Komaduan Arari 7:1-20
7 Natan et inkuan nen Eliseo, “Dengel yo so salita nen Jehova. Oniay imbaga nen Jehova: ‘Diad onian oras nabuas diman ed puerta* na Samaria, say bili na sakey sukat a seah* na pinon arina et magmaliw a sakey siklo,* tan say bili na duaran sukat a seah na sebada et magmaliw met a sakey siklo.’”+
2 Diad satan, samay ayudante a panmamatalkan na ari et oniay inkuan to ed too na tuan Dios: “Anggano lukasan nen Jehova iray puerta na danum ed katawenan, talaga kasin nagawa itan?”*+ Et inkuan nen Eliseo: “Nanengneng mon mismo itan,+ balet agka makapangan ed satan.”+
3 Et walay apatiran akating diad lolooban ed puerta na syudad,+ tan inkuan da ed balang sakey: “Onyurong tayo labat dia anggad ipatey tayo?
4 No ibaga tayon, ‘Onloob tayod syudad,’ anta walay eras ditan,+ ompatey tayo. Tan no manyurong tayo labat dia, ompatey tayo met lanlamang. Kanian onloob tayod kampo na saray Siryano. No pansiansiaen da tayon mabilay, manbilay tayo, balet no pateyen da tayo, di ompatey tayo.”
5 Kanian sanen labi la et inmalagey ira tan linmoob irad kampo na saray Siryano. Kasabi rad paway na kampo na saray Siryano, anggapoy toon wadman.
6 Ta imparengel nen Jehova ed kampo na saray Siryano so tanol na saray karwahen pan-guerra tan kabayo, say tanol na baleg ya armada.+ Kanian inkuan da ed sakey tan sakey: “Inupaan na ari na Israel iray arari na Heteo tan arari na Ehipto pian onlusob ed sikatayo!”
7 Et binmangon iran tampol tan batik ira diad labin ambilbilunget, a tinaynan da ray tolda ra, saray kabayo ra, saray asno ra, tan say interon kampo ra, tan batik ira pian nisalbay bilay* da.
8 Sanen wala lad paway na kampo iramay akating, linmoob irad sakey ed saray tolda tan angan tan inminum ira. Insan angala ra ditan na saray pilak, balitok, tan kawes, tan inmalis ira insan da inyamot iratan. Kayari na satan et pinmawil ira tan linmoob irad sananey a tolda tan wala ray inaala ra ditan tan inmalis ira insan da inyamot iratan.
9 Kayari na satan et inkuan dad balang sakey: “Aliwa yay gagawaen tayo. Sayan agew et agew na maong a balita! No manpaleen tayo tan manalagar tayo ni anggad palbangon, makanepegan itayon nadusa. Ti la, ta ipakabat tayo iya diad abung na ari.”
10 Kanian linma ra tan tinmawag irad saray bantay na puerta ed syudad tan imbalita rad sikara: “Linma kamid kampo na saray Siryano, balet anggapoy too—anggapon balot so alikas min wadman. Say wadman labat et saray kabayo tan asno ya akasinger tan tinaynan da ray tolda ra.”
11 Et tampol a tinmawag iray bantay na puerta, tan imbalita da itan ed saramay walad abung na ari.
12 Et binmangon a tampol so ari diad labi tan inkuan tod saray lingkor to: “Ibagak ed sikayo no antoy ginawad sikatayo na saray Siryano. Amta ran narnarasan tayo,+ kanian tinaynan day kampo pian onamot irad uma, a kuan da, ‘Seguradon ompaway irad syudad, tan erelen tayo ran mabilay, insan tayo onloob ed syudad.’”+
13 Et inkuan na sakey ed saray lingkor to: “Komon ta mangibaki ka na pigaran lalaki a mangalay limara ed saray keran kabayo a walad syudad. Ta say pansumpalan da lanlamang et singa ed amin a totoo na Israel ya atilak dia. On, say pansumpalan da et singa ed amin a totoo na Israel ya inatey. Ibaki tayo ra pian nengnengen da no antoy agawa.”
14 Kanian angala ra na duaran karwahe a kaiba iray kabayo tan imbaki ira na ari diad kampo na saray Siryano, a kuan to: “La kayo tan nengneng yo.”
15 Et tinumbok da ra ya anggad Jordan, tan say dalan et napno na saray kawes tan kagawaan ya imbabantak na saray Siryano legan iran ombabatik lapud ataranta ira. Insan pinmawil iray mensahero tan imbalita da iya ed ari.
16 Et pinmaway iray totoo tan angala ray samsam ed kampo na saray Siryano, kanian say bili na sakey sukat a seah na pinon arina et nagmaliw a sakey siklo, tan say bili na duaran sukat a seah na sebada et nagmaliw met a sakey siklo, unong ed salita nen Jehova.+
17 Say tinuro na ari a mangasikaso diad puerta et samay ayudante a managtabin to, balet sikatoy agatin-gatinan na saray totoo diad puerta anggad inatey, unong ya imbaga na too na tuan Dios ed ari sanen linma iyad sikato.
18 Kanian agawa so unong ed imbaga na too na tuan Dios ed ari: “Diad onian oras nabuas diman ed puerta na Samaria, say bili na duaran sukat a seah na sebada et magmaliw a sakey siklo tan say bili na sakey sukat a seah na pinon arina et magmaliw met a sakey siklo.”+
19 Balet oniay inkuan na ayudante ed too na tuan Dios: “Anggano lukasan nen Jehova iray puerta na danum ed katawenan, talaga kasin nagawa itan?”* Et inkuan nen Eliseo: “Nanengneng mon mismo itan, balet agka makapangan ed satan.”
20 Ontan a mismo so agawad sikato, lapud agatin-gatinan na saray totoo diman ed puerta ya anggad inatey.
Paimanod leksab
^ Odino “saray tindaan.”
^ Say sakey a seah et 7.33 litro. Nengnengen so Apendise B14.
^ Say sakey a siklo et 11.4 gramo. Nengnengen so Apendise B14.
^ Literal, “iyan salita.”
^ Odino “kamarerwa.”
^ Literal, “so onian salita.”
