Komaduan Samuel 4:1-12
4 Sanen nadngelan na anak nen Saul a si Is-boset*+ ya inatey lay Abner diad Hebron,+ sikatoy tinmalaw* tan agonigon so amin ya Israelita.
2 Sayan anak nen Saul et walaan na duaran lalaki a mangidadaulo ed saray grupo na tulisan: say sakey et manngaray Baanah tan samay sakey et manngaray Recab. Ananak ira nen Rimon a Beerotita, diad tribu nen Benjamin. (Ta say Beerot+ et kabiangan met nensaman na Benjamin.
3 Batik iray Beerotita ed Gitaim,+ tan nanayam ira diman bilang dayo anggad sayan agew.)
4 Si Jonatan+ ya anak nen Saul et walay anak ton lupoy.*+ Sikatoy mantaon na limara sanen sinmabi so balita a nanlapud Jezreel+ nipaakar ed si Saul tan Jonatan, tan sikatoy ineba na managkomis to tan batik, balet diad panaapura to, naplag so ugaw tan alupoy. Say ngaran to et Mefiboset.+
5 Kakkaktangan na agew sanen si Recab tan Baanah, ya ananak nen Rimon a Beerotita, et linmad abung nen Is-boset legan a sikatoy manpapainawa ed kaagwan.
6 Linmoob ira ed abung a nankunkunwari ran mangalay trigo, tan sikatoy dinuyok dad eges; insan tinmakas si Recab tan si Baanah+ ya agi to.
7 Diad inloob dad abung, sikatoy akarukol ed kuarto to, kanian sikatoy dinuyok tan pinatey da, tan pinutotan day ulo. Insan da inalay ulo to tan sanlabi ran nanakar a paarap ed Araba.
8 Tan inyakar da so ulo nen Is-boset+ ed si David diad Hebron tan inkuan dad ari: “Nia so ulo nen Is-boset ya anak nen Saul a kalaban mo,+ a malabay a mamatey ed sika.*+ Diad sayan agew et inter nen Jehova ed katawan kon ari so panangibales ed si Saul tan saray kailalakan to.”
9 Balet oniay inyebat nen David ed si Recab tan si Baanah ya agi to, saray ananak nen Rimon a Beerotita: “Unong a mabilay si Jehova, ya angiliktar ed siak* ed amin a gonigon,+
10 sanen walay angibalita ed siak ya, ‘Inatey lay Saul,’+ tan abaloan ton maong a balita so inyakar tod siak, sikatoy inerel ko tan pinatey kod+ Ziklag. Saman so tumang ya inter kod samay mensahero!
11 Agta nagkalalo la no pateyen na mauges a lalaki so sakey a matunong a laki ya akarukol ed dilin abung to? Agko ta anapen so dala to ed lima yo,+ tan agta kayo kasi ekalen ed dalin?”
12 Diad saman et ingganggan nen David iray kalangweran a lalaki a pateyen da ra.+ Pinutot da iray lima tan sali ra tan imbitay da rad+ abay na tiponay danum diad Hebron. Balet inala ray ulo nen Is-boset tan imponpon dad angiponponan ed si Abner diad Hebron.
Paimanod leksab
^ Literal, “na lakin anak nen Saul.”
^ Literal, “kinmapuy iray lima to.”
^ Odino “piley.”
^ Odino “a manaanap ed kamarerwam.”
^ Odino “anondon ed kamarerwak.”