Komaduan Pedro 2:1-22
2 Balet, wala met iray linmesan palson propeta diad saray totoo, no panon a wala met iray onlesan palson managbangat diad sikayo.+ Saraya et agnaliklikas a mangiloob na makaderal iran sekta, tan ipulisay da ni ingen so katawan ya angaliw ed sikara,+ ya ipaarap dad sarili ra so maples a kadederal.
2 Niarum ni, dakel so mangalig ed saray anggapoy-baing a kagagawa* ra,+ tan lapud sikara et napansalitaan na mauges so dalan na katuaan.+
3 Ontan met, sikaray maagum a manganamot ed sikayo ed panamegley na palso iran salita. Balet say pangukom ed sikara, ya abayag lan denesidi,+ et aliwan matantan, tan say kaderal da et seguradon onsabi.+
4 Sineguro na Dios a nadusa iray anghel a nankasalanan,+ ya imbasileng to ra ed Tartaro,*+ a binalor to ra na gulonggulong* diad makapal a kabilungetan, tan nigana ira ed panangukom.+
5 Sineguro to met a nadusa so mundo nensaman,+ balet si Noe, a managpulong na inkatunong,+ pati say pitora ni+ et inliktar to sanen dinelap to so mundo na mauges a totoo.+
6 Tan inukom to ray syudad na Sodoma tan Gomorra, ya impagmaliw to iratan a dapol.+ Saya so onkanan pasakbay* ed no antoy nagawad saray mauges a totoo.+
7 Tan inliktar toy matunong a Lot,+ a naermenan a maong lapud anggapoy-baing a kagagawa* na saray totoon mananumlang na ganggan—
8 ta sayan matunong a too et inagew-agew a makakaliknay irap lapud saray gawan sumlang ed ganggan ya anengneng tan nadngel to legan a manaayam ed limog da.
9 Kanian sirin, amta nen Jehova* no panon ya iliktar ed subok iray totoon walaan na debosyon ed Dios,+ tan igana ed kadederal iray agmatunong a totoo diad agew na panangukom,+
10 nagkalalo la iramay manpipilalek a dutakan so laman na arum+ tan saramay manleleglemew ed autoridad.+
Ag-ira mangikabkabilangan tan ipipilit day panlabayan da, tan ag-ira antakot a pansalitaan na mauges iramay pinagalangan na Dios,
11 balet saray anghel, anggano mas mabiskeg ira tan makapanyari, et ag-angakusa ed sikara diad panamegley na makapainsulto iran salita, lapud respeto ra ed si* Jehova.*+
12 Balet sarayan totoo, a singa andiay kalakal ya ayayep ya onkikiwas unong ed nisipor ed sikara tan niyanak pian erelen tan pateyen, et mansasalita na mauges nipaakar ed saray bengatlan agda amta.+ Naderal ira lapud makaderal a kagagawa ra,
13 a napasakitan ira bilang dusa ed makapasakit a kagagawa ra.
Ipapasen dan makapaliket so mansawasawa ed maluhon kabibilay,+ anggan diad kaagwan. Sikaray matik tan mantsa, a panliliketan dan maong a palikdoen so arum diad panamegley na saray palson bangat da legan iran midudungo ed sikayo diad saray ponsia.+
14 Saray mata ra et napno na pikakalugoran+ tan agda nayarian a tundaan so mankasalanan, tan iingganyoen da iramay makapuy so pananisia ra.* Say puso ra et nipasal ed panag-agum. Sikaray ananak a nisamba.
15 Lapud tinaynan da so maptek a dalan, nibalang ira. Tinumbok da so dalan nen Balaam+ ya anak nen Beor, a pinabli toy tumang ed panaggaway mauges,+
16 balet binano lapud sinumlang to no antoy duga.+ Inamper na sakey ya andiay boses ya asno a nansalitan singa too so makulangkulang a gagawaen na sayan propeta.+
17 Singa ra andiay danum a subol tan kelpa ya isisiplog na maksil a bagyo, tan nitaryad sikara so sigpot a kabilungetan.+
18 Saray ibabaga ra et singa makapadinayew balet andi-kakanaan. Diad panamegley na saray pilalek na laman+ tan saray anggapoy-baing a kagagawa* et iingganyoen da ray totoon kakkalukpos da ni labat ed saramay manbibilay ed kasalanan.+
19 Isisipan dad saratan so kawayangan balet ta sikaran mismo et ariripen na kabubulok;+ ta no say sakey a too et nadadaeg na sananey a too, sikatoy aripen to.*+
20 No akalukpos la rad saray karutakan na mundo+ diad panamegley na suston kakabatan nipaakar ed Katawan tan Manangiliktar a si Jesu-Kristo insan ira mibiang lamet ed saraya tan nadaeg ira, say kipapasen da et mas mauges nen say dati.+
21 Ta mas maong nin agda la sigpot a naamtaan so dalan na inkatunong nen say naamtaan da itan insan agda lanlamang unoren so masanton ganggan ya inawat da.+
22 Tinmua ed sikara imay ibabaga na proverbio: “Kinan lamet na aso so uta to, tan say inames lan baboy et nantiblak lamet.”+
Paimanod leksab
^ Odino “saray mabanbanday a kagagawa.” Plural na Griegon salita ya aselgeia. Nengnengen so Glosaryo.
^ Odino posiblin, “ya inyan to rad saray abot.”
^ Literal, “pangaligan.”
^ Nengnengen so Apendise A5.
^ Odino “diad arapan nen.”
^ Nengnengen so Apendise A5.
^ Odino “iramay aliwan mapekder.”
^ Odino “saray mabanbanday a kagagawa.” Plural na Griegon salita ya aselgeia. Nengnengen so Glosaryo.
^ Odino “kokontrolen na sakey a bengatla, sikatoy aripen na satan.”
