Komaduan Arari 24:1-20
24 Diad panaon nen Jehoiakim, sikatoy inataki nen Arin Nabucodonosor+ na Babilonia, tan si Jehoiakim et nagmaliw a lingkor to diad loob na taloy taon. Balet sikatoy sinmumpa tan nanrebelde ed sikato.
2 Insan si Jehova et angibaki ed sikato na saray grupo na tulisan a Caldeo,+ Siryano, Moabita, tan Ammonita. Ibabaki to ra pian deralen day Juda, unong ed imbaga nen Jehova+ diad panamegley na saray lingkor ton propeta.
3 Seguradon lapud ganggan nen Jehova kanian agawa iyad Juda, ya ekalen to ra ed arapan to+ makasengeg ed amin a kasalanan a ginawa nen Manases,+
4 ontan met ed impamaagus toy dala na saray andiay kasalanan,+ ta pinano toy Jerusalem na dala na saray andiay kasalanan tan agnilabay nen Jehova so mamerdona.+
5 Tan saray arum nin agawa ed si Jehoiakim, say amin a kimey to, et akasulat ed libro na saray agawa diad panaon na arari na Juda.+
6 Tan si Jehoiakim et nampainawa la a kaiba na saray inmuunan atateng to;+ tan si Jehoiakin ya anak to so nagmaliw ya ari a kasalat to.
7 Et aglan balot impalaran na ari na Ehipto so ompaway ed dalin to, ta inala na ari na Babilonia so amin a kayarian na ari na Ehipto,+ manlapud Kulos* na Ehipto+ ya anggad Ilog Eufrates.+
8 Si Jehoiakin+ et mantaon na 18 sanen nagmaliw ya ari, tan taloy bulan a nanuley ed Jerusalem.+ Say ngaran na ina to et Nehusta ya anak nen Elnatan a taga Jerusalem.
9 Sikatoy nantultuloy a nanggaway mauges ed pakanengneng nen Jehova, unong ed amin a ginawa nen ama to.
10 Kaleganan na satan, saray lingkor nen Arin Nabucodonosor na Babilonia et inmataki ed Jerusalem, tan akubkob so syudad.+
11 Et linma ed syudad si Arin Nabucodonosor na Babilonia legan a kukubkoben itan na saray lingkor to.
12 Si Arin Jehoiakin na Juda et sinmuko ed ari na Babilonia,+ a kaibay ina to, saray lingkor to, saray prinsipe to, tan saray opisyal ed palasyo to;+ tan sikatoy inerel na ari na Babilonia diad komawalon taon na uley to.+
13 Insan inaala toy amin a kayamanan ed abung nen Jehova tan saray kayamanan ed abung* na ari.+ Dinederal toy amin a balitok a kagawaan ed templo nen Jehova a ginawa nen Solomon ya ari na Israel.+ Saya so agawa unong ya impasakbay nen Jehova.
14 Tan imbantak toy interon Jerusalem, amin a prinsipe,+ amin a mabibiskeg a sundalo, amin a marunong a komikimey tan latero*+—10,000 so imbantak to. Anggapoy atilak noag saray sankapobrian a totoo ed dalin da.+
15 Kanian imbantak toy Jehoiakin+ ed Babilonia;+ pati say ina na ari, saray asawa na ari, saray opisyal ed palasyo to, tan saray sankaimportantian a totoo ed dalin da, ya inala to rad Jerusalem tan imbantak tod Babilonia.
16 Imbantak met na ari na Babilonia ed dalin to so amin a 7,000 sundalo, pati saray 1,000 marunong a komikimey tan latero,* amin iraya et mabibiskeg a lalaki tan nipasal ed guerra.
17 Say ari na Babilonia et tinuro toy Matanias a pangamaen nen Jehoiakin+ bilang ari a kasalat to tan sinalatan toy ngaran to na Zedekias.+
18 Si Zedekias et mantaon na 21 sanen nagmaliw ya ari, tan 11 taon a nanuley ed Jerusalem. Say ngaran na ina to et Hamutal+ ya anak nen Jeremias a taga Libna.
19 Sikatoy nantultuloy a nanggaway mauges ed pakanengneng nen Jehova, unong ed amin a ginawa nen Jehoiakim.+
20 Lapud sanok nen Jehova kanian agawa iraya ed Jerusalem tan Juda, anggad pinataynan to rad arapan to.+ Tan nanrebelde si Zedekias ed ari na Babilonia.+
Paimanod leksab
^ Odino “palasyo.”
^ Odino posiblin, “managpaalagey na saray padir a pandepensa.”
^ Odino posiblin, “managpaalagey na saray padir a pandepensa.”
