Komaduan Samuel 14:1-33
14 Natan et naamtaan nen Joab ya anak nen Zeruia+ a makakailiw la so ari ed si Absalom.+
2 Kanian impatawag nen Joab ed Tekoa+ so sakey a masilib a bii tan inkuan tod sikato: “Ipangasim, mankunkunwari kan singa maneermen, tan mansulong kay kawes parad paneermen, tan agka manpupuyok na larak.+ Mankunkunwari kan singa sakey a biin abayag lan maneermen lapud inateyan.
3 Insan onla ka tan oniay pitongtong mod ari.” Diad saman et indikta nen Joab no antoy ibaga na samay bii.
4 Linmad ari so biin Tekoita tan tinmalimukor tan dinmakmomo ed dalin tan inkuan to: “Tulongan mo ak, O ari!”
5 Inkuan na ari ed sikato: “Antoy problema?” Diad saman et inkuan to: “Sakey ak a balo; inatey lay asawak.
6 Tan siak a lingkor mo et walaan na duaran ananak, tan nanlaban irayan dua ed uma. Anggapoy linman nambano ed sikara, tan samay sakey et pinatey toy agi to.
7 Natan, say interon pamilya et sumpad siak a lingkor mo, tan ibabaga ran, ‘Iyawat mo imay amatey ed agi to, pian sikatoy napatey mi nisengeg ed bilay* na agi to a pinatey to,+ anggano naandi la so tomatawir!’ Erepen da so nakekeraan a mandarlang a ngalab ko* tan anggapoy itilak dan ngaran tan anggapoy ikera dan poli* na masiken ko diad tapew na dalin.”
8 Insan inkuan na ari ed samay bii: “Sempet ka lad abung mo, ta mangiter ak na ganggan parad sika.”
9 Diad saman et inkuan na biin Tekoita ed ari: “O katawan kon ari, siak tan say sankaabungan na amak so natetel komon, tan mansiansian andiay kasalanan so ari tan say trono to.”
10 Kanian inkuan na ari: “No walay mansalita nid sika, iyakar mo dia, tan agto ka lan balot guloen.”
11 Balet inkuan to: “Nonoten pa komon na ari si Jehova a Dios mo, pian agla mamasakit so manangibales na dala+ tan agto pateyen so ana’ko.” Inyebat to: “Unong a mabilay si Jehova,+ anggapoy anggan sakey a buek na anak mo a napelag ed dalin.”
12 Inkuan natan na bii: “Ipangasim, abuloyan mon mansalita ed katawan kon ari so lingkor mo.” Kanian inkuan to: “Mansalita ka!”
13 Inkuan na bii: “O ari, akin et ninonot moy manggawa na panamasakit ed saray totoo na Dios?+ Agmo pinapawil so anak mon pinataynan mo+ kanian mankakasalanan ka lapud sayay kapkapangibagam.
14 Ompatey itayon amin tan magmaliw a singa danum a niyibung ed dalin ya agla nipawil. Balet agpaandien na Dios so sakey a bilay,* tan ikokonsidera to iray rason no akin a samay apataynan et agnepeg a mansiansian ontan.
15 Linma ak dia pian nibagak iya ed katawan kon ari, ta tinaktakot ak na saray totoo. Kanian inkuan na lingkor mo, ‘Mansalita ak ed ari. Agla pigan onkiwas so ari nisengeg ed kerew na aripen to.
16 Ompan ondengel so ari tan iliktar to so aripen to ed samay malabay a mamatey ed siak tan ed alenleneg ya anak ko diad tawir ya inter na Dios ed sikami.’+
17 Insan inkuan na lingkor mo, ‘Komon ta say salita na katawan kon ari et mangiter na pakainawaan ko,’ ta say katawan kon ari et singa anghel na tuan Dios a nibiig toy maong ed mauges. Komon ta walad sika si Jehova a Dios mo.”
18 Oniay inyebat natan na ari ed samay bii: “Ipangasim, anggapo komoy iyaamot mod antokaman ya itepet ko.” Inmebat so bii: “Mansalita komon so ari.”
