Komaduan Awaran 7:1-22
7 Et kayari nen Solomon a nampikasi,+ linmeksab so apoy manlapud tawen+ tan sinimot na satan so apay a popoolan tan saray bagat, tan say abung et apano na gloria nen Jehova.+
2 Saray saserdote et agmakaloob ed abung nen Jehova lapud pinano na gloria nen Jehova so abung nen Jehova.+
3 Tan maniimaton so amin a totoo na Israel sanen linmeksab so apoy tan say gloria nen Jehova et walad abung, insan tinmalimukor tan dinmakmomo rad dalin diad pasen a dadalanan tan akisalamat irad si Jehova, “ta sikatoy maomaong; say matoor a panangaro to et mansiansia ya anggad angga.”
4 Diad saman, say ari tan say amin a totoo et angiyapay na saray bagat ed si Jehova.+
5 Si Arin Solomon et angiyapay na bagat a 22,000 baka tan 120,000 karnero. Kanian sinelebraan na ari tan amin a totoo so inagurasyon na abung na tuan Dios.+
6 Saray saserdote et akaalagey ed saray angipasenan ed sikara, ontan met iray Levita a de-awit na saray instrumenton totogtogen pian bansagan so kansion a parad si Jehova.+ (Ginawa nen Arin David irayan instrumento parad pisasalamat ed si Jehova—“ta say matoor a panangaro to et mansiansia ya anggad angga”—sano mandadayew si David a kaiba ra.*) Tan saray saserdote a walad petek da et maksil a mamapaknol na saray trumpeta,+ legan ya akaalagey so amin ya Israelita.
7 Insan pinasanto nen Solomon so pegley na sular a walad arapan na abung nen Jehova, ta ditan so pangiyapayan to na saray apay a popoolan+ tan taba na saray bagat a pandurungoan, lapud agnakarga na samay gansan altar+ a ginawa nen Solomon iray apay a popoolan, apay a kakanen,+ tan saray taba.+
8 Diad saman et pitoy agew a sinelebraan nen Solomon so piesta+ a kaibay interon Israel, sakey a balbaleg a kongregasyon manlapud Lebo-hamat* anggad Kulos* na Ehipto.+
9 Balet diad komawalon agew* et walay sagradon pantitipon da,+ lapud sinelebraan day inagurasyon na altar a pitoy agew tan say piesta a pitoy agew.
10 Insan diad koma-23 agew na komapiton bulan et pinasempet to ray totoo ed saray ayaman da a maliket+ tan magayaga ira lapud kamaongan ya impatnag nen Jehova ed si David tan ed si Solomon tan ed Israel a totoo to.+
11 Kanian asumpal nen Solomon so abung nen Jehova tan say abung* na ari;+ tan amin a pinirawat na puso nen Solomon a gawaen nipaakar ed abung nen Jehova tan ed abung to et agawaan to.+
12 Insan nampanengneng si Jehova ed si Solomon+ diad saman a labi, tan inkuan tod sikato: “Nadngel koy pikakasim, tan pinilik iyan pasen parad siak bilang abung a pambagatan.+
13 Sano saraan koy tawen tan ag-onuran tan sano ibakik iray duron a mangupot ed saray tanaman ed dalin tan no mangidapo ak na salot ed saray totook,
14 no saray totook ya atawag ed ngaran ko+ et manpaabeba+ tan manpikasi ra tan anapen da ak tan taynan da ray mauges a kagagawa ra,+ ondengel ak manlapud tawen tan perdonaen koy kasalanan da tan paabigen koy dalin da.+
15 Natan, ilukas ko ray matak tan layag ko ed saray pikakasi ed sayan pasen.+
16 Tan natan et pinilik tan pinasantok iyan abung pian mansiansia dia a permanente so ngaran ko,+ tan lawas ya akateen dia iray matak tan say pusok.+
17 “Tan no manakar ka ed arapan ko a singa ed impanakar nen David ya amam diad pangunor mo ed amin ya ingganggan kod sika, tan no tumboken mo ray inter kon totontonen tan saray panangukom ko,+
18 iletneg ko so tronom bilang ari,+ unong ed impisipanan kod si David ya amam,+ a kuan ko, ‘Agbalot naandian so pamilyam na anak a laki a manuley ed Israel.’+
19 Balet no onarawi kayo tan ipulisay yo ray bilin tan saray ganggan ya inter kod sikayo tan manlingkor kayo ed arum a dirios tan ondakmomo kayod sikara,+
20 bagoten koy Israel ed dalin ya inter kod sikara,+ tan agko lan balot nengnengen iyan abung a pinasantok parad ngaran ko, tan pagmaliwen ko itan a pantotongtongan* tan balbalawen na amin a totoo.+
21 Tan sayan abung et magmaliw a bunton na saray geray. Amin ya ondalan ditan et onnengneng tan mankelaw+ tan ibaga ra, ‘Akin et oniay ginawa nen Jehova ed sayan dalin tan ed sayan abung?’+
22 Insan ibaga ra, ‘Lapud tinaynan day Jehova+ a Dios na inmuunan atateng da ya angipaway ed sikara diad dalin na Ehipto,+ tan dinmakmomo tan nanlingkor ira ed arum a dirios.+ Saya so rason ya indapo tod sikara irayan amin a desyang.’”+
Paimanod leksab
^ Posiblin manutukoy ed saray Levita.
^ Odino “lolooban na Hamat.”
^ Samay agew kayari na piesta, odino diad koma-15 agew.
^ Odino “palasyo.”
^ Literal, “sakey a proverbio.”
