Komaduan Awaran 20:1-37
20 Kayari na satan, saray Moabita+ tan saray Ammonita,+ a kaibay arum ya Amonim,* et linma pian miguerra ed kinen Jehosafat.
2 Kanian oniay imbagad si Jehosafat: “Walay sinmabin baleg a grupo pian milaban ed sika a nanlapud rehyon na dayat,* diad Edom,+ tan wala la rad Hazazon-tamar, salanti, diad En-gedi.”+
3 Diad saman et ataktakot si Jehosafat, tan denesidi to ya anapen si Jehova.+ Kanian inyabawag to a manayunal so interon Juda.
4 Et nantitipon iray totoo na Juda pian onkerew na tulong ed si Jehova;+ nanlapu rad amin a syudad na Juda pian ontupleg ed si Jehova.
5 Insan inmalagey si Jehosafat diad arap na kongregasyon na Juda tan Jerusalem diman ed arapan na balon sular na abung nen Jehova,
6 tan inkuan to:
“O Jehova a Dios na inmuunan atateng mi, agta sikay Dios a walad tawen,+ tan walad pakauley mo so amin a panarian na saray nasyon?+ Walad limam so pakayari tan biskeg, tan anggapoy siopaman a makatalindeg sumpad sika.+
7 O Dios mi, agta pinataynan mo iray manaayam ed sayan dalin diad arapan na Israel a totoom tan inter mo itan bilang manbayag a kayarian na ilalak* na kaarom a si Abraham?+
8 Et nanayam ira ditan, tan impaalageyan da ka ditan na santuaryo parad ngaran mo,+ a kuan da,
9 ‘No walay onsabid sikami a desyang, diad panamegley na espada, ambelat a panangukom, salot, odino eras, abuloyan mo kami pan onalagey ed arapan na sayan abung tan ed arapan mo (ta say ngaran mo et walad sayan abung)+ tan onkerew kamid sika na tulong lapud pakakagonigon mi, tan komon ta dengelen tan iliktar mo kami.’+
10 Et wadia ray lalakin taga Ammon, Moab, tan mapalandey a rehyon na Seir,+ ya agmo inabuloyan a sakopen na Israel kapaway dad dalin na Ehipto. Pinaliisan da ra tan agda ra dineral.+
11 Natan et ombabales irad sikami diad inyakar dad dia pian pataynanen kami ed dalin mo ya inter mon tawir mi.+
12 O Dios mi, agmo kasi idapoy panangukom ed sikara?+ Ta anggapoy pakayari mi ed sayan baleg a grupon onsasabi pian milaban ed sikami; tan agmi amta no antoy nepeg min gawaen,+ balet saray mata mi et akanengneng ed sika.”+
13 Diad saman et manalalagey ed arapan nen Jehova so amin a taga Juda, kaiba iray kaasawaan dan bibii, saray ananak* da, anggan saramay angkekelag ni.
14 Insan diad pegley na kongregasyon, say espiritu nen Jehova et niwalad si Jahaziel ya anak nen Zacarias ya anak nen Benaias ya anak nen Jeiel ya anak nen Matanias a Levita a nanlapud saray ananak nen Asaf.
15 Et inkuan to: “Dengel kayo, amin yon taga Juda tan sikayo ran manaayam ed Jerusalem, tan sika, O Arin Jehosafat! Nia so imbaga nen Jehova ed sikayo, ‘Agkayo natatakot odino nakekebbiew lapud sayan baleg a grupo, ta aliwan sikayo so milaban noag say Dios.+
16 Nabuas et lasur kayo pian miabetan ed sikara. Diman ed Sis so tatdangan da, tan naromog yo ra ed sampot na lawak* ya antis na kalawakan na Jeruel.
17 Agyo kaukolay milaban ed sayan guerra. Omposisyon kayo, alagey kayo labat,+ tan nengneng yo so panangiliktar nen Jehova parad sikayo.*+ O Juda tan Jerusalem, agkayo natatakot odino nakekebbiew.+ Nabuas et miabetan kayod sikara, tan si Jehova et walad sikayo.’”+
18 Et tampol a dinmakmomod dalin si Jehosafat, tan dinmakmomo met ed arapan nen Jehova so amin a taga Juda tan saray manaayam ed Jerusalem pian dayewen si Jehova.
19 Insan saray Levita a kailalakan na saray Kohatita+ tan Korahita et inmalagey pian idayew si Jehova a Dios na Israel diad makmaksil a boses.+
20 Diad kaimbuasan et asaksakbay iran binmangon tan linma rad kalawakan na Tekoa.+ Sanen paonla la ra ditan, inmalagey si Jehosafat tan inkuan to: “Dengel yo ak, O Juda tan sikayo ran manaayam ed Jerusalem! Manmatalek kayod si Jehova a Dios yo pian magmaliw kayon maligen.* Manmatalek kayod saray propeta to,+ et manalo kayo.”
