Komaduan Arari 18:1-37
18 Diad komatlon taon na uley nen Hosea+ ya anak nen Elah ya ari na Israel, si Hezekias+ ya anak nen Arin Ahaz+ na Juda et nagmaliw ya ari.
2 Sikatoy mantaon na 25 sanen nagmaliw ya ari, tan 29 taon a nanuley ed Jerusalem. Say ngaran na ina to et Abi* ya anak nen Zacarias.+
3 Sikatoy nantultuloy a nanggaway duga ed pakanengneng nen Jehova,+ a singa ginawa nen David ya inmunan ateng to.+
4 Sikato so angekal ed saray atagey a pasen,+ minemekmek to ray sagradon lusek, tan intumba toy sagradon poste.*+ Tinetemek to met imay gansan uleg a ginawa nen Moises;+ ta anggad saman a panaon et siansia nin manpapaasewek na bagat ed satan iray totoo na Israel tan tatawagen itan a gansan uleg ya idolo.*
5 Sikatoy nanmatalek ed si Jehova+ a Dios na Israel; diad amin ya arari na Juda et anggapoy makapiparad sikato, balanglan saramay sinmublay odino akauna ed sikato.
6 Sikatoy nansiansian matoor ed si Jehova.+ Nantultuloy a tinmumbok ed sikato; naynay ton uunoren iray ganggan ya inter nen Jehova ed si Moises.
7 Tan si Jehova et walad sikato. Diad amin a ginawa to et sikatoy kinmiwas a marunong. Sikatoy nanrebelde ed ari na Asirya tan agto labay a panlingkoran.+
8 Tinalo to met iray Filisteo+ ya anggad Gaza tan saray teritorya na satan, manlapud panagbantayan ya anggad apadiran a syudad.*
9 Diad komapat a taon na uley nen Arin Hezekias, a komapiton taon na uley nen Hosea+ ya anak nen Elah ya ari na Israel, si Arin Salmaneser na Asirya et inataki toy Samaria tan ginapoan ton kubkoben itan.+
10 Asakop da itan+ sanen manampot lay taloy taon; diad komanem a taon na uley nen Hezekias, diad komasiam a taon na uley nen Arin Hosea na Israel et asakop so Samaria.
11 Insan say ari na Asirya et imbantak toy Israel+ diad Asirya tan impanayam to ra ed Hala tan ed Habor a walad abay na ilog Gozan tan diad saray syudad na saray Medo.+
12 Agawa iya lapud agda dinengel si Jehova a Dios da noagta lanang dan susumlangen so sipanan to, say amin ya ingganggan nen Moises a lingkor nen Jehova.+ Ag-ira dinmengel odino tinmulok.
13 Diad koma-14 a taon na uley nen Arin Hezekias, inataki nen Senakerib ya ari na Asirya+ so amin ya apadiran a syudad na Juda tan sinakop to iratan.+
14 Kanian oniay impaibaga nen Arin Hezekias na Juda ed ari na Asirya diad Lakis: “Alingo ak. Agmo la komon itutuloy so iyaatakim, tan iter koy antokaman a kerewen mod siak.” Et impanmulta na ari na Asirya si Arin Hezekias na Juda na 300 a talenton* pilak tan 30 talenton balitok.
15 Kanian inter nen Hezekias so amin a pilak ed abung nen Jehova tan ed saray pasen a pangiinay kayamanan ed abung* na ari.+
16 Diad satan et inekal nen Arin Hezekias na Juda iray kapot na templo+ nen Jehova tan saray hamba a tinapewan to na balitok,+ insan inter to ray balitok ed ari na Asirya.
17 Insan imbaki na ari na Asirya so Tartan,* Rabsaris,* tan Rabsases* a kaibay baleg ya armada manlapud Lakis+ pian onlad si Arin Hezekias diad Jerusalem.+ Tinmatdang ira ed Jerusalem tan pinmuesto irad abay na banawang na bandad tagey a tiponay danum diad karsadan mamaarap ed uma na managpesak.+
18 Sanen tinmawag ira pian ompaway so ari, say pinmaway et say manangasikaso na sankaabungan* a si Eliakim+ ya anak nen Hilkias, si Sebna+ a sekretaryo, tan si Joa ya anak nen Asaf, say managrekord na saray nagagawa.
19 Kanian oniay inkuan na Rabsases ed sikara: “Ibaga yo pad si Hezekias, ‘Oniay inkuan na makapanyarin ari, say ari na Asirya: “Antoy basiyan na panmamatalek mo?+
20 Ibabagam, ‘Walay estratehiyak tan pakayarik a miguerra,’ balet anggapoy kana na saratan a salita. Siopay panmamatalekan mo, akin et makpel kan manrebelde ed siak?+
21 Manmamatalek ka ed tulong na sayan abalbal a tanubong, say Ehipto,+ a no ompeket ed satan so sakey a too et naturok tan nasaluksokan so dakulap to. Ontan so Faraon ya ari na Ehipto ed amin a manmamatalek ed sikato.
