Komaduan Pedro 3:1-18
3 Inad-arok ya agagi, komadua la yan sulat ko ed sikayo, a diad saya, singa samay inmuna, et liingen ko so malinew a panagnonot yo diad panamegley na sakey a panonot,+
2 pian nanonotan yo ray salita ya imbaga nensaman* na saray masanton propeta tan say ganggan na Katawan tan Manangiliktar ya impasabi na saray apostol yo.
3 Unona, amtaen yo a diad kaunoran iran agew et wala ray mabalaw a balawen da ray maong a bengatla tan tumboken da ray pilalek da+
4 tan ibaga ra: “Agta insipan toy isabi* to, balet kawalaan to ey?+ Manlapu lad impatey* na saray inmuunan atateng mi, pareho nin siansia so amin a bengatla manlapu la nen pinalsa so mundo.”+
5 Ta ginagala ran imbaliwala iyan katuaan a nensaman et walay tawen tan sakey a dalin a malet ya akaletneg ed tapew na danum tan apaliberan na danum diad panamegley na salita na Dios;+
6 tan diad panamegley na saratan, say mundo ed saman a panaon et aderal sanen adelap itan.+
7 Balet diad panamegley na satan lanlamang a salita, say tawen tan say dalin a wala natan et nigana ed apoy tan pansiasiansiaen ya anggad agew na pangukom tan paneral ed mauges a totoo.+
8 Balet, inad-arok ya agagi, nonot yo a say sakey agew ed si Jehova* et sanlibon taon tan say sanlibon taon et sakey agew.+
9 Si Jehova* et aliwan matantan nipaakar ed sipan to,+ a singa iisipen na arum a totoo, noagta sikatoy maan-anos ed sikayo ta agto labay a walay siopaman a naderal noagta labay to ya amin et naikday pankanawnawan magbabawi.+
10 Balet say agew nen Jehova*+ et onsabin singa matakew,+ a diad satan et naandi so tawen+ diad maksil ya ungol, balet saray elemento ya ampetapetang et natunaw, tan say dalin tan saray kimey ditan et omparungtal.*+
11 Lapud natunaw irayan amin a bengatla, nonot yo no anton klase na totoo so nepeg yon pagmaliwan, a nepeg kayon manbilay a masanto tan saray gawa yo et pakapatnagan na debosyon ed Dios,
12 legan yon aalagaren tan sankanonot a lanang* so isabi* na agew nen Jehova,*+ a diad panamegley na satan, say tawen et naderal+ ed apoy tan saray elemento et natunaw ed pinasyan petang!
13 Balet walay balon tawen tan balon dalin ya aalagaren tayo unong ed sipan to,+ tan diad saraya et manayam so inkatunong.+
14 Kanian inad-arok ya agagi, lapud aalagaren yo irayan bengatla, gawa yoy anggaay nayarian yo a naromog to kayon andiay mantsa, andiay pakabalawan, tan walad kareenan.+
15 Niarum ni, ipasen yon kililiktar so panaanos na Katawan tayo, a singa ed insulat met ed sikayo na inad-aro tayon agi a si Pablo unong ed karunongan a niiter ed sikato,+
16 ya imbaga to irayan bengatla ed amin a sulat to. Balet wala ray mairap a talosan ed saratan, tan sarayan bengatla et pipikeweten na saramay anggapoy amta* tan makapuy so pananisia ra,* a singa gagawaen da met ed arum a kabiangan na Kasulatan, a pakaderalan da.
17 Kanian inad-arok ya agagi, lapud amta yo la iya, manalwar kayo pian agkayo nibalang a kaiba ra diad panamegley na panamalikdo na saray totoon mananumlang na ganggan tan lapud saya et ompan onkapuy so pananisia yo.+
18 Imbes, mantultuloy komon ya ombaleg so naawat yon agnaparaan a kaabigan tan say kakabatan yo nipaakar ed Katawan tan Manangiliktar tayo a si Jesu-Kristo. Sikatoy nigloria komon natan ya anggad angga. Amen.
Paimanod leksab
^ Odino “ray bengatlan impasakbay.”
^ Literal, “kiwawala.”
^ Literal, “inyugip.”
^ Nengnengen so Apendise A5.
^ Nengnengen so Apendise A5.
^ Salanti, omparungtal pian upoten na apoy.
^ Nengnengen so Apendise A5.
^ Odino “pirpirawaten.” Literal, “papepelesen.”
^ Literal, “kiwawala.”
^ Nengnengen so Apendise A5.
^ Odino “ag-abangatan.”
^ Odino “aliwan mapekder.”
