Unona ed Saray Taga Corinto 10:1-18
10 Natan et siak a mismo, si Pablo, so mikakasi ed sikayo diad inkaulimek tan kaabigan na Kristo,+ anggano say pakanengneng yod siak et makapuy no kaarap yo ak,+ balet ta makmakpel no anggapo ak.+
2 On, mikakasi ak a no wadtan ak, agko komon kaukolan so magmaliw a makpel tan manggaway ambelat iran aksion ya iilaloan kon gawaen ed saramay maniisip a singano nambilay kami unong ed laman.
3 Ta anggano manbibilay kami ed laman, agkami milalaban unong ed saray tendensia na laman mi.
4 Ta saray armas mi ed pilalaban et aliwan makalaman,+ noagta ginawan makapanyari na Dios+ pian nigeba iramay malmalet ya akaletneg.
5 Ta igegeba mi ray panagkatunongan tan amin ya atagey a bengatla a sumpad kakabatan nipaakar ed Dios,+ tan dadaegen mi so balang kanonotan pian magmaliw itan a matulok ed Kristo;
6 tan akaparaan kamin manusa ed siopaman a mangipapatnag na anggan anton klase na agkatutulok,+ kayari yon napaneknekan a sigpot lay katutulok yo.
7 Onnenengneng kayo unong ed itsura. No say sakey et matalek a sikatoy kayarian nen Kristo, nodnonoten to lamet komon iya: No sikatoy kayarian nen Kristo, ontan mi met.
8 Ta no bilang onsobray daiset so pangipasirayew kod autoridad ya inter ed sikami na Katawan pian pabiskegen kayo aliwan pian deralen kayo,+ agak nabaingan.
9 Ta agko labay ya ompaway a singano tataktakoten ta kayo diad panamegley na saray sulat ko.
10 Ta ibabaga ra: “Ambebelat tan mapuersa iray sulat to, balet no wadia et sikatoy makapuy tan aliwan maong a mansalita.”
11 Komon ta nonoten na satan a too a no antoy ibabaga mi* diad saray sulat sano anggapo kami ditan, saya met so gawaen mi sano wadtan kami.+
12 Ta agmi salien ya ipara odino ikomparay sarili mi ed saramay irerekomenda ray sarili ra.+ Seguradon anggapoy pakatalos da lapud susukaten day inkasikara unong ed sarili ran estandarte tan sikara lanlamang so mankokomparaan.+
13 Balet agmi ipasirayew iray bengatlan agkabiangan na kimey ya impabtang ed sikami, noagta say ipasirayew mi labat et samay nagawaan mi diad loob na teritoryan impabtang na Dios ed sikami, a dia et kaiba kayo.+
14 Diad tua, agkami onlalampas ed saray nipabtang ed sikami sanen akasabi kamid sikayo, ta sikami so unaan ya angipasabi ed sikayo na maong a balita nipaakar ed Kristo.+
15 Andi, agmi ipapasirayew iray bengatlan agkabiangan na kimey ya impabtang ed sikami, salanti, saray pansasagpotan na arum, balet maniilalo kami a legan a naaaruman so pananisia yo, naaruman met komon so nagagawaan mi, diad loob na teritorya mi. Diad ontan et lalo nin ondakel so nagawaan mi,
16 pian niyabawag mi so maong a balita ed saray bansa a lampas nid kawalaan yo, diad ontan et agmi ipasirayew iray agawaan la ed teritorya na arum.
17 “Balet samay manpapasirayew et ipasirayew to komon si Jehova.”*+
18 Ta say aabobonan et aliwan samay irerekomenda toy sarili to,+ noagta samay irerekomenda nen Jehova.*+
Paimanod leksab
^ Literal, “no anto kami ed salita.”
^ Nengnengen so Apendise A5.
^ Nengnengen so Apendise A5.
