Komaduan Samuel 22:1-51
22 Tan imbalikas nen David ed si Jehova iray salita na sayan kansion+ diad samay agew a sikatoy inliktar nen Jehova ed lima na amin a kalaban to+ tan ed lima nen Saul.+
2 Inkuan to:
“Si Jehova so baleg a batok tan say panag-amotan ko+ tan say mangililiktar ed siak.+
3 Say Dios ko so batok+ a pansasalimbengan ko,
Say samper ko+ tan saklor* na kilalaban ko,* say maligen a salimbengan* ko,+
Tan say pasen a nabatikan ko,+ say manangiliktar ko;+ sika ya angiliktar ed siak ed inkaruksa.
4 Ontawag ak ed si Jehova, a makanepegan na dayew,
Tan niliktar ak ed saray kakabusol ko.
5 Apaliberan ak na saray daluyon na ipapatey;+
Ataktakot ak ed indagsa na totoon andi-kakanaan.+
6 Akalotan ak na saray lubir na Lubok;*+
Walad arapan ko iray patit na ipapatey.+
7 Tinmawag ak ed si Jehova lapud agonigon ak,+
Agak tinmundan tinmawag ed Dios ko.
Insan manlapud templo to et dinengel toy boses ko,
Tan akasabid sikato* so ikekerew koy tulong.+
8 Yinmegyeg tan minmayegmeg so dalin;+
Atenyeg iray pundasyon na tawen+
Tan yinmugayog iratan lapud sikatoy asanokan.+
9 Inmasewek so eleng to,
Tan pinmaway ed sangi to so apoy a mangupot;+
Pinmaway ed sikato iray ngalab a mandarlang.
10 Pinaabeba toy tawen tan sikatoy inmepas,+
Tan walad salian to so makapal a lurem.+
11 Sikatoy tinmikyab ya akalugan ed sakey a kerubin.+
Sikatoy sankanengneng a walad saray payak na sakey ya espiritun pinalsa.*+
12 Insan inyan tod kaliberliber to so kabilungetan bilang pinagka-ayaman to,+
Diad saray andekereket tan makapal a lurem.
13 Manlapud liwawa a walad arapan to et linmiob iray mandarlang a ngalab.
14 Insan pinakarol nen Jehova ed tawen;+
Imparengel na Sankatagyan so boses to.+
15 Inkekena to ray pana to+ tan nitaytayak iray kalaban ko;
Say kirmat, tan agulo ra lapud sikato.+
16 Anengneng so datal na dayat;+
Pinmaway iray pundasyon na dalin diad pasnok nen Jehova,
Diad kakasil na ingas a nanlapud eleng to.+
17 Manlapud tagey et inggawat toy lima to;
Binembenan to ak tan inagwat to ak ed aralem a danum.+
18 Inliktar to ak ed samay mabiskeg a kalaban ko,+
Ed saramay mamubusol ed siak, a mas mabiskeg nen siak.
19 Inataki da ak diad agew na paniirap ko,+
Balet si Jehova so tinmulong ed siak.
20 Inyakar to ak ed maligen a pasen;*+
Inliktar to ak lapud naliliketan ed siak.+
21 Tutumangan ak nen Jehova unong ed inkatunong ko;+
Babalesen to ak unong ed inkalinis na panagbilay ko.*+
22 Ta tinumbok ko ray dalan nen Jehova,
Tan agak nanggaway mauges, agko tinaynan so Dios ko.
