Komaduan Awaran 34:1-33
34 Si Josias+ et mantaon na walora sanen nagmaliw ya ari, tan 31 taon a nanuley ed Jerusalem.+
2 Ginawa to so duga ed pakanengneng nen Jehova tan nanakar ed saray dalan a nanakaran nen David ya inmunan ateng to, tan agto inmarap ed kawanan odino diad kawigi.
3 Diad koma-8 taon na uley to, sanen sikatoy ugaw ni, ginapoan ton inanap so Dios nen David ya inmunan ateng to;+ tan diad koma-12 taon et ginapoan ton ekalen ed Juda tan Jerusalem+ iray atagey a pasen+ tan saray sagradon poste,* saray imahen,+ tan saray metal ya estatua.
4 Ontan met, diad arapan to et inggegeba da ray altar nen Baal, tan dinederal to ray panagpoolan na insenso a walad tagey na saratan. Minemekmek to met iray sagradon poste,* imahen, tan metal ya estatua ya anggad nagmaliw a pulbos tan insasabuyag tod saray lubok na saramay datin manbabagat ed saratan.+
5 Tan saray pukel na saray saserdote et pinopoolan to diad saray mismon altar da.+ Diad ontan et nilinisan toy Juda tan Jerusalem.
6 Tan diad saray syudad na Manases, Efraim,+ tan Simeon ya anggad Neftali, diad saray geray a walad kaliberliber na saratan,
7 et inggegeba to iray altar tan minemekmek to ray sagradon poste* tan saray imahen+ ya anggad nagmaliw a pulbos; tan dinederal toy amin a panagpoolan na insenso diad interon dalin na Israel,+ insan la pinmawil ed Jerusalem.
8 Diad koma-18 taon na uley to, sanen alinisan to lay dalin tan say templo,* imbaki toy Safan+ ya anak nen Azalias, si Maasias a pangulo na syudad, tan si Joa ya anak nen Joahaz a managrekord na saray nagagawa pian apigeren so abung nen Jehova a Dios to.+
9 Linma rad si Hilkias ya atagey a saserdote tan inter day kuartan inawit ed abung na Dios, samay akolekta na saray Levitan bantay na puerta manlapud saray taga Manases, Efraim, tan arum nin totoo na Israel,+ pati saray manlapud Juda, Benjamin, tan saray manaayam ed Jerusalem.
10 Insan inter da itan ed saray aturon mangasikaso ed kimey diad abung nen Jehova. Tan saray komikimey ed abung nen Jehova et inusar da itan pian parakepen tan apigeren so abung.
11 Inter da itan ed saray marunong a komikimey tan saray managpaalagey parad pangaliw na saray tinabas a bato tan saray troso a gawaen a pampasekder tan saray biga ya usaren ed saray abung a pinaulyan na saray arari na Juda a naderal.+
12 Tan sarayan lalaki et napanmatalkan ira ed kimey da.+ Saray tinuron manangasikaso ra et saray Levita a si Jahat tan Obadias a nanlapud saray Merarita,+ tan si Zacarias tan Mesulam a nanlapud saray Kohatita.+ Tan saray Levita, ya amin et eksperton managtogtog,+
13 so mangidadaulo ed saray trabahador* tan sikaray manangasikaso ed amin a komikimey parad nanduruman panaglingkor; tan arum ed saray Levita et sekretaryo, opisyal, tan bantay na puerta.+
14 Et legan dan ipapaway imay kuarta ya inawit ed abung nen Jehova,+ aromog nen Hilkias a saserdote so libro na Ganggan nen Jehova+ ya inter diad panamegley nen* Moises.+
15 Kanian inkuan nen Hilkias ed si Safan a sekretaryo: “Aromog ko may libro na Ganggan diad abung nen Jehova.” Diad saman, inter nen Hilkias so libro ed si Safan.
