Komaduan Arari 19:1-37
19 Sanen nadngelan itan nen Arin Hezekias, pinilat to ray kawes to tan nansulong na sakon abel tan linmoob ed abung nen Jehova.+
2 Insan imbaki toy Eliakim a manangasikaso na sankaabungan,* si Sebna a sekretaryo, tan saray mamatatken a saserdote, ya akasulong ira na sakon abel, pian onla rad propetan Isaias+ ya anak nen Amoz.
3 Imbaga rad sikato: “Oniay inkuan nen Hezekias, ‘Sayan agew et agew na gonigon, panagbalaw,* tan kababaingan; ta saray ugugaw et asingger lan iyanak,* balet anggapoy biskeg na ina a mangidages.+
4 Agla pigan narengel nen Jehova a Dios mo so amin ya imbaga na Rabsases, ya imbaki na ari na Asirya a katawan to pian kantiawan so mabilay a Dios,+ tan mikuentaan ed sikato si Jehova a Dios mo lapud saray nadngel to. Kanian ipikasim+ iray akeran akaliktar.’”
5 Kanian linmad si Isaias iray lingkor nen Arin Hezekias,+
6 tan imbaga nen Isaias ed sikara: “Ibaga yod katawan yo, ‘Oniay inkuan nen Jehova: “Agka natatakot+ lapud saray nadngel mon impamauges ed siak na saray lingkor na ari na Asirya.+
7 Walay iyan kon kanonotan ed sikato,* tan walay narengel ton balita tan ompawil ed dalin to; tan sikatoy pateyen kod espada diad dalin to.”’”+
8 Sanen arengelan na Rabsases a tinmaynan lad Lakis+ so ari na Asirya, pinawil to so ari tan asabian ton milalaban ed Libna.+
9 Et nadngelan na ari a pinmaway si Arin Tirhaka na Etiopia pian milaban ed sikato. Kanian sikatoy angibaki lamet na saray mensahero+ ed si Hezekias, ya inkuan to:
10 “Oniay ibaga yod si Arin Hezekias na Juda, ‘Agka patitilaan ed Dios mo a panmamatalekan mo, a mangibabagan: “Agniyawat so Jerusalem ed ari na Asirya.”+
11 Nadngelan mo no antoy ginawa na arari na Asirya ed amin a dalin diad impaneral dad saratan.+ Kasin iisipen mon makaliktar ka?
12 Kasin ayarian iran inliktar na saray dirios na saray nasyon a dineral na inmuunan atateng ko? Kawalaan la na Gozan, Haran,+ Rezef, tan saray totoo na Eden a walad Tel-asar?
13 Kawalaan lay ari na Hamat, say ari na Arpad, tan saray arari na saray syudad na Sefarvaim, Hena, tan Iva?’”+
14 Et inala nen Hezekias iray sulat ed saray mensahero tan binasa to. Insan linmay Hezekias ed abung nen Jehova tan binuskag to iratan* ed arapan nen Jehova.+
15 Tan ginapoan nen Hezekias so manpikasi+ ed si Jehova, ya inkuan to: “O Jehova a Dios na Israel, ya akayurong ed trono diad tagey* na saray kerubin,+ sika labat so tuan Dios na amin a panarian ed dalin.+ Sika so nanggawa ed katawenan tan say dalin.
16 Ikiling mo pay layag mo, O Jehova, tan dengel ka!+ Ilukas mo pa ray matam,+ O Jehova, tan nengneng ka! Dengel mo ray mensahe nen Senakerib ya impasabi to pian kantiawan so mabilay a Dios.
17 O Jehova, tua a dineral na saray arari na Asirya iray nasyon tan saray dalin da.+
18 Tan imbubuntok dad apoy iray dirios da, lapud aliwa ran dios+ noagta ginawa labat na too+ manlapud kiew tan bato. Kanian nayarian dan deralen iratan.
19 Balet natan, O Jehova a Dios mi, komon ta iliktar mo kami ed lima to, pian naamtaan na amin a panarian ed dalin a sika labat so Dios, O Jehova.”+
20 Et oniay mensahen impasabi nen Isaias ya anak nen Amoz ed si Hezekias: “Oniay imbaga nen Jehova a Dios na Israel, ‘Nadngel ko so pikakasim+ ed siak nipaakar ed si Arin Senakerib na Asirya.+
21 Saya so imbaga nen Jehova sumpad sikato:
“Mumudmoraen ka na birhen ya anak a bii na Sion, balbalawen to ka.