19 Kanian intepet na ari: “Si Joab so angiganggan ed sika a manggawa ed saya?”+ Inmebat so bii: “Unong a mabilay ka,* O katawan kon ari, susto so imbaga na katawan kon ari, ta si Joab a lingkor mo so angiganggan ed siak tan indikta tod lingkor mo so amin ya ibagak.
20 Ginawa iya nen Joab a lingkor mo pian nauman so panmoriam ed saya, balet say karunongan na katawan ko et singa karunongan na anghel na tuan Dios, tan amta to so amin a nagagawa ed sayan dalin.”
21 Diad saman et oniay inkuan na ari ed si Joab: “Sige sirin, gawaen ko iya.+ La ka tan ipawil mo so kalangweran a lakin si Absalom.”+
22 Diad saman et tinmalimukor tan dinmakmomoy Joab tan inrayew to so ari. Inkuan nen Joab: “Naamtaan natan na lingkor mo ya agamoran koy panangabobon mo, O katawan kon ari, lapud kinmiwas so ari nisengeg ed kerew na lingkor to.”
23 Insan inmalagey si Joab tan linmad Gesur+ tan inyakar tod Jerusalem si Absalom.
24 Balet inkuan na ari: “Papawil yod dilin abung to, balet agto nayarin onarap ed siak.” Kanian pinmawil si Absalom ed dilin abung to, tan agto inmarap ed ari.
25 Natan, diad interon Israel et anggapoy lakin nirayrayew a singa si Absalom lapud inkaguapo to. Manlapud dapan ya anggad toktok na ulo to et anggapoy nabalaw ed sikato.
26 Sano katlian toy buek to, manbelat itan na 200 a siklo* unong ed baton panagsimbang diad palasyo.* (Kaukolan ton katlian kapagno manampot so taon lapud ambelabelat la parad sikato.)
27 Awalaan si Absalom na taloran ananak+ a lalaki tan sakey ya anak a bii a manngaran na Tamar. Sikatoy magangganan maong.
28 Tan nantultuloy a nanayam ed Jerusalem si Absalom diad loob na duay taon, balet agto inmarap ed ari.+
29 Kanian impatawag nen Absalom si Joab pian nibaki to ed ari, balet aglinmay Joab. Insan pinidua toy angibaki, balet siansia nin agto labay so onla.
30 Diad kaunoran et imbaga tod saray lingkor to: “Say dalin nen Joab et walad abay na dalin ko, tan walay tanem ton sebada diman. La kayo tan poolan yo.” Kanian pinoolan na saray lingkor nen Absalom so dalin to.
31 Diad saman et inmalagey si Joab tan linmad abung nen Absalom tan inkuan tod sikato: “Akin et pinoolan na saray lingkor mo so dalin ko?”
32 Inmebat si Absalom ed si Joab: “Impasabik iyan mensahe ed sika, ‘La ka dia ta ibaki ta kad ari pian itepet mo: “Akin et linma ak ni dia manlapud Gesur?+ Maong nin nansiansia ak la diman. Kanian abuloyan mo ak ya onarap ed ari, tan no walay kasalanan ko, ipapatey to ak.”’”
33 Kanian linmay Joab ed ari tan imbaga to iya. Insan tinawag toy Absalom, tan sikatoy linmad ari tan tinmalimukor tan dinmakmomo ed dalin diad arapan na ari. Insan inangoban na ari si Absalom.+
Paimanod leksab
^ Odino “kamarerwa.”
^ Salanti, say kaunoran lan ilalo parad pakawalaay ilalak.
^ Odino “mabilay ed pamilya.” Literal, “nakdaan.”
^ Odino “kamarerwa.”
^ Odino “so kamarerwam.”
^ Manga 2.3 kilo. Nengnengen so Apendise B14.
^ Saya et nayarin sakey a simbang a pinagkabasiyan ya uusaren ed palasyo, odino “siklo diad palasyo” a duma ed samay ordinaryon siklo.
