Komaduan Samuel 13:1-39
13 Natan, si Absalom ya anak nen David et walaan na magangganan agi a manngaray Tamar,+ tan sikatoy agustoan nen Amnon+ ya anak nen David.
2 Agaylay ermen nen Amnon kanian sikatoy nansakit lapud agi ton si Tamar, ta sikatoy sakey a birhen, tan singa imposible ed si Amnon a nagawaan toy labay tod sikato.
3 Natan et walay kaaro nen Amnon a manngaray Jehonadab+ ya anak nen Simeah,+ a kuya nen David; tan si Jehonadab et sakey a sankasiliban a too.
4 Kanian inkuan tod sikato: “Akin a maer-ermen kan naynay anta anak kay ari? Ibagam pad siak.” Inmebat si Amnon ed sikato: “Walay panggustok ed si Tamar, say agi+ nen Absalom ya agik.”
5 Oniay inyebat ed sikato nen Jehonadab: “Dukol kad dukolan mo tan mankunkunwari kan mansasakit. Sano onlad sikay amam, ibagam ed sikato, ‘Ipangasi yon paonlaen diay Tamar ya agik pian itaryaan to ak na naakan. Labay kon sikaton mismo so mangitarya na naakan parad mansasakit,* tan pakanen to ak.’”
6 Kanian dinmukol si Amnon tan nankunkunwarin mansasakit, tan linmad sikato so ari. Insan inkuan nen Amnon ed ari: “Ipangasi yon paonlaen diay Tamar ya agik pian sikatoy nanengneng kon manluto na duaran bibingka a kurti-puso, tan pakanen to ak.”
7 Kanian angipasabi na mensahe si David ed si Tamar diad abung, ya inkuan to: “Ipangasim, la kad abung nen kuyam ya Amnon tan mangitarya kay naakan* parad sikato.”
8 Kanian linmay Tamar ed abung nen Amnon a kuya to, a diman so akarukolan to. Sikatoy angala na minasa ya arina tan ginawa ton bibingka tan inluto to iratan a sankanengneng nen Amnon.
9 Insan inala to so kawali tan sikatoy sinerbian to. Balet aglabay nen Amnon so mangan tan inkuan to: “Pataynan mo ran amin dia!” Kanian sikatoy tinaynanan da.
10 Inkuan natan nen Amnon ed si Tamar: “Iyakar mod loob na kuarto so naakan,* pian kanen ko itan.” Kanian inala nen Tamar iray kurti-puso a bibingkan inluto to tan inyakar to iratan ed si Amnon a kuya to diad loob na kuarto.
11 Sanen inyasingger iratan nen Tamar ed sikato pian mangan, siningkat toy Tamar tan inkuan to: “Gala, miakdol kad siak, agik.”
12 Balet inkuan tod sikato: “Aleg, kuya! Agmo ak iiyan ed kababaingan, ta ag-iya gagawaen ed Israel.+ Agka manggagaway makapabaing.+
13 Ta panon kon nitepel so ontan a kababaingan? Tan magmaliw kan sakey ed saray makapabaing a lalaki ed Israel. Ipangasim, mitongtong ka natan ed ari ta agto ak isiblet ed sika.”
14 Balet sikatoy agto dinengel, tan pinuersa ton inakdolan tan pinabanday to.
15 Insan sikatoy binusol a maong nen Amnon, tan say pambusol to et mas ni nen samay alikna ton panangaro ed sikato. Inkuan nen Amnon ed sikato: “Alagey ka; taynan ka la!”
16 Diad saman et inkuan nen Tamar ed sikato: “Aleg, kuya, ta say pamataynan mod siak et mas mauges ni nen say ginawam ed siak!” Balet sikatoy agto dinengel.
17 Diad saman et tinawag to so kalangweran a lingkor to tan inkuan to: “Ipaway mo dia iyan bii, ipangasim, tan kapaway to et italak moy puerta.”
18 (Natan et akasulong na espisyal* a kawes si Tamar, ta ontan so isusulong na saray birhen ya ananak na ari.) Kanian sikatoy impaway na lingkor to, tan kapaway to et intalak toy puerta.
19 Insan angiyan si Tamar na dapol ed ulo to,+ tan pinilat toy marakep a kawes to; tan inyan tod ulo to iray lima to tan linma la, a manak-akis legan a manaakar.