23 Amin a panangukom to+ et walad arapan ko;
Agak onarawi ed saray inter ton totontonen.+
24 Mansiansia ak ya andiay pakabalawan+ diad arapan to,
Tan paliisan koy panggawa na lingo.+
25 Balesen ak komon nen Jehova unong ed inkatunong ko,+
Unong ed nanenengneng ton inkalinis na panagbilay ko.+
26 Diad samay matoor et onkikiwas kan matoor;+
Diad toon andiay pakabalawan et midedeneng kan andiay pakabalawan;+
27 Diad samay malinis et ipapatnag moy inkasikan malinis,+
Balet diad samay pikewet so panagbilay to et ipapatnag moy inkasikan masilib.*+
28 Ta ililiktar mo iramay mapaabeba,+
Balet saray matam et sumpad saray mapaatagey, tan iyaabebam ira.+
29 Ta sika so lamparaan ko, O Jehova;+
Si Jehova so mamapaliwawa ed kabilungetan ko.+
30 Diad tulong mo et nalabanan koy grupo na tulisan;
Diad pakayari na Dios et nakalab koy padir.+
31 Say tuan Dios et ayadyari so kimey to;+
Say salita nen Jehova et puro.+
Sikatoy sakey a samper ed amin a manpapasalimbeng ed sikato.+
32 Ta siopa so Dios noag si Jehova?+
Tan siopa so bato noag say Dios tayo?+
33 Say tuan Dios so mabiskeg a panag-amotan ko,+
Tan gawaen ton maptek so dalan ko.+
34 Saray salik et gagawaen ton singa sali na ulsa;
Papaalageyen to ak diad atagey iran pasen.+
35 Ipapasal to ray limak a milaban;
Sarag a pinaten na saray taklay ko so gansan pana.
36 Ilalaban mo ak diad panamegley na panagsamper mo,
Tan say inkamapaabebam so mangiyaatagey ed siak.+
37 Papaawangen moy dalan a panakaran ko;
Pian agnakarunyas iray salik.*+
38 Usilan ko ray kakabusol ko tan upoten ko ra;
Agak ompawil anggad ag-ira naupot.
39 Tan upoten ko ra tan kabilen ko ra anggad agla ra makabangon;+
Nabaktar irad salian ko.
40 Ikdan mo ak na biskeg a milaban;+
Itumbam ed salian ko iray kalaban ko.+
41 Paatrasen mo ray kalaban ko;*+
Panganggaen* ko iramay mamubusol ed siak.+
42 Onkekerew iray tulong, balet anggapoy mangililiktar ed sikara;
Ontatawag ni ra ingen ed si Jehova, balet agto ra eebatan.+
43 Mekmeken ko ra anggad magmaliw iran singa dabok ed dalin;
Pulbosen tan gatin-gatinan ko ra a singa pitek ed saray karsada.
44 Iliktar mo ak ed panaanap na saray totook ed kalilingoan ko.+
Salimbengan mo ak pian magmaliw a pangulo na saray nasyon;+
Saray totoon agko kabat et manlingkor ed siak.+
45 Saray dayo et onsingger ed siak a mankebet ira ed takot;+
Ontulok irad siak lapud narengelan da nipaakar ed siak.*
46 Naandiay kasil na linawa* iray dayo;
Manggiwgiw iran ompaway ed saray panag-amotan da.
47 Si Jehova et mabilay! Narayew komon so Batok!+
Nitandoro komon so Dios, say bato na kilalaban ko.+
48 Say tuan Dios so ombabales parad siak;+
Ipapasakop tod siak iray totoo;+
49 Ililiktar to ak ed saray kalaban ko.
Iyaatagey mo ak+ sumpad saramay onaatakid siak;
Iyaagel mo ak ed maruksan too.+
50 Kanian misalamat ak ed sika diad limog na saray nasyon, O Jehova,+
Tan kansionan ko na panangidayew so* ngaran mo:+
51 Sikatoy manggagawa na baleg iran panangiliktar* parad pinili ton ari;+
Ipapatnag toy matoor a panangaro ed nilanaan to,
Ed si David tan ed ilalak* to diad andi-anggaan.”+
Paimanod leksab
^ Odino “tan makapanyarin manangiliktar ko.”
^ Odino “atagey tan maligen a pasen.”
^ Literal, “layag to.”
^ Odino “na dagem.”
^ Odino “ed maawang a pasen.”
^ Literal, “inkalinis na saray limak.”
^ Odino posiblin, “mankunkunwari kan singa makulangkulang.”
^ Odino “iray kalitkalit ko.”
^ Odino “Iter mod siak so tenger na saray kalaban ko.”
^ Literal, “Pareenen.”
^ Literal, “Diad pakadngel na layag et ontulok irad siak.”
^ Odino “Onkapuy.”
^ Odino “mantogtog tan mangansion ak parad.”
^ Odino “baleg iran pananalo.”
^ Literal, “bini.”