Manpeyeng ed sika so anak a bii na Jerusalem.
22 Siopay kinantiawan mo tan pinauges mo?+
Siopay angitageyan moy boses mo+Tan angitangayan moy matangsit iran matam?
Say Masanton Dios na Israel!+
23 Diad panamegley na saray mensaherom+ et kinantiawan moy Jehova+ tan imbagam,‘Diad dakerakel iran karwahek a pan-guerraEt ontatdang ak ed toktok na kapalandeyan,Say sankaarawian iran pasen na Lebanon.
Batangen ko ray ataragey a sedro tan saray sankarakpan a kiew ya enebro ditan.
Onla ak ed sankatageyan iran pasen, saray sankakapalan a katakelan ditan.
24 Mankotkot ak na saray bobon tan inumen ko ray danum a nanlapud arum a pasen;Paekaten koy amin a kulos* na Ehipto diad panamegley na saray dapan ko.’
25 Agmo ta nadngelan? Manlapu la nensaman et denesidi* la itan.+
Manlapud abayag lan panaon et imparaan ko* la itan.+
Natan et gawaen ko la.+
Saray apadiran a syudad et pagmaliwen mon bunton na saray geray ya agnapanayaman.+
26 Anggapoy nagawaan na saray manaayam ed saratan;Nataktakot tan nabaingan ira.
Magmaliw iran singa saray tanaman ed uma tan birdin dika,+
Singa dika ed saray atep, ya amagaan lapud dagem a manlalapud bukig.
27 Balet amtak sano onyuyurong ka, sano ompapaway ka, tan sano onloloob ka,+Tan sano onsasanok kad siak,+
28 Lapud nadngel koy isasanok mod siak+ tan say paniingal mo.+
Kanian deyengen koy eleng mo tan ikdan ko na renda+ so sangim,Tan tengtengen ta kan papawil ed nanlapuan mo.”+
29 “‘Tan saya so tanda parad sika:* Diad sayan taon et kanen yo iramay tinmubon bukor;* tan diad komaduan taon et kanen yo iray ilik a nanlapud saratan;+ balet diad komatlon taon et mantanem kayoy bukebukel tan manani kayo, tan mantanem kayo na saray ubas tan kanen yoy bunga ra.+
30 Saramay makaliktar a kabiangay sankaabungan na Juda, saramay akeraan,+ et onlamot tan manbunga ira.
31 Ta walay nakeran ompaway ed Jerusalem tan saray makaliktar ya ompaway ed Palandey Sion. Nagawa iya lapud inkaseseg nen Jehova na saray armada.+
32 “‘Kanian oniay inkuan nen Jehova nipaakar ed ari na Asirya:+
“Sikatoy ag-onloob ed sayan syudad+Tan agmangikenay pana ditanTan agmiarapan a walaay panagsamperTan agmantambak na dalanen to a pangubkob ed satan.+
33 Sikatoy ompawil ed samay datin dinalan to;Sikatoy ag-onloob ed sayan syudad,” so imbaga nen Jehova.
34 “Iyagel ko iyan syudad+ tan iliktar ko nisengeg ed ngaran ko+Tan nisengeg ed si David a lingkor ko.”’”+
35 Diad saman a labi, say anghel nen Jehova et pinatey toy 185,000 lalaki diad kampo na saray Asiryano.+ Kabangon na saray totoo ed kabkabuasan, bangkay lan amin so anengneng da ditan.+
36 Kanian tinmaynan si Arin Senakerib na Asirya tan pinmawil ed Ninive+ tan nansiansia diman.+
37 Tan sanen ondadakmomo ed abung* na dios ton si Nisroc, sikatoy pinatey na saray ananak ton si Adramelec tan Sarezer diad espada+ insan batik ira ed dalin na Ararat.+ Tan si Esar-hadon+ ya anak to so nagmaliw ya ari a kasalat to.
Paimanod leksab
^ Odino “palasyo.”
^ Odino “pananginsulto.”
^ Literal, “wala lad puerta na eges.”
^ Literal, “espiritu ed sikato.”
^ Literal, “itan.”
^ Odino posiblin, “pegley.”
^ Odino “kanal na Nilo.”
^ Literal, “agawa.”
^ Odino “pinormak.”
^ Odino “tinmubo manlapud naplag a bukebukel.”
^ Salanti, si Hezekias.
^ Odino “templo.”
