Komaduan Arari 25:1-30
25 Diad komasiam a taon na uley nen Zedekias, diad komasamplon agew na komasamplon bulan, si Arin Nabucodonosor+ na Babilonia et linma a kaibay interon armada to pian atakien so Jerusalem.+ Nankampo tan nanggawa ray padir ed paliber pian kubkoben itan,+
2 tan say syudad et akubkob anggad koma-11 a taon na uley nen Arin Zedekias.
3 Diad komasiam ya agew na komapat a bulan et pinasyay eras+ ed syudad, tan anggapoy naakan na saray totoo ed dalin da.+
4 Binungaw day padir na syudad,+ tan diad labi et binmatik so amin a sundalo, a dinmalan irad puerta ed nanleetan na duaran padir diad abay na hardin na ari, legan ya akapaliber ed syudad iray Caldeo; tan say ari et amaarap ed Araba.+
5 Balet inusilan na armada na saray Caldeo so ari, tan nabotan da ed saray patar a desierto na Jerico, tan amin a sundalo to et nitaytayak tan nisian ed sikato.
6 Insan inerel da so ari+ tan inawit dad ari na Babilonia diad Ribla tan senentensiaan da.
7 Saray lalakin ananak nen Zedekias et pinapatey dad arapan to; insan binulag nen Nabucodonosor si Zedekias, binalor to na saray gansan gulonggulong, tan inawit tod Babilonia.+
8 Diad komapiton agew na komaliman bulan, salanti, diad koma-19 a taon na uley nen Arin Nabucodonosor ya ari na Babilonia, si Nebuzaradan,+ a pangulo na saray guardia tan lingkor na ari na Babilonia, et linmad Jerusalem.+
9 Pinoolan toy abung nen Jehova,+ abung* na ari,+ tan amin a kaabungan ed Jerusalem;+ pinoolan to met so abung na kada prominentin too.+
10 Tan saray padir ya akapaliber ed Jerusalem et inggeba na interon armada na saray Caldeo a kaiba na pangulo na saray guardia.+
11 Tan si Nebuzaradan a pangulo na saray guardia et inawit tod dalin da iray totoon atilak ed syudad, saray dinmapag la ed ari na Babilonia, tan saray arum nin totoo.+
12 Balet intilak to so arum a sankapobrian a totoo ed dalin da pian mangasikaso na kaubasan tan obligaen a mantrabaho.+
13 Tan dinederal na saray Caldeo iray gansan lusek+ na abung nen Jehova tan saray kariton+ tan say gansan Dayat+ a walad abung nen Jehova, tan inawit dad Babilonia iray gansa na saratan.+
14 Inaala da met iray latan kargaan na dapol, saray pala, saray panag-erep, saray kopa, tan amin a gansan kagawaan ya uusaren ed panaglingkor ed templo.
15 Inaala na pangulo na saray guardia iray kargaan na ngalab tan saray yaong a puron balitok+ tan pilak.+
16 Tan agnasimbang ed karakel so gansan inusar ed duaran lusek, say Dayat, tan saray kariton a ginawa nen Solomon parad abung nen Jehova.+
17 Say kada lusek et 18 kasiko* so katagey to,+ tan gawad gansa so ulo na lusek; tan taloran kasiko so katagey na ulo na lusek, tan gawad gansa so iket a dekorasyon tan saray granada ya akapaliber ed ulo na lusek.+ Miparad satan imay komaduan lusek a walaay iket a dekorasyon.
18 Inawit met na pangulo na saray guardia si Seraias+ a manunan saserdote, si Sofonias+ ya onkokomaduan saserdote, tan say taloran bantay na puerta.+
19 Tan inala tod syudad so sakey ya opisyal ed palasyo a manangiganggan ed saray sundalo, limaran maapit a kaulop na ari a wadman ed syudad, pati say sekretaryo na pangulo na armada, samay manitipon ed saray totoo ed dalin da, tan 60 lalaki manlapud karaklan a totoo ed dalin a wadman nid syudad.
20 Inala ira nen Nebuzaradan+ a pangulo na saray guardia tan inyakar to rad ari na Babilonia diad Ribla.+
21 Pinapatey ira na ari na Babilonia diad Ribla a walad dalin na Hamat.+ Kanian pinataynan so Juda ed dalin to tan imbantak ed arum a pasen.+
22 Si Arin Nabucodonosor na Babilonia et tinuro toy Gedalias+ ya anak nen Ahikam+ ya anak nen Safan+ a manuley ed totoo ya intilak to ed dalin na Juda.+
23 Sanen nadngelan na amin a pangulo na armada tan saray sundalo ra a tinuro na ari na Babilonia si Gedalias, linma ran tampol ed si Gedalias diad Mizpa. Saraya et si Ismael ya anak nen Netanias, si Johanan ya anak nen Karea, si Seraias ya anak nen Tanhumet a Netofatita, tan si Jaazanias ya anak na Maacatita, a kaiba iray sundalo ra.+
24 Et nansamba si Gedalias ed sikara tan ed saray sundalo ra tan inkuan to: “Agkayo natatakot a manlingkor ed saray Caldeo. Manayam kayo ed sayan dalin tan lingkoran yo so ari na Babilonia, tan maabig so pansumpalan yo.”+
25 Tan diad komapiton bulan, si Ismael+ ya anak nen Netanias ya anak nen Elisama, a nanlapu ed poli na ari,* et sinmabi a walay kaiba ton samploran lalaki, tan kinabil day Gedalias tan inatey, pati saray Judio tan saray Caldeo a kaiba to diad Mizpa.+
26 Kayari na satan, amin a totoo, abeba man odino atagey so kipapasen da, kaiba iray pangulo na armada et linmad Ehipto,+ ta antakot ira ed saray Caldeo.+
27 Tan diad koma-37 taon na inkibantak nen Arin Jehoiakin+ na Juda, diad koma-27 agew na koma-12 bulan, si Arin Evil-merodac na Babilonia, diad taon a sikatoy nagmaliw ya ari, et imbulos toy* Arin Jehoiakin na Juda ed prisoan.+
28 Maabig so impitongtong tod sikato tan impasen toy trono to a mas atagey nen saray trono na arum ya ararin kaiba to diad Babilonia.
29 Kanian nilakseb nen Jehoiakin iray sulong ton kawes na priso, tan sikatoy midudungo ed ari diad amin ya agew na bilay to.
30 Sikatoy inagew-agew a susuplayan na naakan manlapud ari, diad amin ya agew na bilay to.
Paimanod leksab
^ Odino “palasyo.”
^ Say sakey a kasiko et 44.5 sentimetro (17.5 pulgada). Nengnengen so Apendise B14.
^ Literal, “ed bini na panarian.”
^ Literal, “inyatagey toy ulo nen.”
