Komaduan Awaran 21:1-20
21 Si Jehosafat et nampainawa la a kaiba na saray inmuunan atateng to tan sikatoy imponpon a kaiba ra diad Syudad nen David; tan si Jehoram ya anak to so nagmaliw ya ari a kasalat to.+
2 Saray agagi ton lalaki, saray ananak nen Jehosafat, et sikara di Azarias, Jehiel, Zacarias, Azarias, Miguel, tan Sefatias; amin iraya et anak a lalaki nen Arin Jehosafat na Israel.
3 Et inikdan ira nen ama ra na dakdakel a regalo a pilak tan balitok, tan saray mablin bengatla, pati saray apadiran a syudad ed Juda;+ balet say panarian et inter tod si Jehoram,+ ta sikato so panguloan.
4 Sanen nanuley si Jehoram ed panarian nen ama to, pinabiskeg toy pakauley to, a pinatey ton amin iray agagi ton lalaki+ ed panamegley na espada, pati saray arum a prinsipe ed Israel.
5 Si Jehoram et mantaon na 32 sanen nagmaliw ya ari, tan waloy taon a nanuley ed Jerusalem.+
6 Sikatoy nanakar ed dalan a nanakaran na saray arari na Israel,+ a singa ed saramay kabiangan na sankaabungan nen Ahab, ta nagmaliw ya asawa to so anak a bii nen Ahab;+ tan nantultuloy a nanggaway mauges ed pakanengneng nen Jehova.
7 Balet aglabay nen Jehova a deralen so sankaabungan nen David nisengeg ed samay impisipanan tod sikato,+ ta insipan to a sikato tan saray ananak to et ikdan to ra na silew ya agbalot naerep.+
8 Diad panaon nen Jehoram, say Edom et nanrebelde ed uley na Juda+ tan anuro na dilin ari to.+
9 Kanian linmad Edom si Jehoram tan saray komandante to ya awit day amin a karwahe to, tan diad labi et sikatoy namparaan tan tinalo to ray Edomita ya akapaliber ed sikato tan saray komandante na karwahe.
10 Balet say Edom et nantultuloy a nanrebelde ed uley na Juda anggad sayan agew. Diad saman et nanrebelde met so Libna+ ed sikato, lapud tinaynan toy Jehova a Dios na inmuunan atateng to.+
11 Sikatoy nanggawa met na saray atagey a pasen+ diad kapalandeyan na Juda pian nasagyat to ray manaayam ed Jerusalem a mibiang ed espiritual a prostitusyon, tan imbalang toy Juda.
12 Ag-abayag et sikatoy akaawat na sulat manlapud si Elias+ a propeta, a mangibabagan: “Oniay inkuan nen Jehova a Dios nen David ya inmunan ateng mo, ‘Agka nanakar ed saray dalan a nanakaran nen Jehosafat+ ya amam odino ed saray dalan a nanakaran nen Arin Asa+ na Juda.
13 Imbes, nanakar ka ed dalan a nanakaran na saray arari na Israel+ tan sinagyat moy Juda tan saray manaayam ed Jerusalem a mibiang ed espiritual a prostitusyon+ a singa ginawa na sankaabungan nen Ahab,+ tan pinapatey mo ni ingen iray agagim a lalaki,+ saray kabiangan na sankaabungan nen amam, a mas maong nen sika.
14 Kanian si Jehova et mangidapo na baleg a kadederal ed saray totoom, saray ananak mo, kaasawaan mo, tan ed amin a kayarian mo.
15 Tan kada agew et pairapen ka na dakel a sakit, kaiba lay sakit ed pait, anggad ompaway iray pait mo lapud satan.’”
16 Insan pinasanok nen Jehova+ iray Filisteo*+ tan saray Arabo+ ya asingger ed saray Etiope pian onsumpad si Jehoram.
17 Kanian nilusob day Juda, a nilooban da itan, tan inaala ray amin a kagawaan a naromog ed abung* na ari,+ pati saray anak ton lalaki tan kaasawaan to; tan say atilak labat ya anak to et si Jehoahaz*+ a sankayugtanan.
18 Kayari na saya, si Jehova et angidapod sikato na sakit ed pait ya agla natambal.+
19 Tan kayari na duay taon, pinmaway iray pait to lapud sakit to, tan sikatoy inatey legan na pinasyan paniirap to ed sakit to; tan diad ponpon to et ag-amool iray totoo parad sikato a singa impamool da parad inmuunan atateng to.+
20 Sikatoy mantaon na 32 sanen nagmaliw ya ari, tan waloy taon a nanuley ed Jerusalem. Et anggapoy nanermen sanen inatey. Kanian sikatoy imponpon da diad Syudad nen David,+ balet aliwan diad ponponan na saray arari.+
Paimanod leksab
^ Literal, “so espiritu na saray Filisteo.”
^ Odino “palasyo.”
^ Tinawag met ya Ahazias.
