Komaduan Samuel 21:1-22
21 Diad saray agew nen David et walay agawan taloy taon ya eras,+ kanian tinmupleg si David ed si Jehova, tan inkuan nen Jehova: “Nankasalanan ed dala si Saul tan say sankaabungan to, lapud pinatey to iray Gibeonita.”+
2 Kanian tinawag na ari iray Gibeonita+ tan akitongtong ed sikara. (Aliwan Israelita iray Gibeonita, noagta sikaray akera ed saray Amoreo,+ tan nansamba iray Israelita ya agda ra pateyen,+ balet pinatey ira nen Saul lapud seseg to parad saray totoo na Israel tan Juda.)
3 Inkuan nen David ed saray Gibeonita: “Antoy gawaen ko parad sikayo, tan panon kon nasakbongan so kasalanan, pian bendisyonan yo so tawir nen Jehova?”
4 Inkuan ed sikato na saray Gibeonita: “No nipaakar ed si Saul tan say sankaabungan to, aliwan pilak odino balitok so aanapen mi;+ tan agmi nayarin pateyen so siopaman a too ed Israel.” Diad saman et inkuan to: “Gawaen ko so antokaman ya ibaga yo.”
5 Inkuan da ed ari: “Samay too ya angupot ed sikami tan malabay a naandi kami diad inerman a teritorya na Israel+—
6 niiter komon ed sikami so pitoran ananak to. Ibitay mi iray bangkay da*+ ed arapan nen Jehova diad Gibea+ a syudad nen Saul, say pinili nen Jehova.”+ Insan inkuan na ari: “Iyawat ko ra ed sikayo.”
7 Balet akasian na ari si Mefiboset+ ya anak nen Jonatan ya anak nen Saul, lapud nansamba ed arapan nen Jehova si David tan si Jonatan+ ya anak nen Saul.
8 Kanian inala na ari si Armoni tan si Mefiboset, say duaran anak nen Saul ed si Rizpa+ ya anak nen Aias, tan say limaran ananak nen Mical*+ ya anak nen Saul, ya inyanak tod si Adriel+ ya anak nen Barzilai a Meholatita.
9 Insan inyawat to rad saray Gibeonita, tan imbitay dad palandey iray bangkay da diad arapan nen Jehova.+ Inatey iran pito; pinatey da ra diad unona iran agew na panag-ani, diad gapo na panag-ani na sebada.
10 Insan angalay sakon abel si Rizpa+ ya anak nen Aias tan imbilkag to itan ed bato, manlapud gapo na panag-ani anggad pinmelag so uran ed saray bangkay; agto inabuloyan ya ondapo ed saratan iray manok no agew tan agto inabuloyan a makaasingger iray atap ya ayep no labi.
11 Nipaamta ed si David so ginawa nen Rizpa ya anak nen Aias, say onkokomaduan asawa nen Saul.
12 Kanian linmay David ed saray papangulo* na Jabes-gilead+ tan inala tod sikara iray pukel di Saul tan Jonatan ya anak to, ta tinakew da iratan diad plaza na Bet-san, a ditan ira imbitay na saray Filisteo diad samay agew ya apatey na saray Filisteo si Saul diad Gilboa.+
13 Inala to diman iray pukel di Saul tan Jonatan ya anak to, tan tinipon da met iray pukel na saramay pinatey* a lalaki.+
14 Insan imponpon da iray pukel di Saul tan Jonatan ya anak to diad dalin na Benjamin ed Zela+ diad lubok nen Kis+ ya ama to. Kayari ran ginawa so amin ya ingganggan na ari, dinengel na Dios iray pikakasi ra nipaakar ed dalin da.+
15 Ginmapo lamet so guerra ed baetan na saray Filisteo tan Israel.+ Kanian linman akilaban ed saray Filisteo si David tan saray lingkor to, balet abanalan si David.
16 Si David et pateyen la komon nen Isbi-benob a nanlapud kailalakan na Refaim,+ a say belat na gayang ton gansa et 300 a siklo*+ tan aka-armas na balon espada.
17 Tampol a sikatoy tinulongan nen Abisai+ ya anak nen Zeruia+ tan kinabil to imay Filisteo tan pinatey to. Diad saman et nansamba ed si David iray totoo to: “Agka la mimila ed sikami a miguerra!+ Agmo nepeg ya erepen so lamparaan na Israel!”+
18 Kayari na satan et akiguerra lamet irad saray Filisteo+ diad Gob. Diad saman et pinatey nen Sibecai+ a Husatita si Saf, a nanlapud kailalakan na Refaim.+
19 Tan akilaban ira lamet ed saray Filisteo+ diad Gob, tan pinatey nen Elhanan ya anak nen Jaare-oregim a Betlehemita si Goliat a Gitita, a say putan na gayang to et singa panagpotipotan na saray managlagay abel.+
20 Wala lamet so agawan guerra diad Gat, a ditan et walay lakin nikadkadumay kabaleg to, ya 6 so gamet na kada lima to tan 6 so gamet na kada sali to, 24 ya amin; tan sikatoy nanlapu met ed kailalakan na Refaim.+
21 Naynay ton kakantiawan so Israel.+ Kanian sikatoy pinatey nen Jonatan ya anak nen Simei+ a kuya nen David.
22 Sarayan apat et kailalakan na Refaim a walad Gat, tan tinalo ira nen David tan saray lingkor to.+
Paimanod leksab
^ Literal, “Iparungtal mi ra,” salanti, pinipiley iray taklay tan sali ra.
^ Odino posiblin, “Merab.”
^ Odino posiblin, “saray akankayarian ed dalin.”
^ Literal, “imparungtal.”
^ Manga 3.42 kilo. Nengnengen so Apendise B14.
