Komaduan Samuel 10:1-19
-
Impanalo ed Ammon tan Sirya (1-19)
10 Ag-abayag et inatey so ari na saray Ammonita,+ tan si Hanun ya anak to so nagmaliw ya ari a kasalat to.+
2 Diad saman et inkuan nen David: “Ipatnag koy matoor a panangaro ed si Hanun ya anak nen Nahas no panon ya impatnag nen ama to so matoor a panangaro ed siak.” Kanian imbaki nen David iray lingkor to pian sikatoy ligliwaen da lapud impatey na ama to. Balet kasabi na saray lingkor nen David diad dalin na saray Ammonita,
3 oniay imbaga na saray prinsipe na saray Ammonita ed si Hanun a katawan da: “Padesir mo, labay nen David a pagalangan si amam kanian angibaki na saray manligliwa ed sika? Agkasi imbaki nen David iray lingkor to pian manusisa tan man-espiya ra ed syudad tan deralen da itan?”
4 Kanian inala nen Hanun iray lingkor nen David tan inahit toy balbas+ ed kapaldua na lupa ra tan pinutot to ya anggad tapi iray kawes da, insan to ra pinataynan.
5 Sanen nibalita iyad si David, sikatoy angibakin tampol na lalaki a mangabet ed sikara, lapud apabaingan iran maong; tan inkuan na ari ed sikara: “Manayam kayod Jerico+ anggad ontubo iray balbas yo, insan kayo ompawil.”
6 Diad saginonor et alikas na saray Ammonita a kabkabusol la ra nen David, kanian angibaki ira na saray mensahero tan inupaan da iray Siryano ed Bet-rehob+ tan saray Siryano ed Zoba,+ 20,000 manaakar a sundalo; tan say ari na Maaca,+ a kaibay 1,000 lalaki; tan manlapud Istob,* 12,000 lalaki.+
7 Sanen nadngelan itan nen David, imbaki toy Joab tan say interon armada, pati saray sankabiskegan a sundalo to.+
8 Tan pinmaway iray Ammonita tan nandarasig ira diad lolooban ed puerta na syudad pian miguerra, ya akaposisyon ed uma iray Siryano ed Zoba tan Rehob, kaiba so Istob* tan Maaca.
9 Sanen anengneng nen Joab a wala ray akaposisyon ya armada diad arapan tan benegan to pian milaban ed sikato, sikatoy amili na pigara ed saray sankamaongan a sundalo na Israel tan impandarasig to ra pian milaban ed saray Siryano.+
10 Inyan tod pakauley* nen Abisai+ ya agi to iray arum a lalaki, pian pandarasigen to ran milaban ed saray Ammonita.+
11 Insan inkuan to: “No nanengneng mon natatalo ak la na saray Siryano, tulongan mo ak; balet no natatalo ka la na saray Ammonita, tulongan ta ka.
12 Kaukolan ta’y manpabiskeg tan manpakpel+ parad saray kabaleyan ta tan parad saray syudad na Dios tayo, tan gawaen nen Jehova no antoy maong ed pakanengneng to.”+
13 Insan linmusob si Joab tan saray sundalo to pian milaban ed saray Siryano, tan apabatik to ra.+
14 Sanen anengneng na saray Ammonita a binmatik la ray Siryano, imbatikan da met lay Abisai tan linmoob irad syudad. Pinmawil si Joab ed Jerusalem kayari na impilaban tod saray Ammonita.
15 Sanen anengneng na saray Siryano ya atalo la ra na Israel, nantitipon ira lamet.+
16 Kanian impatawag nen Hadadezer+ iray Siryano a walad rehyon na Ilog,*+ insan ira linma ed Helam, tan indaulo ira nen Sobac a pangulo na armada nen Hadadezer.
17 Sanen nibalita itan ed si David, tinipon ton tampol so interon Israel tan binmaliw irad Jordan tan akasabi rad Helam. Insan nandarasig iray Siryano pian miguerra ed si David tan akilaban irad sikato.+
18 Balet apabatik na Israel iray Siryano; tan pinatey nen David so 700 ya akakarwahe tan 40,000 de-kabayoan a sundalo na saray Siryano, tan pinatey to met diman si Sobac a pangulo na armada ra.+
19 Sanen anengneng na amin ya arari, saray lingkor nen Hadadezer, ya atalo la ra na Israel, akikareenan iran tampol ed Israel tan nagmaliw iran uuleyan da;+ tan antakot la iray Siryano ya ontulong ed saray Ammonita.
Paimanod leksab
^ Odino “lalaki ed Tob.”
^ Odino “lalaki ed Tob.”
^ Literal, “lima.”
^ Salanti, say Eufrates.