22 Tan no bilang ibaga yod siak, ‘Manmamatalek kami ed si Jehova a Dios mi,’+ agta gawa to iramay atagey a pasen tan saray altar ya inekal nen Hezekias,+ insan to balet ibabaga ed Juda tan Jerusalem, ‘Diad sayan altar ed Jerusalem so pandakmomoan yo’?”’+
23 Kanian natan, mipustaan ka pa ed katawan kon ari na Asirya: Ikdan ta kay 2,000 kabayo no makaromog kay magenap ya onlugan ed saratan.+
24 Panon mo sirin a napaatras so anggan sakey a gobernador a sankaabebaan ed saray lingkor na katawan ko, anta manmamatalek ka ed Ehipto ya ikdan to ka na saray karwahe tan akakabayon sundalo?
25 Natan, agak ta inabuloyan nen Jehova ya onlusob pian deralen iyan pasen? Inkuan a mismo nen Jehova ed siak, ‘Lusob mo tan deral mo iyan dalin.’”
26 Diad saya, si Eliakim ya anak nen Hilkias, tan si Sebna+ tan si Joa et inkuan dad Rabsases:+ “Komon ta mitongtong kad saray lingkor mo diad lenguahen Aramaiko,*+ ta natalosan mi; agka mitotongtong ed sikami diad lenguahe na saray Judio ta narerengel na saray totoon walad tapew na padir.”+
27 Balet inkuan na Rabsases ed sikara: “Kasin diad katawan yo tan diad sikayo labat so angibakian ed siak na katawan ko pian ipasabi irayan salita? Agta pati diad saray totoon akayurong ed padir, saramay mangan na dilin tai ra tan oninum na dilin sirit da a singa sikayo?”
28 Insan inmalagey so Rabsases tan oniay inkelyaw to ed lenguahe na saray Judio: “Dengel yoy salita na makapanyarin ari, say ari na Asirya.+
29 Oniay inkuan na ari, ‘Agkayo patitilaan ed si Hezekias, ta agto kayo nayarian ya iliktar ed limak.+
30 Tan agkayo patatangguyor ed si Hezekias a manmatalek ed si Jehova, diad pangibabaga toy: “Seguradon iliktar itayo nen Jehova, tan agniyawat iyan syudad ed ari na Asirya.”+
31 Agkayo ondedengel ed si Hezekias, ta oniay inkuan na ari na Asirya: “Mikareenan kayod siak tan suko kayo la,* pian kada sakey ed sikayo et mangan ed dilin ubas to tan dilin kiew ton igos tan oninum na danum ed dilin bobon to,
32 anggad onsabi ak tan iyakar ta kayo ed dalin+ a singa say mismon dalin yo, sakey a dalin na ilik tan balon alak, sakey a dalin na tinapay tan kaubasan, sakey a dalin na kakiewan ya olibo tan dilo. Et manbilay kayo tan agkayo ompatey. Agyo dedengelen si Hezekias, ta papalikdoen to kayo labat diad pangibabaga ton, ‘Iliktar itayo nen Jehova.’
33 Wala ta la ed saray dirios na saray nasyon so akapangiliktar ed dalin da ed lima na ari na Asirya?
34 Kawalaan na saray dirios na Hamat+ tan Arpad? Kawalaan na saray dirios na Sefarvaim,+ Hena, tan Iva? Kasin ayarian dan inliktar so Samaria ed limak?+
35 Wala ta ed saray dirios na sarayan dalin so akapangiliktar ed dalin da ed limak, pian isipen yon niliktar nen Jehova so Jerusalem ed limak?”’”+
36 Balet ag-inmesel iray totoo tan ag-iran balot inmebat ed sikato, ta say ganggan na ari, “Agkayo oneebat ed sikato.”+
37 Balet linmad si Hezekias so manangasikaso na sankaabungan* a si Eliakim ya anak nen Hilkias, say sekretaryo a si Sebna, tan say managrekord na saray nagagawa a si Joa ya anak nen Asaf, a pinilat da ray kawes da, tan impasabi rad sikato iray imbaga na Rabsases.
Paimanod leksab
^ Pinatikey a ngaran nen Abia.
^ Odino “tatawagen a Nehustan.”
^ Salanti, diad amin a pasen, daiset man odino dakel so manaayam.
^ Say sakey a talento et 34.2 kilo. Nengnengen so Apendise B14.
^ Odino “palasyo.”
^ Odino “say manunan managserbi na iinumen.”
^ Odino “say manunan opisyal ed palasyo.”
^ Odino “say komandante.”
^ Odino “palasyo.”
^ Odino “Siryano.”
^ Literal, “Manggawa kayoy panamendisyon a kaibak tan la kayo ed siak.”
^ Odino “palasyo.”
