jehova a Dios da.+
15 Intultuloy dan impulisay iray inter ton totontonen, say impisipanan tod+ saray inmuunan atateng da, tan saray panonot ya inter to pian pasakbayan ira,+ tan nantultuloy iran nandayew ed saray andi-kakanaan ya idolo+ tan nagmaliw met iran andi-kakanaan,+ ya inalig da ray nasyon ed kaliberliber da, saramay imbaga nen Jehova ya agda nepeg ya aligen.+
16 Tan lanang dan susumlangen so amin a ganggan nen Jehova a Dios da, tan nanggawa ra na saray metal ya estatua na duaran kilaw a baka+ tan sakey a sagradon poste,*+ tan dinmakmomo rad amin a bengatla ed tawen+ tan nanlingkor irad si Baal.+
17 Imparalan da met ed apoy iray ananak dan lalaki tan bibii,+ akibiang ira ed panagparles+ tan nananap ira na saray tanda, tan intalaga* day sarili ra ed panggaway mauges diad pakanengneng nen Jehova, pian sakitan day liknaan to.
18 Diad ontan et sinmanok a maong si Jehova ed Israel, kanian inekal to rad arapan to.+ Anggapoy inkera to noag say tribu na Juda labat.
19 Anggan say Juda et ag-inmunor ed saray ganggan nen Jehova a Dios da;+ inalig da met iray kustombre a tinumbok na Israel.+
20 Et impulisay nen Jehova so amin a kailalakan na Israel tan inyabeba to ra tan inyawat to rad saray managsamsam, anggad pinataynan to rad arapan to.
21 Inekal toy Israel ed sankaabungan nen David, tan ginawa ran ari si Jeroboam ya anak nen Nebat.+ Balet lapud si Jeroboam et agla tinmumbok so Israel ed si Jehova, tan inlagyat to ran manggawa na baleg a kasalanan.
22 Tan saray totoo na Israel et inalig day amin a kasalanan nen Jeroboam.+ Agda iratan pinaliisan
23 anggad inekal ira nen Jehova ed arapan to, unong ya imbaga to diad panamegley na amin a lingkor ton propeta.+ Kanian say Israel et inala manlapud dalin to tan nibantak ed Asirya+ tan wadman ira anggad sayan agew.
24 Insan say ari na Asirya et angawit na totoo manlapud Babilonia, Cuta, Ava, Hamat, tan Sefarvaim+ tan impanayam to rad saray syudad na Samaria a kasalat na saray Israelita; tan kinayarian day Samaria tan nanayam irad saray syudad ditan.
25 Diad kagapoy impanayam dad man et agda tatakotan* si Jehova. Kanian angibaki si Jehova na saray leon,+ ya amatey ed arum ed saray totoo.
26 Et oniay imbalita ed ari na Asirya: “Saray nasyon ya imbantak mo tan impanayam mod saray syudad na Samaria et agda amta so panagdayew ed Dios na sayan dalin. Kanian sikatoy mangibabaki na saray leon a mamapatey ed sikara, ta anggapod sikara so makaamta na panagdayew ed Dios na sayan dalin.”
27 Et oniay ingganggan na ari na Asirya: “Papawil yo diman so sakey ed saray saserdoten nibantak dia, pian manayam diman tan ibangat to ra ed panagdayew ed Dios na saman a dalin.”
28 Kanian sakey ed saray saserdote ya imbantak da manlapud Samaria et pinmawil pian manayam ed Bethel,+ tan ginapoan to ran imbangat no panon dan takotan* si Jehova.+
29 Balet, kada nasyon et nanggawa na sarili ton dios,* ya inyan dad saray abung a panagdayewan diad saray atagey a pasen a ginawa na saray Samaritano; ontan so ginawa na kada nasyon diad saray syudad a panaayaman da.
30 Saramay taga Babilonia et nanggawa na imahen nen Sucot-benot, saramay taga Cut et nanggawa na imahen nen Nergal, saramay taga Hamat+ et nanggawa na imahen nen Asima,
31 tan saray Aveo et nanggawa na imahen nen Nibhaz tan Tartak. Saray Sefarvita et popoolan da ray ananak dan lalaki pian iyapay ed si Adramelec tan Anamelec, a dirios na Sefarvaim.+
32 Anggano tatakotan day Jehova, anuro ira manlapud karaklan na saray saserdote parad saray atagey a pasen, tan saraya so nanlingkor parad sikara diad saray abung a panagdayewan diad saray atagey a pasen.+
33 Kanian tatakotan day Jehova, balet dadayewen day sarili ran dirios unong ed relihyon* na saray nasyon a pinataynan ed sikara.+
34 Anggad sayan agew et tutumboken da ni iramay datin relihyon* da. Anggapod sikara so mandadayew* ed si Jehova, tan anggapoy manguunor ed saray inter ton totontonen, saray panangukom to, say Ganggan, tan say bilin ya inter nen Jehova ed saray ananak nen Jacob, a say ngaran to et sinalatan to na Israel.+
35 Sanen akisipanan si Jehova ed sikara,+ ingganggan to ra: “Agkayo ontatakot ed arum a dirios, tan agkayo ondadakmomo odino manlilingkor odino manbabagat ed sikara.+
36 Si Jehova, ya angipaway ed sikayo ed dalin na Ehipto diad panamegley na baleg a pakayari tan akaunat a taklay to,+ so Dios a nepeg yon takotan,+ tan sikato so nepeg yon dakmomoan, tan sikato so nepeg yon pangibagatan.
37 Tan saray pananontonan, saray panangukom, say Ganggan, tan say bilin ya insulat to parad sikayo+ et naynay a nepeg yon maalwar ya unoren, tan agyo nepeg a takotan so arum a dirios.
38 Tan agyo nepeg a lingwanan so impisipanan kod sikayo,+ tan agyo nepeg a takotan so arum a dirios.
39 Si Jehova a Dios yo so nepeg yon takotan, ta sikato so mangiliktar ed sikayo ed lima na amin a kakabusol yo.”
40 Balet ag-ira inmunor, tan tinumbok da may datin relihyon* da.+
41 Kanian sarayan nasyon et tinmakot ed si Jehova,+ balet manlilingkor met ira ed saray sarili ran imahen. Anggad sayan agew et gagawaen na saray ananak da tan apo ra so singa ed ginawa na saray inmuunan atateng da.
Paimanod leksab
^ Literal, “Tinmakot.”
^ Salanti, diad amin a pasen, daiset man odino dakel so manaayam.
^ Say Hebreon termino na saya et nayarin mikonektaan ed salita parad “tai na ayep” tan uusaren a panmudmora.
^ Literal, “pinaawet day beklew da a singa ed saray beklew na.”
^ Literal, “ilalako.”
^ Odino “dadayewen.”
^ Odino “dayewen.”
^ Odino “dirios.”
^ Odino “relihyoso iran kustombre.”
^ Literal, “ontatakot.”
^ Odino “relihyoso iran kustombre.”
^ Odino “relihyoso iran kustombre.”