16 Insan inawit nen Safan ed ari so libro tan inkuan to: “Gagawaen na saray lingkor mo so amin ya inmatalek mod sikara.
17 Inala da may kuartan walad abung nen Jehova, tan impalima da la ed saray aturon lalaki tan ed saray komikimey.”
18 Imbaga to met ed ari: “Walay libro ya inter ed siak nen Hilkias a saserdote.”+ Insan ginapoan nen Safan a basaen itan diad arapan na ari.+
19 Sanen nadngel na ari iray salitan walad Ganggan, pinilat toy kawes to.+
20 Insan oniay ingganggan na ari ed si Hilkias, si Ahikam+ ya anak nen Safan, si Abdon ya anak nen Miqueas, si Safan a sekretaryo, tan si Asaias a lingkor na ari:
21 “La kayo, tupleg kayod si Jehova parad siak tan parad saray akeran manaayam ed Israel tan Juda nipaakar ed saray salita ed sayan aromog a libro; ta say sanok nen Jehova ya ikalbo to lad sikatayo et pinasya la lapud agsinumpal na saray inmuunan atateng tayo so salita nen Jehova, ya agda ginawa so amin ya akasulat ed sayan libro.”+
22 Kanian si Hilkias tan saramay imbaki na ari et linmad si Hulda a propetesa.+ Sikato so asawa nen Salum ya anak nen Tikva ya anak nen Harhas, say mangaasikasod kuarton pananginay kawes, tan si Hulda et manaayam ed Komaduan Distrito na Jerusalem; tan akitongtong irad sikato ditan.+
23 Et imbaga tod sikara: “Oniay inkuan nen Jehova a Dios na Israel, ‘Ibaga yod samay lakin angibaki ed sikayo dia:
24 “Oniay inkuan nen Jehova, ‘Idapok so kadederal ed sayan pasen tan ed saray manaayam dia,+ amin a samba ya akasulat ed libro+ ya imbasa rad ari na Juda.
25 Lapud tinaynan da ak+ tan manpapaasewek iray bagat ed arum a dirios pian sakitay liknaan ko+ diad amin a ginawa na saray lima ra, ikalbok so sanok ko ed sayan pasen tan ag-itan onkepa.’”+
26 Balet oniay ibaga yo ed ari na Juda ya angibakid sikayon ontupleg ed si Jehova, “Oniay inkuan nen Jehova a Dios na Israel: ‘Nipaakar ed saray salitan nadngel mo,+
27 lapud maawat* so pusom tan nampaabeba ka ed arapan na Dios sanen nadngel mo ray salita to nipaakar ed sayan pasen tan saray manaayam dia tan nampaabeba ka ed arapan ko tan pinilat moy kawes mo tan nannangis ka ed arapan ko, dinengel ta ka,+ so imbaga nen Jehova.
28 Kanian itipon ta ka ed saray inmuunan atateng mo,* tan niponpon ka ed lubok mo diad panaon na kareenan, tan agmo la nanengneng so amin a kadederal ya idapok ed sayan pasen tan ed saray manaayam dia.’”’”+
Kayari na satan et impasabi rad ari so ebat.
29 Kanian impatawag na ari so amin a mamatatken na Juda tan Jerusalem, tan tinipon to ra.+
30 Kayari na satan et linmay ari ed abung nen Jehova a kaibay amin a lalaki ed Juda, saray manaayam ed Jerusalem, saray saserdote, saray Levita—amin a totoo, atagey man odino abebay kipapasen da. Et binasa to a sankarengel da so amin a salita ed libro na sipanan ya aromog ed abung nen Jehova.+
31 Say ari et akaalagey ed pasen to tan akisipanan*+ diad arapan nen Jehova a tumboken toy Jehova tan unoren to ray ganggan, panonot, tan saray pananontonan to ed interon puso to tan interon kamarerwa* to+ diad panumpal tod saray salita na sipanan ya akasulat ed sayan libro.+
32 Ontan met, apakiwas ton onabobon ed satan iramay walad Jerusalem tan Benjamin. Tan saray manaayam ed Jerusalem et kinmiwas unong ed sipanan na Dios, say Dios na inmuunan atateng da.+
33 Et ineekal nen Josias so amin a makapadimlan bengatla* diad amin a dalin na saray Israelita,+ tan amin a walad Israel et impanlingkor to ed si Jehova a Dios da. Diad interon bilay to* et nantultuloy iran tinmumbok ed si Jehova a Dios na inmuunan atateng da.
Paimanod leksab
^ Literal, “abung.”
^ Odino “saray managsakbat.”
^ Literal, “diad panamegley na lima nen.”
^ Literal, “anlemek.”
^ Sakey iyan maanlong a balikas parad ipapatey.
^ Odino “akisipanan lamet.”
^ Odino “idolo.”
^ Literal, “Diad amin ya agew to.”
