Komaduan Samuel 17:1-29
17 Insan inkuan nen Ahitofel ed si Absalom: “Ipangasim, abuloyan mo ak a mamili na 12,000 lalaki tan usilan koy David ed sayan labi.
2 Onla ak ed sikato leleg a sikatoy naksawan tan andiay pakayari,*+ tan sikatoy taktakoten ko; tan ombatik so amin a totoon kaiba to, tan say ari labat so pateyen ko.+
3 Insan ipawil kod sika so amin a totoo. Say kipawil na amin a totoo et akadepended no antoy nagawa ed samay toon aanapen mo. Diad ontan et niwalay kareenan ed amin a totoo.”
4 Sayan suhestion et marakep ed pakanengneng nen Absalom tan amin a mamatatken na Israel.
5 Balet inkuan nen Absalom: “Ipangasi yon tawagen met si Husai+ ya Arkita, tan dengelen tayo no antoy nibaga to.”
6 Kanian linmay Husai ed si Absalom. Insan inkuan nen Absalom ed sikato: “Oniay insimbawa nen Ahitofel. Nepeg tayo kasin gawaen so simbawa to? No andi, ibagam ed sikami sirin.”
7 Diad saman et inkuan nen Husai ed si Absalom: “Say simbawa nen Ahitofel et aliwan marakep ed sayan pankanawnawa!”+
8 Inkuan ni nen Husai: “Kabat mon maong a si amam tan saray totoo to et mabibiskeg,+ tan desperado ra,* a singa sakey ya oso ya abalang to iray kilaw to diad uma.+ Sakey ni, eksperiensyadon sundalo so amam,+ tan agto mansanlabi a kaiba iray totoo.
9 Seguradon diad sayan bekta et sikatoy onaamot ed sakey ed saray ungib* odino ed arum a pasen;+ tan no sikatoy unonan onataki, saramay makadngel ed agawa et ikuan dan, ‘Atalo iramay ontutumbok ed si Absalom!’
10 Tan anggan say makpel a too a walaan na puson singa leon+ et seguradon natunaw ed takot, ta amta na interon Israel a say amam et sakey a mabiskeg a too+ tan makpel iray lalakin kaiba to.
11 Saya so simbawak: Tipon mo so interon Israel, manlapud Dan ya anggad Beer-sheba,+ a singa karakel na buer ed gilig na dayat,+ tan idaulom iran milaban.
12 Sikatoy lusoben tayo anggan iner so pakaromogan ed sikato, tan ondagsa itayod sikato a singa linaew ya ompepelag ed dalin; tan anggapod sikara so makaliktar, balanglan sikato odino siopaman ed saray lalakin kaiba to.
13 No sikatoy onatras tan onloob ed sakey a syudad, say interon Israel et mangawit na saray lubir ed satan a syudad, tan igayugoy tayo itan ed lawak anggad anggapoy natilak ya anggan sakey a bato.”
14 Insan inkuan nen Absalom tan amin a lalaki ed Israel: “Mas marakep so simbawa nen Husai ya Arkita+ nen say simbawa nen Ahitofel!” Ta ginetma* nen Jehova a deralen so maong a simbawa nen Ahitofel+ pian niyakar nen Jehova so kadederal ed si Absalom.+
15 Agnambayag et inkuan nen Husai ed saray saserdoten si Zadok tan Abiatar:+ “Oniay insimbawa nen Ahitofel ed si Absalom tan ed saray mamatatken na Israel, tan oniay insimbawak.
16 Kanian mangibaki kayon tampol na mangipasabi na pasakbay ed si David: ‘Agka mansasanlabi ed saray atapew a kulos* ed kalawakan, noagta seguroen mon ombaliw kad ilog, ta no andi et ompatey* so ari tan amin a totoon kaiba to.’”+
17 Walad En-rogel+ si Jonatan+ tan si Ahimaaz;+ kanian sakey a lingkor a bii so linman angibaga ed sikara ta agda labay a nanengneng iran onloloob ed syudad, tan linma ran mangibaga ed si Arin David.
18 Balet anengneng ira na sakey a kalangweran a laki tan imbaga tod si Absalom. Kanian tampol iran tinmaynan a dua, tan linma rad abung na sakey a laki diad Bahurim+ a walaan na bobon ed sular to. Inmamot ira diman,
19 tan sinakbongan na asawa na samay laki so sangab na bobon tan tinapewan to na abayo lan ilik; anggapoy makaamta ed satan.
20 Linmad abung na samay bii iray lingkor nen Absalom tan intepet da: “Iner so kawalaan nen Ahimaaz tan si Jonatan?” Inmebat so bii: “Dinmalan ira dia tan amaarap irad ilog.”+ Insan inanap ira na saray lalaki, balet agda ra aromog, kanian pinmawil ira ed Jerusalem.
21 Kaalis na saramay lalaki, pinmaway ira ed bobon tan linma ran angibalita ed si Arin David. Inkuan dad sikato: “La ka tan baliw kan tampol ed ilog, ta oniay insimbawa nen Ahitofel sumpad sika.”+
22 Tampol ya inmalagey si David tan amin a totoon kaiba to tan binmaliw ira ed Jordan. Kaliwaway kabuasan, akabaliw la ran amin ed Jordan.
23 Sanen anengneng nen Ahitofel ya agda ginawa so simbawa to, imparaan toy asno tan linmad abung to diad baley a niyanakan to.+ Kayari ton binilin so sankaabungan to,+ imbitay toy inkasikato.+ Kanian sikatoy inatey tan niponpon diad pasen ya angiponponan ed saray inmuunan atateng to.
24 Kaleganan na satan et linmay David ed Mahanaim,+ tan binmaliw si Absalom ed Jordan a kaiba toy amin a lalaki ed Israel.
25 Impasen nen Absalom si Amasa+ bilang pangulo na armada a kasalat nen Joab;+ si Amasa et anak na sakey a lakin manngaray Itra ya Israelita, ya akirelasyon nensaman ed si Abigail+ ya anak nen Nahas, say agi nen Zeruia ya ina nen Joab.
26 Nankampo ed dalin na Gilead+ so Israel tan si Absalom.
27 Kasabi nen David ed Mahanaim, wadman si Sobi ya anak nen Nahas a taga Raba+ na saray Ammonita, si Makir+ ya anak nen Amiel a taga Lo-debar, tan si Barzilai+ a Gileadita a taga Rogelim
28 tan angawit ira na dukolan, palanggana, banga, trigo, sebada, arina, insanglil ya ilik, agayep, lentehas, insanglil a bukel,
29 dilo, mantikilya, karnero, tan keso.* Inawit da irayan amin pian onkanan naakan nen David tan say amin a totoon kaiba to,+ ta inkuan da: “Naksawan la iray totoon walad kalawakan tan narasan tan napgaan la ra.”+
Paimanod leksab
^ Odino “makapuy so duaran lima to.”
^ Odino “tan makakapasnok so kamarerwa ra.”
^ Odino “saray abot; saray kelas.”
^ Odino “ingganggan.”
^ Literal, “naakmon.”
^ Odino posiblin, “saray patar a desierto.”
^ Literal, “saray kinmigtel a gatas na baka.”