20 Diad saman et sikatoy tinepetan nen Absalom+ a kuya to: “Agta si Amnon a kuyam so kaibam? Agka la sirin oneesel, agik, ta kuyam.+ Agmo la iya eem-eman ed pusom.” Kanian nambukbukor a nanayam si Tamar ed abung nen Absalom a kuya to.
21 Sanen nadngelan nen Arin David irayan amin ya agawa, sikatoy sinmanok a maong.+ Balet agto nayarian a sakitan so liknaan nen Amnon ya anak to, lapud sikatoy inaro to, ta sikatoy panguloan.
22 Tan anggapon balot so mauges odino maong ya imbaga nen Absalom ed si Amnon; ta binusol nen Absalom+ si Amnon lapud pinabanday toy Tamar ya agi to.+
23 Kayari na duay taon, saray managkiskis na bagoy karnero nen Absalom et walad Baal-hazor, ya asingger ed Efraim,+ tan inimbitaan nen Absalom so amin a lalakin ananak na ari.+
24 Kanian linmay Absalom ed ari tan inkuan to: “Papakiskisan na lingkor mo iray karnero to. Mila komon ed siak so ari tan saray lingkor to.”
25 Balet inkuan na ari ed si Absalom: “Andi, ana’ko. No onla kamin amin, magmaliw kamin pabelat ed sika.” Anggan panoy pamipilit nen Absalom, sikatoy aglinma, balet benendisyonan to.
26 Insan inkuan nen Absalom: “No aliwan sika sirin, ipangasim, abuloyan mon milad sikami si Amnon ya agik.”+ Inmebat so ari ed sikato: “Akin et sikatoy labay mon ipila?”
27 Balet sikatoy pinilit nen Absalom, kanian inabuloyan ton mila si Amnon tan say amin a lalakin ananak na ari.
28 Insan ingganggan nen Absalom iray lingkor to: “Manimano kayo, tan sano malikeliket lay puso nen Amnon lapud alak, ibagak ed sikayo, ‘Patey yoy Amnon!’ Insan yo pateyen. Agkayo ontatakot, ta siak so mangigaganggan ed sikayo. Manpabiskeg tan manpakpel kayo.”
29 Kanian amin ya ingganggan nen Absalom ed saray lingkor to et ginawa rad si Amnon; insan inmalagey so arum nin lalakin ananak na ari, tan kada sakey et linmugan ed asno to tan batik.
30 Legan a wala rad dalan, oniay sinmabin balita ed si David: “Pinatey nen Absalom so amin a lalakin ananak na ari, tan anggapod sikaray akaliktar.”
31 Diad saman et inmalagey so ari tan pinilat to iray kawes to tan dinmukol ed dalin, tan akaalagey ed abay to so amin a lingkor to ya apilat iray kawes da.
32 Balet oniay inkuan nen Jehonadab+ ya anak nen Simeah,+ a kuya nen David: “Agkomon iisipen na katawan ko a pinatey dan amin so kalangweran a lalakin ananak na ari, ta si Amnon labat so inatey.+ Ingganggan iya nen Absalom, ta ginetma to la itan+ manlapud samay agew a pinabanday nen Amnon si Tamar+ ya agi to.+
33 Natan et agkomon imanoen* na katawan kon ari so balita ya, ‘Inatey ya amin so lalakin ananak na ari,’ ta si Amnon labat so inatey.”
34 Kaleganan na satan et batik lay Absalom.+ Diad saginonor et abantag na managbantay a walay dakel a totoon onsasabi manlapud dalan diad abay na palandey.
35 Diad saman et inkuan nen Jehonadab+ ed ari: “Akapawil la iray ananak na ari, unong ya imbaga na lingkor mo.”
36 Kayari ton nansalita, linmoob iray ananak na ari tan manak-akis ira; nanakis met a maong so ari tan say amin a lingkor to.
37 Balet batik lay Absalom tan linmad si Talmai+ ya anak nen Amihud ya ari na Gesur. Pigay agew a nanermenan nen David so impatey na anak to.
38 Batik tan linmad Gesur+ si Absalom, tan nanayam diman ed loob na taloy taon.
39 Diad kaunoran et pinirawat nen Arin David so onlad si Absalom, ta naawat to lay* impatey nen Amnon.
Paimanod leksab
^ Odino “tinapay a manligliwa.”
^ Odino “tinapay a manligliwa.”
^ Odino “tinapay a manligliwa.”
^ Odino “adekorasyonan.”
^ Literal, “iyan ed puso.”
^ Odino “ta naandi lay ermen tod.”
