Komaduan Samuel 16:1-23
16 Sanen akalampas na daiset si David diad toktok na palandey,+ wadman si Ziba+ a lingkor nen Mefiboset+ a mangabet ed sikato tan walay awit ton duaran asno, tan nilugan ed saratan so 200 a tinapay, 100 a bibingkan pasas, 100 a bibingkan gawad saray prutas ed panaoy tiagew,* tan sakey a baleg a buyog na alak.+
2 Insan inkuan na ari ed si Ziba: “Akin et angawit ka na saraya?” Inmebat si Ziba: “Saray asno et luganan na sankaabungan na ari, say tinapay tan saray prutas ed panaoy tiagew et kanen na saray kalangweran a lalaki, tan say alak et inumen na saramay nakesawan ed kalawakan.”+
3 Inkuan natan na ari: “Tan iner so kawalaan na anak* na katawan mo?”+ Diad saman et inkuan nen Ziba ed ari: “Atilak ed Jerusalem, ta inkuan ton, ‘Ipawil natan ed siak na sankaabungan na Israel so panarian nen amak.’”+
4 Insan inkuan na ari ed si Ziba: “Kien mo la so amin a kayarian nen Mefiboset.”+ Inmebat si Ziba: “Ondakmomo ak natan ed arapan mo. Komon ta nagamoran koy panangabobon mo, katawan kon ari.”+
5 Sanen akasabid Bahurim si Arin David, walay pinmaway a sakey a laki ed pamilya na sankaabungan nen Saul a manngaray Simei,+ ya anak nen Gera, tan sikatoy manbabando na ayew legan ya onaasingger.+
6 Tinutupak toy Arin David tan amin a lingkor na ari, pati say amin a totoo tan saray mabibiskeg a lalaki a walad kawanan tan kawigi to.
7 Oniay inkuan nen Simei legan a mangibabalikas na ayew: “Taynan ka, taynan ka dia, sikan managpatey! Sikan andi-kakanaan a too!
8 Impawil nen Jehova ed sika so amin a kasalanan mod dala nisengeg ed sankaabungan nen Saul a sinalatan mo ed panuuley to bilang ari, balet inter nen Jehova so inkaari ed si Absalom ya anak mo. Sinmabid sika natan so desyang, ta managpatey ka!”+
9 Insan akitongtong ed ari si Abisai ya anak nen Zeruia:+ “Akin et aabuloyan na katawan kon ari a paayew+ ed sayan inatey ya aso?+ Ipangasim, abuloyan mo ak a dagoen ko tan putoten koy ulo to.”+
10 Balet inkuan na ari: “Antoy pibabalik ed sikayo ran ananak nen Zeruia?+ Paulyan yon mangayew ed siak,+ ta imbaga nen Jehova ed sikaton,+ ‘Ayew moy David!’ Kanian siopay makapangibagay, ‘Akin et gagawaen mo itan?’”
11 Insan oniay inkuan nen David ed si Abisai tan amin a lingkor to: “No say dilin anak ko a nanlapud dilin laman ko et labay to ak a pateyen,*+ di nagkalalo lad sakey a Benjaminita!+ Paulyan yo lan ayewen to ak, ta ingganggan itan nen Jehova ed sikato!
12 Agla pigan nanengneng nen Jehova so paniirap ko,+ tan ipawil nen Jehova ed siak so kamaongan imbes a saray ayew a nibando ed siak ed sayan agew.”+
13 Diad saman et nantultuloy a nanakar ed dalan si David tan saray totoo to legan a mibabansag ed sikato si Simei a manaakar ed gilig na palandey, a manbabando na saray ayew+ tan mantutupak na bato tan dakel a dabok.
14 Agnambayag et naksawan ya akasabi so ari tan say amin a totoon kaiba to diad pasen a laen da, tan nampainawa ra.
15 Kaleganan na satan et sinmabi ed Jerusalem si Absalom tan amin a lalaki na Israel, tan kaiba toy Ahitofel.+
16 Sanen linmad si Absalom si Husai+ ya Arkita,+ say kaaro* nen David, oniay inkuan nen Husai ed si Absalom: “Manbilay komon na andukey so ari!+ Manbilay komon na andukey so ari!”
17 Diad saman et inkuan nen Absalom ed si Husai: “Onia ta so matoor a panangarom ed kaarom? Akin et agka akila ed samay kaarom?”
18 Kanian inkuan nen Husai ed si Absalom: “Andi, wala ak ed dapag na samay pinili nen Jehova, tan sayan totoo, tan amin a lalaki na Israel. Mansiansia ak ed sikato.
19 Tan ibagak lamet, Siopay panlingkoran ko? Agta say anak to? No panon a nanlingkoran koy amam, manlingkor ak met ed sika.”+
20 Insan inkuan nen Absalom ed si Ahitofel: “Antoy nisimbawam+ a gawaen tayo?”
21 Diad saman et inkuan nen Ahitofel ed si Absalom: “Akdolan mo iray onkokomaduan asawa nen amam,+ saramay intilak ton mangasikasod abung.*+ Insan no narengelan na interon Israel a ginawam iya tan ininsultom so amam, ombiskeg iramay manusuporta ed sika.”
22 Kanian angipaalagey ira na tolda parad si Absalom diad toktok na abung,+ tan inakdolan nen Absalom iray onkokomaduan asawa nen ama to+ diad pakanengneng na interon Israel.+
23 Diad saraman ya agew, say simbawa nen Ahitofel+ et ipapasen a singa* salita na tuan Dios. Ontan so pangipapasen nen David tan Absalom ed amin a simbawa nen Ahitofel.
Paimanod leksab
^ Nagkalalo lad saray igos tan nayari met a saray datiles.
^ Odino “apo.”
^ Odino “et aanapen toy kamarerwak.”
^ Odino “panmamatalkan.”
^ Odino “palasyo.”
^ Odino “et singa pantetepet na sakey nipaakar ed.”