Komaduan Samuel 11:1-27
11 Kagapo na taon,* diad panaon na pigueguerra na saray arari, imbaki nen David si Joab tan saray lingkor to tan say interon armada na Israel pian deralen iray Ammonita, tan kinubkob da so Raba,+ balet nansiansia ed Jerusalem si David.+
2 Sakey a labi* et binmangon si David ed dukolan to tan nanakar-akar ed toktok na abung* na ari. Manlapud toktok et anengneng toy sakey a biin manaames, tan magangganan maong imay bii.
3 Angibaki si David na mantepet nipaakar ed samay bii, tan oniay impaamta to: “Sikato si Bat-sheba+ ya anak nen Eliam,+ say asawa nen Urias+ a Heteo.”+
4 Insan angibaki si David na saray mensahero a mangawit ed bii.+ Kanian linmad sikato imay bii tan inakdolan to.+ (Agawa iya sanen lilinisan na bii so inkasikato ed agto inkamalinis.*)+ Kayari na satan et sikatoy pinmawil lad abung to.
5 Nanlukon imay bii, tan sikatoy angipasabi na mensahe ed si David: “Malukon ak.”
6 Diad saman et oniay mensahen impasabi nen David ed si Joab: “Ibakim ed siak si Urias a Heteo.” Kanian imbaki nen Joab si Urias ed si David.
7 Kasabi nen Urias, kinumusta nen David so kipapasen nen Joab, saray sundalo, tan no anto lay nagagawa ed pigueguerra ra.
8 Insan inkuan nen David ed si Urias: “Sempet kad abung mo tan manpainawa ka.”* Sanen tinmaynan lay Urias ed abung na ari, impawit da so regalo na ari* ed sikato.
9 Balet agsinmempet si Urias ed abung to, noagta naugip ed arap na puerta na abung na ari a kaiba toy arum iran lingkor na katawan to.
10 Kanian inkuan dad si David: “Agsinmempet si Urias ed abung to.” Diad saman et inkuan nen David ed si Urias: “Agta kasabisabim a nanlapud biahe? Akin et agka sinmempet ed abung mo?”
11 Oniay inyebat nen Urias ed si David: “Say Kaban+ tan say Israel tan say Juda et manaayam ed saray temporaryon siroman, tan si Joab a katawan ko tan saray lingkor na katawan ko et mankakampo ed uma. Kanian onsempet ak kasi ed abung ko pian mangan tan oninum, tan akdolan ko so asawak?+ Unong a mabilay ka tan manbibilay ka,* agko itan gawaen!”
12 Insan inkuan nen David ed si Urias: “Mansiansia ka ni dia natan, tan nabuas ta ka la ibaki.” Kanian nansiansiad Jerusalem si Urias diad saman ya agew tan diad tinmumbok ya agew.
13 Kanian sikatoy impatawag nen David pian mangan tan oninum a kaiba to, tan sikatoy binuek to. Balet diad labi et sikatoy pinmaway tan naugip ed dukolan to a kaiba iray lingkor na katawan to, tan agsinmempet ed abung to.
14 Diad kabuasan et sinulatan nen David si Joab tan impawit to itan ed si Urias.
15 Oniay insulat to: “Ipuestom ed arapan si Urias, diad kawalaay graben panlalaban. Insan onatras kayo pian sikatoy nakabil tan ompatey.”+
16 Maalwar ya inobserbaan nen Joab so syudad, tan impuesto toy Urias ed pasen ya amta ton kawalaan na saray mabibiskeg a sundalo na kalaban.
17 Sanen pinmaway iray totoo ed syudad tan akilaban irad si Joab, inatey so arum ed saray lingkor nen David, tan si Urias a Heteo et kaiba ed saramay inatey.+
18 Natan et imbalita nen Joab ed si David so amin a nagagawa ed guerra.
19 Binilin to imay mensahero: “Kayarim a mitongtong ed ari nipaakar ed amin a nagagawa ed guerra,
20 ompan onsanok so ari tan ibaga tod sikan, ‘Akin et kaukolan yoy onsingger a maong ed syudad pian milaban? Agyo ta amta a panaen da kayo manlapud tapew na padir?
21 Siopay akapatey ed si Abimelec+ ya anak nen Jerubeset?+ Agta sakey a bii ya angipelag na gilingan ed sikato manlapud tapew na padir, a sengegay impatey to diad Tebez? Akin et kaukolan yoy onsingger a maong ed padir?’ Insan ibagam, ‘Inatey met so lingkor mon si Urias a Heteo.’”
22 Kanian linma so mensahero tan imbaga tod si David so amin ya impaibaga ed sikato nen Joab.
23 Insan inkuan na mensahero ed si David: “Adaeg kami na saray totoo ra, tan pinmaway iran milaban ed sikami diad uma; balet apaatras mi ra ya anggad arap na puerta na syudad.
24 Tan manlapud tapew na padir et pinapana da iray lingkor mo, kanian inatey so arum ed saray lingkor na ari; inatey met so lingkor mon si Urias a Heteo.”+
25 Diad saman et inkuan nen David ed samay mensahero: “Oniay ibagam ed si Joab: ‘Agka komon nagogonigon lapud saya, ta anggan siopa et nayarin ompatey ed espada. Pabiskeg moy pilalaban mod syudad tan sakop mo itan.’+ Tan pakasil moy liknaan to.”
26 Sanen nadngelan na asawa nen Urias ya inatey lay asawa to, sikatoy nanermen nisengeg ed asawa to.
27 Kayari na panaoy impanermen to, sikatoy tampol ya impaala nen David pian awiten tod abung to, tan sikatoy nagmaliw ya asawa to+ tan angiyanak na sakey a laki. Balet agmakapaliket ed si* Jehova+ so ginawa nen David.
Paimanod leksab
^ Nayarin diad bulan na Abib (Nisan) na saray Judio. Nengnengen so Apendise B15.
^ Odino “Diad pansirunget.”
^ Odino “palasyo.”
^ Nayarin say agto inkamalinis lapud panreregla.
^ Literal, “urasan mo iray salim.”
^ Odino “apag na ari,” salanti, say apag ya ipapawit na anangkaili parad pinagalangan a bisita.
^ Odino “tan unong a mabilay so kamarerwam.”
^ Literal, “mauges ed saray mata nen.”