21 Kayari ton kinatongtong iray totoo, sikatoy anuro na saray lalakin mangansion+ parad si Jehova tan mangirayew ed sikato ya akakawes ira na masanto legan iran manaakar ed unaan na saray sundalo, ya ibabaga ra: “Misalamat kayod si Jehova, ta say matoor a panangaro to et mansiansia ya anggad angga.”+
22 Sanen ginapoan day maliket a pangansion na panangirayew, angipasen si Jehova na saray manambang ed saray lalakin taga Ammon, Moab, tan mapalandey a rehyon na Seir a manasakop ed Juda, tan kinabil day sakey tan sakey.+
23 Tan saray Ammonita tan Moabita et nilabanan da ray manaayam ed mapalandey a rehyon na Seir+ pian deralen tan upoten da ra; et kayari ran pinatey iray manaayam ed Seir, sikara la so nampapateyan.+
24 Balet kasabi na saray taga Juda diad panagbantayan diman ed kalawakan+ tan binantag da ray totoo, anengneng da ray bangkay a kitungilang ed dalin;+ anggapoy akeran mabilay.
25 Kanian si Jehosafat tan saray totoo to et linmasur pian mangalad sikara na saray samsam, tan amayamay so aromog dan kagawaan, kawes, tan arum ni ran mablin bengatla, ya inaala dad sikara anggad agda la sarag ya awiten.+ Et taloy agew dan inulor iray samsam, ta agaylay karakel iratan.
26 Diad komapat ya agew et nantitipon ira diad Lawak* na Beraca, ta diman da indayew* si Jehova. Kanian tinawag da itan a Lawak na Beraca*+—anggad natan.
27 Kayari na satan et malikeliket a pinmawil ed Jerusalem so amin a lalaki na Juda tan Jerusalem, a walad unaan da si Jehosafat, ta sikaray impanalo nen Jehova ed saray kakabusol da.+
28 Kanian sinmabi irad Jerusalem a de-awit ira na saray nandeles ya instrumento, arpa,+ tan trumpeta+ tan linma rad abung nen Jehova.+
29 Tan nisengeg ed Dios et tinmakot a maong so amin a panarian ed kaliberliber a dalin sanen nadngelan da a si Jehova so akilaban ed saray kakabusol na Israel.+
30 Kanian say panarian nen Jehosafat et nagmaliw a maligen, tan sikatoy impanpainawa na Dios manlapud amin ya akapaliber a kalaban to.+
31 Tan si Jehosafat et nantultuloy a nanuley ed Juda. Sikatoy mantaon na 35 sanen nagmaliw ya ari, tan 25 taon a nanuley ed Jerusalem. Say ngaran na ina to et Azuba ya anak nen Silhi.+
32 Sikatoy nantultuloy a nanakar ed dalan a nanakaran nen Asa+ ya ama to. Ag-inmarawi ditan tan ginawa toy duga ed pakanengneng nen Jehova.+
33 Balet saray atagey a pasen et agnaandi,+ tan agni imparaan na saray totoo so puso ra ya anapen so Dios na inmuunan atateng da.+
34 Tan saray arum nin agawa ed si Jehosafat, manlapud gapo ya anggad sampot, et nilaktip ed saray insulat nen Jehu+ ya anak nen Hanani,+ ya intekep ed Libro na Saray Arari na Israel.
35 Kayari na saya, si Arin Jehosafat na Juda et akikasakey ed si Arin Ahazias na Israel, samay nanggaway mauges.+
36 Kanian sikatoy ginawa ton kasosyo ed panaggawa na saray barko ya ombiahed Tarsis,+ tan manggagawa ra na saray barko ed Ezion-geber.+
37 Balet, si Eliezer ya anak nen Dodavahu a taga Maresa et nansalita na sakey a propesiya sumpad si Jehosafat, a kuan to: “Lapud akikasakey kad si Ahazias, deralen nen Jehova iray kimey mo.”+ Kanian saray barko et agaygay,+ tan ag-iratan akabiahe ed Tarsis.
Paimanod leksab
^ Odino posiblin, “Meunita.”
^ Mapatnag a say Inatey a Dayat.
^ Literal, “bini.”
^ Literal, “lalakin ananak.”
^ Odino “kulos.”
^ Odino “nengneng yo no panon kayon iliktar nen Jehova.”
^ Odino “makapansungdo kayo.”
^ Odino “Abeban Patar.”
^ Literal, “benendisyonan.”
^ Kabaliksan toy “Bendisyon.”
